မိူဝ်ႈၼႆႉ ဝၼ်းတီႈ 05/02/2025 ယၢမ်းၵၢင်ၼႂ် 9 မူင်း ၾၢႆႇၾႆးၾႃႉ ၸႄႈတွၼ်ႈၵဵင်းႁၢႆး သင်ႇတတ်းပႅတ်ႈ ႁႅင်းၾႆးၾႃႉ ဢၼ်သူင်ႇၶၢမ်ႈမႃးတၢင်းၾင်ႇတႃႈၶီႈလဵၵ်း ၼႂ်းၸိုင်ႈတႆးပွတ်းဢွၵ်ႇၶူင်း လႅၼ်လိၼ်တႆး – ထႆး ၼႆႉယဝ်ႉ ဝႃႈၼႆ။

ၵူၼ်းတႃႈၶီႈလဵၵ်း ၽူႈယိင်း ဢႃယု 40 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ၵၢင်ၼႂ် 9 မူင်း တၢင်းၾင်ႇတႃႈၶီႈလဵၵ်းၼႆႉ ၺႃးထႆးၶဝ်တတ်းၾႆးၾႃႉပႅတ်ႈယဝ်ႉၶႃႈ။ ၼမ်ႉမၼ်းၸၢၵ်ႈၵေႃႈ ဢမ်ႇပၼ်မႃးယဝ်ႉ။ တီႈပၢမ်ႇၼမ်ႉမၼ်းၸိူဝ်းၼႆႉ ၵူၼ်းမိူင်းႁိမ်ၵၼ်သိုဝ်ႉ ပေႃးၵိုၼ်းလူင်ဝႆႉဢေႃႈ”- ဝႃႈၼႆ။  

ယၢမ်းလဵဝ် ၸွမ်းပၢမ်ႉၼမ်ႉမၼ်းၸိူဝ်ႉၾႆး ဢၼ်ပိုတ်ႇၶၢႆဝႆႉ ၼႂ်းဝဵင်းတႃႈၶီႈလဵၵ်း ၸိူဝ်းၼႆႉ ၵူၼ်းပိုၼ်ႉတီႈ ႁိမ်ၵၼ်ၵႂႃႇသိုဝ်ႉ ပေႃးၵိုၼ်းၶွၼ်ႈလူင်ဝႆႉ ဝႃႈၼႆ။

ၵူၼ်းတႃႈၶီႈလဵၵ်း ၽူႈၸၢႆး ဢႃယု 30 ပၢႆ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “တီႈပၢမ်ႉၼမ်ႉမၼ်းလွႆသထူင်ႇၼၼ်ႉ ၵူၼ်းမိူင်းႁိမ်ၵၼ်ၵႂႃႇသိုဝ်ႉ ပေႃးပဵၼ်ပွႆးလူင်ဝႆႉၶႃႈဢေႃႈ။ ၶၼ်မၼ်းတႄႉ ပႆႇၶိုၼ်ႈ မိူၼ်ၵဝ်ႇ ၵူၺ်း။ တီႇၸေႇ 1 လိတ်ႉ 29 ဝၢတ်ႇ၊ ထၢတ်ႈသီႇသႅၼ်း (95) 1 လိတ်ႉ 30 ဝၢတ်ႇ။ ၵူၺ်းၵႃႈ ဢမ်ႇႁူႉဝႃႈ ပေႃး ဝၢႆးဝၼ်း၊ မိူဝ်ႈၽုၵ်ႈတႄႉ ၶၼ်ၼမ်ႉမၼ်းတေပုင်ႈၶိုၼ်ႈယူႇၶႃႈယူဝ်ႉ။ ႁဝ်းၶႃႈ ၵူၼ်းမိူင်းတႄႉ မႆႈၸႂ်ဢေႃႈ လွင်ႈၾႆးၾႃႉမွတ်ႇၸိူင်ႉၼႆၼႆႉ တေယၢပ်ႇၽိုတ်ႇ တႃႇတူမ်ႈႁုင်၊ ၸၼ်ႉၼမ်ႉလႄႈ ၵူႈလွင်ႈလွင်ႈၶႃႈယဝ်ႉ”- ဝႃႈၼႆ။

ဢိင်ၼိူဝ် လွင်ႈၾင်ႇမိူင်းထႆး တတ်းႁႅင်းၾႆးၾႃႉပႅတ်ႈ ၸိူင်ႉၼႆၼႆႉ မိူဝ်ႈဝႃး ဝၼ်းတီႈ 04/02/2025 ယူႇတီႈ ၼၢင်းသၢဝ် ၽႄးထွင်းထၢၼ်း သျိၼ်ႊၼဝတ်ႊ ၸွမ်ၽွင်းလူင် မိူင်းထႆး ၸီႉသင်ႇပိၵ်ႉဢိုတ်းပႅတ်ႈ လိူဝ်သေ ၾႆးၾႃႉယဝ်ႉ ၼမ်ႉမၼ်းၸိူဝ်ႉၾႆးထႅင်ႈ။ ဢၼ်သူင်ႇၶၢမ်ႈလႅၼ်လိၼ် ၶၢႆတေႃႇမိူင်းမၢၼ်ႈ မိူၼ်ၼင်ႇ တၢင်းတႃႈၶီႈလဵၵ်း လႅၼ်လိၼ်တႆး – ထႆး။ ဝဵင်းမျႃႉဝတီႇ၊ ဝဵင်းမႂ်ႇသူၺ်ႇၵူၵ်ႉၵူဝ်ႇ၊ KK Park ၊ ဝဵင်းၽြႃးတူင်းသူႇ (ၸေးတီးသၢမ်ဢူင်း) လႅၼ်လိၼ်ထႆး – ယၢင်းၽိူၵ်ႇလႄႈ ၸိူဝ်းၼၼ်ႉ တႄႇဢဝ်ဝၼ်းတီႈ 05 ၼႆႉၵႂႃႇ။

ၵဵဝ်ႇလူၺ်ႈလွင်ႈၼႆႉ မိူဝ်ႈဝႃး ဝၼ်းတီႈ 04 ယူႇတီႈ ၼၢင်းသၢဝ် ၽႄးထွင်းထၢၼ်း သျိၼ်ႊၼဝတ်း ၸွမ် ၽွင်းလူင် မိူင်းထႆး လၢတ်ႈၵႂႃႇတီႈပၢင်သပ်းၸႅင်ႈၶၢဝ်ႇထႆးၼၼ်ႉဝႃႈ – “ၵဵဝ်ႇလူၺ်ႈ လႆႈတတ်းၾႆးၾႃႉ၊ ၼမ်ႉမၼ်းၸၢၵ်ႈ တေႃႇမိူင်းမၢၼ်ႈၼႆႉ တႃႇၸုမ်းၵျႃးၽႅၼ်ႉ ဢၼ်လႅၼ်ၵိၼ်ငိုၼ်းတၢင်းဢွၼ်ႊလၢႆႊ ဢၼ်မီးဝႆႉ တီႈလႅၼ်လိၼ်ထႆး – မၢၼ်ႈ ၸိူဝ်းၼႆႉ ၼင်ႇႁိုဝ် ၶဝ်ပေႃးတေဢမ်ႇၸၢင်ႈၸႂ်ႉ။ သင်ဝႃႈ ထူပ်းႁၼ် ဢွင်ႈတီႈ ၸုမ်းၵျႃးၽႅၼ်ႉၶဝ် ႁဵတ်းၵၢၼ်ၸႂ်ႉတိုဝ်းႁႅင်းၾႆးၾႃႉလႄႈ ၼမ်ႉမၼ်းၸၢၵ်ႈ ဢၼ်ဢဝ်တၢင်းမိူင်း ထႆးၼႆႉ ၵႂႃႇၸိုင် ႁႂ်ႈတတ်းပႅတ်ႈၵမ်းလဵဝ်”- ဝႃႈၼႆ။

ၶၢဝ်ႇထႆး ၶၢဝ်ႇသူတ်ႇၵေႃႈႁၢႆးငၢၼ်းဝႆႉဝႃႈ – ၼႂ်းၼႆႉ ဝၼ်းတီႈ 05/02/2025 ယၢမ်းၵၢင်ၼႂ် 9 မူင်းပၢႆ 10 မိ ၼိတ်ႉ ၼင်ႇၵဝ်ႇ ၾၢႆႇၾႆးၾႃႉ ၸႄႈတွၼ်ႈတၢၵ်ႇ လႆႈၵႂႃႇတတ်းၾႆးၾႃႉ ဢၼ်လုၵ်ႉမိူင်းထႆး သူင်ႇၶၢမ်ႈ လႅၼ်လိၼ် ၶၢႆတေႃႇၾင်ႇမိူင်းမၢၼ်ႈၼၼ်ႉ 2 တီႈ။ ပဵၼ်တီႈဝၢၼ်ႈႁူၺ်ႈမူင်ႈ မူႇ 6 လႄႈ ဝၢၼ်ႈဝၢင်းတ ၶဵၼ်းတႂ်ႈ မူႇ 7 ဢၼ်မီးၼႂ်း ဢိူင်ႇတႃႈသၢႆးလူတ်ႈ တေႃႇၼႃႈ ၸႄႈဝဵင်းမႄႈသွတ်ႇ ၸႄႈတွၼ်ႈတၢၵ်ႇ မိူင်းထႆး။

ၵဵဝ်ႇလူၺ်ႈလွင်ႈ ၾႆးၾႃႉမိူင်းထႆး ဢၼ်သူင်ႇၶၢမ်ႈလႅၼ်လိၼ် ၶၢႆတေႃႇတၢင်းၾင်ႇမိူင်းႁူမ်ႈတုမ်ၼႆႉ တေႃႇပီ ၶဝ်လႆႈငိုၼ်းၶဝ်ႈ 800 လၢၼ်ႉဝၢတ်ႇ။ တွၼ်ႈတႃႇ ၸွမ်းလႅၼ်လိၼ်ထႆး – မၢၼ်ႈ ပေႃးတေလႆႈၾႆးၾႃႉ တၢင်းၾင်ႇမိူင်းထႆး သူင်ႇၶၢႆၸႂ်ႉတိုဝ်းၼၼ်ႉ သွင်ၸိုင်ႈမိူင်း လႆႈၸႂ်တူၵ်းလူင်းၵၼ် မိူဝ်ႈပီ 1996 သေ တႄႇပၼ်ၾႆးၾႃႉမႃး ႁၢၼ်ႉတေႃႇထိုင် ယၢမ်းလဵဝ်။