မိူဝ်ႈၼႆႉ ဝၼ်းတီႈ 05/02/2025 ယၢမ်းၵၢင်ဝၼ်း 11 မူင်း ၸၢႆးၵျေႃႇႁၢၼ်ႇ ၸဝ်ႈၶွင်ႁၢၼ်ႉၶၢႆၼမ်ႉ မၼ်းၸိူဝ်ႉၾႆး တီႈပွၵ်ႉၼွင်ပႃယဵၼ် ဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း ၺႃးပလိၵ်ႈမၢၼ်ႈ ၶဝ်ႈတီႉၺွပ်းၵုမ်းတူဝ်ၵႂႃႇ လူၺ်ႈပိုတ်ႇႁၢၼ်ႇၶၢႆ ၸွမ်းပွၵ်ႉယွမ်ႇ ၼႂ်းၵႄႈ ၵူၼ်းယူႇသဝ်းၵိုၼ်းၶွၼ်ႈၼမ် ဝႃႈၼႆ။

ၵူၼ်းပိုၼ်ႉတီႈ ဝဵင်းမိူင်းတူၼ် လၢတ်ႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၸၢႆးၵျေႃႇႁၢၼ်ႇ ဢႃယုမွၵ်ႈ 35 ပီ ၺႃးပလိၵ်ႈမၢၼ်ႈ 2 ၵေႃႉ မႃးတီႉၺွပ်းၵုမ်းတူဝ်ၵႂႃႇယဝ်ႉ။ ၵဵဝ်ႇလူၺ်ႈလွင်ႈ ဢၼ်ၺႃးတီႉၵႂႃႇၼႆႉ ယွၼ်ႉၶဝ်ႁၢမ်ႈပိုတ်ႇၶၢႆၼမ်ႉမၼ်းၸၢၵ်ႈ ၼႂ်းၵႄႈၵူၼ်းယူႇၼမ်လႄႈ ၵၢင်ဝဵင်း ၸိူဝ်းၼႆႉၼႆဝႃႇ။ မိူဝ်ႈႁၢင်ပီ 2023 ၼၼ်ႉ ယွၼ်ႉၾႆးယၢမ်ႈမႆႈ တီႈႁွင်ႈထႅဝ် ႁၢၼ်ႉၶၢႆၵုၼ်ႇယွႆႈ တႅဝ်းၼိုင်ႈ ၼႃႈၵၢတ်ႇၼႆႉမႃးလႄႈ ၼၼ်ႉၵေႃႈ လူႉယႂ်ႇသုမ်းၼမ်ဢေႃႈ ”- ဝႃႈၼႆ။

ဢိင်ၼိူဝ် လွင်ႈၼႆႉ တင်ႈတႄႇ ဝၢႆးၾႆးမႆႈ ႁွင်ႈထႅဝ် ႁၢၼ်ႉၶၢႆၵုၼ်ႇယွႆႈ တႅဝ်းၼိုင်ႈ ၼႃႈၵၢတ်ႇ ဝဵင်းမိူင်းတူၼ်ၼၼ်ႉမႃးသေ ယူႇတီႈ ၸုမ်းၶႄႇၾႆး၊ ပလိၵ်ႈမၢၼ်ႈလႄႈ ၽူႈၵွၼ်းၸႄႈဝဵင်း ဢွၵ်ႇပၵ်း ပိူင်ႁၢမ်ႈၶၢႆၼမ်ႉမၼ်းၸိူဝ်ႉၾႆးမႃး ၸွမ်းပွၵ်ႉယွမ်ႇၼႂ်းၵႄႈၵူၼ်းယူႇသဝ်းၼမ်လႄႈ ၵၢင်ဝဵင်း ၸိူဝ်းၼႆႉမႃး။

“ၶဝ်ဢွၵ်ႇပိူင်မၼ်းမႃး ဝႃႈၼၼ်သေတႃႉၵေႃႈ ၵူၺ်းၵႃႈ ႁၢၼ်ႉၶၢႆၼမ်ႉမၼ်းၸၢၵ်ႈ ၸွမ်းၼႂ်းပွၵ်ႉ ၼႂ်းဝဵင်းတႄႉ ပိူၼ်ႈၶၢႆ ၵၼ်မႃးၼမ်ဝႃႈၼမ် ႁၢၼ်ႉတေႃႇထိုင်ယၢမ်းလဵဝ်။ ၶဝ်ယင်းဢမ်ႇတီႉၺွပ်း။ လွင်ႈၸၢႆးၵျေႃႇႁၢၼ်ႇ ၺႃးၺွပ်းၵႂႃႇၼႆႉ ပလိၵ်ႈမၢၼ်ႈ ဢဝ်တိုဝ်ႉတၢင်း လွင်ႈမိူင်းထႆး တတ်းၾႆးၾႃႉ ႁၢမ်ႈတေႃႉသူင်ႇၼမ်ႉမၼ်းၸၢၵ်ႈ ၸူးတၢင်းမိူင်းမၢၼ်ႈၼႆႉသေ ၶဝ်ႈတီႉၺွပ်းႁိုဝ် ဢမ်ႇႁူႉ ႁဝ်းၶႃႈတႄႉ ထၢင်ႇၸိူင်ႉၼႆ”- ၵူၼ်းပိုၼ်ႉတီႈ ဝဵင်းမိူင်းတူၼ် သိုပ်ႇလၢတ်ႈၼႄၼင်ႇၼႆ။

ယၢမ်းလဵဝ် တီႈဝဵင်းမိူင်းတူၼ်ၼႆႉ ပၢမ်ႉၼမ်ႉမၼ်းၸိူဝ်ႉၾႆး (ပၢမ်ႉယႂ်ႇ) ၼႆႉ တင်းမူတ်းမီး 2 ပၢမ်ႉ လိူဝ်ၼၼ်ႉ ႁၢၼ်ႉၶၢႆယွႆႈ ဢၼ်ပိုတ်ႇၶၢႆၸွမ်းပွၵ်ႇယွမ်ႇ ၸိူဝ်းၼႆႉတႄႉ မီးၼမ်။ ဢိင်ၼိူဝ် မိူင်းထႆး သင်ႇတတ်းၾႆးၾႃႉ၊ ႁၢမ်ႈတေႃႇသူင်ႇၼမ်ႉမၼ်းၶၢမ်ႈမႃးတၢင်းလႅၼ်လိၼ် ၸိူင်ႉၼႆသေ ပၢမ်ႉၼမ်ႉမၼ်း တီႈဝဵင်းမိူင်းတူၼ် ၸိူဝ်းၼႆႉ ၺႃးသိုၵ်းမၢၼ်ႈ သင်ႇပိၵ်ႉဢိုတ်းဝႆႉ ၸူဝ်းၶၢဝ်း ဝႃႈၼႆ။

မိူၼ်ၼႆ မိူဝ်ႈၼႆႉ ယၢမ်းၵၢင်ၼႂ် 10 မူင်း ယူႇတီႈ သိုၵ်းမၢၼ်ႈ ယိုတ်းမိူင်း ၸီႉသင်ႇ ပိၵ်ႉဢိုတ်းပၢမ်ႉ ၼမ်ႉမၼ်းၸိူဝ်ႉၾႆး (ပၢမ်ႉယႂ်ႇ) ၸိူဝ်းၼႆႉ တီႈဝဵင်းမိူင်းသၢတ်ႇ မိူၼ်ၼင်ႇ – ပၢမ်ႉသူၺ်ႇၵျေႃႇၵႃႇ၊ ယွင်ႇၶျီႇဢူး၊ ဢွင်ႇတပျေႇ၊ ၼေႃႇသျႄး ၸိူဝ်း ၼႆႉဝႆႉ။ ယဝ်ႉၵေႃႈ ႁၢၼ်ႉၶၢႆယွႆႈ ၸိူဝ်းၼႆႉထႅင်ႈ။