တီႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း လုၵ်ႈဢွၼ်ႇၸၢႆး ဢႃယု 16 ပီ ပူၼ်ႉပႅၼ်လူလၢႆ လုၵ်ႈဢွၼ်ႇယိင်း ဢႃယု 4 ၶူပ်ႇ ၽူႈမီးဢႃႇၼႃႇဢမ်ႇၸၢင်ႈဢဝ်လိူင်ႈပၼ်တူတ်ႈတၢမ်ႇ – ၾၢႆႇၸၢႆး ၸႂ်ႉငိုၼ်းသၢႆႈတႅၼ်း 50 သႅၼ်သေ ပိၵ်ႉပၼ်ႁႃပႅတ်ႈ။

ဝၼ်းတီႈ 02/02/2025 ယၢမ်းၵၢင်ဝၼ်း 12 မူင်း လုၵ်ႈဢွၼ်ႇၸၢႆးသႅၼ်းပၢၼ်သိၵ်းႁိၵ်း ဢႃယု 16 ပီ ပူၼ်ႉပႅၼ်ၵၼ်ႉ ၸၼ် လုၵ်ႈဢွၼ်ႇယိင်းဢွၼ်ႇ ဢႃယု 4 ၶူပ်ႇ တီႈဢိူင်ႇမျိၼ်းၵျတူဝ်း ဝဵင်းယႂႃႇငၢၼ်ႇ။ လွင်ႈၸိူင်ႉၼႆ မိူဝ်ႈၵွၼ်ႇ ဢမ်ႇယၢမ်ႈမီးမႃးလႄႈ ႁဵတ်းႁႂ်ႈၵူၼ်းပိုၼ်ႉတီႈ တူၵ်းၸႂ်ယုပ်းၽၢၼ်ႈ။   

ၵူၼ်းယိင်း ၼႂ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ပေႃႈမႄႈလုၵ်ႈဢွၼ်ႇယိင်း ၵႂႃႇၸူးၵၢင်ႉၵႄႇ ၼႂ်းဝၢၼ်ႈသေ ၵႄႈလိတ်ႈ၊ ၾၢႆႇလုၵ်ႈဢွၼ်ႇၸၢႆး ပၼ်ငိုၼ်း 50 သႅၼ် ယႃႇႁႂ်ႈဢဝ်လိူင်ႈ ယႃႇႁႂ်ႈမီးလွင်ႈမီးတၢင်း။ ယင်းပၢႆလွၵ်ႇငိုတ်ႈဝႃႈ သင်ဝႃႈ ၵႂႃႇလၢတ်ႈတႂ်ႈမိူဝ်းၼိူဝ်ၼႆ တေဢဝ်လိူင်ႈ (ၸွႆးတြႃး) ႁဵတ်းဢမုၶၻီးတေႃႇ – ဝႃႈၼႆထႅင်ႈ”- ဝႃႈၼႆ။

လုၵ်ႈဢွၼ်ႇၸၢႆးၼုမ်ႇ ဢၼ်ပူၼ်ႉပႅၼ်ၵၼ်ႉၸၼ်ၼၼ်ႉ ၸင်ႇႁႃႁဵၼ်းလိၵ်ႈဝႆႉ ၸၼ်ႉ 10 ။ လုၵ်ႈဢွၼ်ႇ ယိင်းဢွၼ်ႇ ဢႃယု 4 ၶူပ်ႇၼၼ်ႉတႄႉ ပႆႇၵႂႃႇႁဵၼ်းလိၵ်ႈ။ 

လွင်ႈၼႆႉ ၼၢင်းယိင်းၸၢဝ်းထၼု ၽူႈတူင်ႉၼိုင် တႃႇသုၼ်ႇလႆႈသုၼ်ႇပဵၼ်ၵူၼ်း ၵေႃႉၼိုင်ႈ လၢတ်ႈၽူႈ တွႆႇႁွၵ်ႈဝႃႈ -“ပေႃးမီးလွင်ႈပူၼ်ႉပႅၼ်လူလၢႆ မႃးၸိူင်ႉၼႆ ဢမ်ႇဝႃႈပဵၼ်ပၼ်ႁႃ ၼႂ်းလုၵ်ႈဢွၼ်ႇႁိုဝ် ၵူၼ်းလူင် – ထုၵ်ႇလီဢဝ်လိူင်ႈပၼ်တူတ်ႈတၢမ်ႇ ၼၵ်းၼၵ်းၼႃၼႃ။ မိူၼ်ၼင်ႇ ပၼ်ႁႃယၢမ်းလဵဝ် ဢႃယု 16 ပီ ဢၼ်ဝႃႈၼႆႉ ၵူၼ်းမိူင်းႁဝ်းၼႆႉ ၵမ်ႈၼမ် ၶဝ်မေႃဝူၼ်ႉယဝ်ႉ။ မၼ်းတေႁူႉယူႇဝႃႈ လွင်ႈၼႆႉ ပဵၼ်လွင်ႈ ၵၼ်ႉၸၼ်လူလၢႆ ။ ပေႃးဢဝ်ငိုၼ်းၵႄႈလိတ်ႈလႆႈၸိူင်ႉၼႆ တိၵ်းတိၵ်းၸိုင် ၶဝ်တေဢမ်ႇႁူႉဝႃႈ ပဵၼ်တၢင်းၽိတ်း။ မိူဝ်းၼႃႈမႃး ၶဝ်တေၸၢင်ႈႁဵတ်းၽိတ်းၵႂႃႇထႅင်ႈတိၵ်းတိၵ်း။ ၵွပ်ႈၼႆ လွင်ႈပူၼ်ႉပႅၼ် တၢင်းၵႃႇမၼႆႉ ႁဝ်းၶႃႈတႄႉ ၶႂ်ႈႁႂ်ႈပဵၼ်တူတ်ႈတၢမ်ႇၼၵ်းၼႃမိူၼ်ၼင်ႇ တၢမ်ႇၶွၵ်ႈတေႃႇၸူဝ်ႈႁႃႉ၊ တၢမ်ႇတၢႆႁႃႉၼႆ ၸိူဝ်းၼႆႉ”- ဝႃႈၼႆ။

လုၵ်ႈဢွၼ်ႇ ဢၼ်ထုၵ်ႇၵၼ်ႉၸၼ်လူလၢႆၼၼ်ႉ ၸၢင်ႈတုမ်ႉတိူဝ်ႉပၢႆးတူဝ် ပၢႆးၸႂ်လႄႈ ယူႇတီႈ ပေႃႈမႄႈလႄႈ တူင်ႇဝူင်းႁိမ်းႁွမ်း ထုၵ်ႇလီလုမ်းလႃး ပၢႆးတူဝ် ၊ ပၢႆးၸႂ်ပၼ်လီလီ။ လုၵ်ႈဢွၼ်ႇၸၢႆးသမ်ႉ ပေႃးမီးဢႃယု 10 ပၢႆမႃး ႁေႃႊမူၼ်ႊ ၼႂ်းတူဝ်လႅၵ်ႈလၢႆႈလႄႈ ၵႆႉလႄႇႁႃလူင်းမိုဝ်းႁဵတ်းတူဝ်ထူပ်း ၸွမ်းၼင်ႇ ႁေႃႊမူၼ်ႊပဵၼ်မႃး။ ၵွပ်ႈၼႆ ယူႇတီႈၽူႈမီးပုၼ်ႈၽွၼ်းသေ ထုၵ်ႇလူင်းပိုၼ်ႉတီႈ ၼႂ်းဝၢၼ်ႈၼႂ်းဢိူင်ႇ ပၼ်တၢင်း ႁူႉၵဵဝ်ႇၵပ်းလွင်ႈသၽႃႇဝ ပိူင်ပဵၼ်ယိင်းၸၢႆး၊ တၢင်းႁူႉၵဵဝ်ႇၵပ်းငႅင်ႈ Sex Education ၼၼ်ႉ ၵႂၢင်ႈၵႂၢင်ႈၶႂၢင်ၶႂၢင် – ၼၢင်းယိင်း ၸၢဝ်းထၼုၼၼ်ႉ လၢတ်ႈၼင်ႇၼႆ။

ၼႂ်းပၵ်းပိူင်မၢႆမီႈၸိုင်ႈမိူင်းတႄႉ ပႃးဝႆႉဝႃႈ ပေႃးၵၼ်ႉၸၼ်လူလၢႆ လုၵ်ႈဢွၼ်ႇပႃႈတႂ်ႈဢႃယု 12 ၸိုင် တၵ်းတေလႆႈႁပ်ႉတူတ်ႈတၢမ်ႇၶွၵ်ႈ 20 ပီ ထိုင် တၢမ်ႇၶွၵ်ႈတေႃႇၸူဝ်ႈ ဝႃႈၼႆသေတႃႉ ၾၢႆႇၽူႈမီးဢႃႇၼႃႇလူင်ပွင် ၸိုင်ႈပၢၼ်သိုပ်ႇပၢၼ် ဢမ်ႇတွၼ်ႉပၼ်တူတ်ႈတၢမ်ႇထိုင်တီႈထိုင်လႅၼ် မႃးသေပွၵ်ႈ။ ပေႃးၽူႈပူၼ်ႉပႅၼ် ယဵတ်ႈမွၼ်ငိုၼ်း ၶိုၼ်းပူၼ်ႉလွတ်ႈတူတ်ႈတၢမ်ႇမႃးတႃႇသေႇ ဢမ်ႇၼၼ် ၵႆႉပူၼ်ႉတူတ်ႈတၢမ်ႇမႃး ၶိုၼ်း ၽွင်း ၽူႈၼမ်းၸိုင်ႈမိူင်းဢွၵ်ႇၸႂ် ပွႆႇပၼ်ၵူၼ်းတူၵ်းၶွၵ်ႈ ၸိူဝ်းၼႆႉ။