ၵူၼ်းၼမ်ႉၶမ်း ၵေႃႉၼိုင်ႈ ၺႃးမၢၵ်ႇတႅၵ်ႇသႂ်ႇ ၽွင်းတိုၵ်ႉၽုၵ်ႇသွမ်ႈဢွႆႈ လႆႈတိူဝ်ႉမၢတ်ႇၸဵပ်းႁၢဝ်ႈႁႅင်း ဝႃႈၼႆ။
ဝၼ်းတီႈ 05/02/2025 ယၢမ်းဝၢႆးဝၼ်း 3 မူင်းပၢႆ ၵူၼ်းဝၢၼ်ႈၼွင်တိူၼ်း ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ၽူႈၸၢႆး ၵေႃႉၼိုင်ႈ ၵႂႃႇတီႇၽဵဝ်ႈသူၼ်သေ ဢဝ်ၽႃႉၽၼ်းၺႃး မၢၵ်ႇမႅင်းတႅၵ်ႇသႂ်ႇ ၸၢၵ်ႇမၢၵ်ႇတိူဝ်ႉၺႃး ၸွမ်းၼႃႈၸွမ်းတူဝ် လႆႈမၢတ်ႇၸဵပ်းႁႅင်း ၼႆယဝ်ႉ။
ၵူၼ်းပိုၼ်ႉတီႈ ဝဵင်းၼမ်ႉၶမ်း လၢတ်ႈၽူႈတွႆႇႁွၵ်ႈဝႃႈ – “ၽူႈၸၢႆး ၵေႃႉၼိုင်ႈ ၵူၼ်းဝၢၼ်ႈၼွင်တိူၼ်း ၵႂႃႇၽုၵ်ႇဢွႆ တီႈၼႂ်းသူၼ် ၽွင်းမၼ်းၸၢႆး တႅပ်းဢွႆႈတႃႇတေၽုၵ်ႇသွမ်ႈၼၼ်ႉ ၵႂႃႇၽၼ်းၺႃးမၢၵ်ႇတႅၵ်ႇ ဢၼ်မီးဝႆႉၼႂ်းသူၼ် ၼၼ်ႉ ႁဵတ်းႁႂ်ႈမၢၵ်ႇတႅၵ်ႇသႂ်ႇ ၸႅၵ်ႇမၢၵ်ႇတိူဝ်ႉၺႃး ၸွမ်းၼႃႈတႃလႄႈ ၸွမ်းတူဝ်ၶိင်းသေ လႆႈမၢတ်ႇၸဵပ်းဢေႃႈ”- ဝႃႈၼႆ။
ဝၢႆးၼၼ်ႉ ယူႇတီႈ ၾၢႆႇၸွႆႈထႅမ် ၸုမ်းတူင်ႇဝူင်းၵူၼ်း လႆႈဢဝ်တူဝ်မၼ်းၸၢႆး သူင်ႇယူတ်းယႃဝႆႉ တီႈႁူင်းယႃ ဝဵင်းၼမ်ႉၶမ်းယဝ်ႉ ဝႃႈၼႆ။
ဝၢၼ်ႈၼွင်တိူၼ်းၼႆႉ တိတ်းၸပ်းၾင်ႇၼမ်ႉမၢဝ်း မီးၾၢႆႇႁွင်ႇဝဵင်းၼမ်ႉၶမ်းသေ ၽွင်းၽႅၼ်ယၼ်ႇသိုၵ်း 1027 ၼၼ်ႉ ပဵၼ်ဝၢၼ်ႈဢၼ်လႆႈၶၢမ်ႇတၢမ်ႇ ပၢင်တိုၵ်းသိုၵ်းသိူဝ်ႁၢဝ်ႈႁႅင်းမႃး ဝၢၼ်ႈၼိုင်ႈ။
လိူဝ်ၼၼ်ႉ ၵူၼ်းဝၢၼ်ႈၼႂ်းပိုၼ်ႉတီႈ ၵမ်ႈၽွင်ႈ ယင်းပႆႇၸၢင်ႈပူၵ်းပွင်ၶိုၼ်း ၼႃႈႁိူၼ်းတႃယေးၽႂ်မၼ်းၵေႃႈ မီးတင်းၼမ်။ ယဝ်ႉၵေႃႈ ၵူၼ်းမိူင်းၵႆႉထူပ်းၽေး လွင်ႈမၢၵ်ႇမိုဝ်ႉၸိုၼ်းယမ်း ဢၼ်ၵိုတ်းၶမ်ဝႆႉ ၸိူဝ်း ၼၼ်ႉ။
ယၢမ်းလဵဝ် တီႈဝဵင်းၼမ်ႉၶမ်းၼႆႉ သိုၵ်းတဢၢင်း TNLA တူင်ႉၼိုင်ၵႂႃႇမႃးဝႆႉ ၽွင်းၽႅၼ်ယၼ်ႇတိုၵ်း 1027 ၼၼ်ႉ ၵူၼ်းမိူင်းထူပ်းၽေးလူႉတၢႆ ၼႂ်းၵႄႈပၢင်တိုၵ်းၼမ်။ ဝၢႆးပၢင်တိုၵ်း ၽွင်းပီ 2024 ၼၼ်ႉ သိုၵ်းမၢၼ်ႈ ၵႆႉၸႂ်ႉၶိူင်ႈမိၼ်တိုၵ်း ပွႆႇမၢၵ်ႇသႂ်ႇႁိူၼ်းယေး ၵူၼ်းမိူင်းၼႂ်းဝဵင်းၼမ်ႉၶမ်းသေ တိူဝ်ႉၺႃးၵူၼ်းမိူင်း လူႉတၢႆ ၼမ်။
ၼွၵ်ႈလိူဝ်ၼၼ်ႉ မၢၵ်ႇမိုဝ်ႉၸိုၼ်းယမ်း ဢၼ်ၵိုတ်းၶမ်ဝႆႉ ၽွင်းပၢင်တိုၵ်းၸိူဝ်းၼႆႉၵေႃႈ ဢမ်ႇမီးၸုမ်းလႂ် မႃးၵဵပ်းၽဵဝ်ႈပၼ်။ ႁိူၼ်းယေး ၵူၼ်းမိူင်းဢၼ်လူႉၵွႆဝႆႉ ယွၼ်ႉပၢင်တိုၵ်း ၸိူဝ်းၼၼ်ႉၵေႃႈ ဢမ်ႇမီးၸုမ်းလႂ် မႃးၸွႆႈပူၵ်းပွင်ပၼ်သင် ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ