ၾၢႆႇၽွင်းငမ်း ဝဵင်းၵုၼ်ႁဵင် ၸိုင်ႈတႆးပွတ်းၸၢၼ်း လူင်းၵဵပ်းငိုၼ်းၵူၼ်းမိူင်း တႃႇၵမ်ႉၸွႆႈႁၢပ်ႇၵၢၼ်သိုၵ်းမၢၼ်ႈၵူၺ်း ဢမ်ႇၵႃး ဢၢင်ႈၸိုဝ်ႈတပ်ႉသိုၵ်းၸိုင်ႈတႆးသေ ၵဵပ်းပႃးလႄႈ ၵူၼ်းမိူင်း ပဵၼ်ဢၼ်ယၢပ်ႇၽိုတ်ႇၵိၼ်းၸႂ်။
တႄႇလိူၼ်ၵျုၼ်ႊ ပီ 2024 မႃး သိုၵ်းမၢၼ်ႈ ႁွင်ႉၵူၼ်းၼုမ်ႇၵူၼ်းမိူင်း ၼႂ်းပွၵ်ႉၼႂ်းဝဵင်းၵုၼ်ႁဵင် တႃႇႁၢပ်ႇၵၢၼ်သိုၵ်း။ ၵူၼ်းမိူင်းၼႂ်းပွၵ်ႉဢမ်ႇၶႂ်ႈၵႂႃႇႁၢပ်ႇၵၢၼ်သိုၵ်း ၸွမ်းသိုၵ်းမၢၼ်ႈလႄႈ ၶိုၼ်းတွပ်ႇဝႃႈ တေပၼ် ငိုၼ်းတႃႇၸၢင်ႈၵူၼ်း။ တင်ႈတႄႇၵဵပ်းၵူၼ်းမႃး တေႃႇထိုင်ယၢမ်းလဵဝ် သိုၵ်းမၢၼ်ႈ ၵဵပ်းၵူၼ်းမႃး မီး 9 ၵမ်း ယဝ်ႉ ၵူၼ်းမိူင်းဝဵင်းၵုၼ်ႁဵင်လၢတ်ႈၼင်ႇၼႆ။
“ၾၢႆႇသိုၵ်းမၢၼ်ႈၼႆႉ မႃးၵဵပ်းၵူၼ်းတႃႇၵႂႃႇႁၢပ်ႇၵၢၼ်သိုၵ်း မီး 9 ပွၵ်ႈယဝ်ႉ။ ၵူၼ်းၼႂ်းပွၵ်ႉၵေႃႈ ဢမ်ႇၵႂႃႇ တေၶၢမ်ႇသႂ်ႇငိုၼ်းၼႆသေ လႆႈသႂ်ႇငိုၼ်းမႃး ၼိုင်ႈလိူၼ် 4-5 မိုၼ်ႇပျႃး။ လိူဝ်ၼၼ်ႉဢမ်ႇၵႃး မၢင်ပွၵ်ႈၶဝ် မႃးၵဵပ်းပႃးတႃႇၵိၼ်ယႅမ်ႉၼႂ်းတပ်ႉသိုၵ်းၶဝ်၊ ၼၼ်ႉတႄႉ ၶဝ်မႃးၵဵပ်းလႆႈပၼ် 2 မိုၼ်ႇ ထိုင် 3 မိုၼ်ႇပျႃး၊ ၶဝ်ယင်းလၢတ်ႈဝႃႈ ၵဵပ်းပႃးတႃႇသိုၵ်းတႆး ၼႆသေၵေႃႈ ယွၼ်းၵႂႃႇၵမ်း 3 -4 မိုၼ်ႇပျႃး။ မႃးၵဵပ်းမိူဝ်ႈၼႃႈ တေႁဵတ်းပွႆးဝၼ်းလုၵ်ႈဢွၼ်ႇ တီႈဝၢၼ်ႈလဝ်းၼၼ်ႉ 2-3 လိူၼ်ယဝ်ႉ” – ဝႃႈၼႆ။
ယၢမ်းလဵဝ် ၵူၼ်းမိူင်းဝဵင်းၵုၼ်ႁဵင် ၼိုင်ႈလိူၼ်ၼႆႉ လႆႈပၼ်ငိုၼ်း 3 တႃ။ တႃႇသိုၵ်းမၢၼ်ႈသမ်ႉ 4 မိုၼ်ႇ၊ တႃႇသိုၵ်းတႆး ၼႆသမ်ႉထႅင်ႈ 3 မိုၼ်ႇလႄႈ တႃႇၵိၼ်ယႅမ်ႉသိုၵ်းမၢၼ်ႈ ၼႂ်းတပ်ႉထႅင်ႈ 3 မိုၼ်ႇပျႃး။ ၼိုင်ႈ လိူၼ်ၼႆႉ လႆႈပၼ်သိုၵ်းမၢၼ်ႈ ဢမ်ႇယွမ်း 1 သႅၼ်ပျႃးလႄႈ ပဵၼ်ဢၼ်ၵိၼ်းၸႂ်ၵိၼ်းၶေႃး ယၢပ်ႇၽိုတ်ႇ တႃႇယူႇသဝ်း ဝႃႈၼႆ။
ၵဵဝ်ႇၵပ်းလွင်ႈၼႆႉ ၸဝ်ႈသိုၵ်း ဢုမ်ႈၶိူဝ်း ၽူႈၶၢၼ်ပၢၵ်ႇ RCSS/ SSA လၢတ်ႈၽူႈတွႆႇႁွၵ်ႈဝႃႈ -“ပလိၵ်ႈ(ယေး) ၊ သိုၵ်းမၢၼ်ႈ ဢၼ်ၵဵပ်းငိုၼ်းၵူၼ်းပိုၼ်ႉတီႈ ဢၢၼ်ႇႁူဝ်မိုၼ်ႇၼၼ်ႉ ဢမ်ႇၵဵဝ်ႇၵၼ်တင်း တပ်ႉ သိုၵ်းၸိုင်ႈတႆး RCSS ၶႃႈ။ တီႈၵုၼ်ႁဵင်ၼႆႉ လႆႈငိၼ်းဝႃႈ ၶဝ် (သိုၵ်းမၢၼ်ႈ) ၵဵပ်းတႃႇၵူၼ်း ႁၢပ်ႇၵၢၼ်သိုၵ်း ၼႆၵူၺ်း။ ၼၼ်ႉတႄႉ ၶဝ်တိုၼ်းၵဵပ်းၵူႈဝဵင်းၵူႈမိူင်း။ ပဵၼ်တႃႇသိုၵ်းမၢၼ်ႈၵူၺ်း – ဢမ်ႇၵဵဝ်ႇတင်း RCSS သေဢိတ်း။ ဢမ်ႇႁူႉ ပေႃးၶဝ်ၵူဝ်ၵူၼ်းမိူင်းဢမ်ႇပၼ်သေ ဢဝ်ၸိုဝ်ႈသဵင် RCSS လွၵ်ႇပႃးၼႆတႄႉ ဢမ်ႇ ၸၢင်ႈဝႃႈ၊ ပေႃးမီးလွင်ႈၸိူင်ႉၼႆ ပဵၼ်ၽႂ်၊ ပဵၼ်သိုၵ်းမၢၼ်ႈ ၵေႃႉလႂ် ၼႆၼၼ်ႉ ႁႂ်ႈတိူင်ႇလၢတ်ႈမႃးတီႈ ႁဝ်း ၶႃႈၵမ်းသိုဝ်ႈသေၵမ်း”– ဝႃႈၼႆ။
ၵူၼ်းၸၢႆးပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ၵူၼ်းပိုၼ်ႉတီႈတႄႉ ဢွၼ်ၵၼ်ၶၢင်း၊ လၢႆးလႆႈငိုၼ်းသမ်ႉဢေႇ၊ လႆႈႁႃပၼ်ပိူၼ်ႈၵမ်ႈၼမ်။ ၵမ်ႈၽွင်ႈ ပိူၼ်ႈဢမ်ႇမီးႁိူၼ်း ပိူၼ်ႈၵႂႃႇမိူင်းထႆးၵေႃႈ တင်းတိုၵ်ႉလႆႈသႂ်ႇမႃးယူႇ”- ဝႃႈၼႆ။
ၵူၼ်းဢၼ်မႃးၵဵပ်းငိုၼ်းၼႆႉ ပဵၼ်ၽူႈၵွၼ်းပိုၼ်ႉတီႈ(နယ်မြေမှူး) ။ ၵွၼ်ႇတေမႃးၵဵပ်းၼၼ်ႉ မၼ်းၸၢႆး ပၼ်ၾၢင်ႉသူင်ႇၶၢဝ်ႇမႃးလူင်ႈၼႃႈ 3-4 ဝၼ်းသေ ၸင်ႇလူင်းမႃးၵဵပ်း – ၵူၼ်းပိုၼ်ႉတီႈလၢတ်ႈ။
ၼၢင်းယိင်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ပေႃးၶဝ်တေလူင်းၵဵပ်းၵေႃႈ ၶဝ်လၢတ်ႈဝႆႉ လူင်ႈၼႃႈ 3-4 ဝၼ်း။ ၵူၼ်းပိုၼ်ႉတီႈလႆႈၵႂႃႇၵိၼ်ၸၢင်ႈႁဵတ်းၵၢၼ်ႁႃငိုၼ်းသေမႃးပၼ်။ မီး- ဢမ်ႇမီးၵေႃႈ ၵႃႈလႆႈပၼ်၊ လႆႈ ႁႃပၼ်ၵူႈလိူၼ်ၶႃႈ”- ဝႃႈၼႆ။
ၼႂ်းဝဵင်းၵုၼ်ႁဵင်ၼႆႉမီး 5 ပွၵ်ႉ – မီးပွၵ်ႉ 1 တေႃႇထိုင် 5 ။ ပေႃးပဵၼ်ပွၵ်ႉဢၼ်မီးလင်ႁိူၼ်းၼမ်ၵေႃႈ လႆႈ သႂ်ႇငိုၼ်းဢေႇ၊ ပေႃးပဵၼ်ပွၵ်ႉ လင်ႁိူၼ်းဢေႇၵေႃႈ လႆႈသႂ်ႇငိုၼ်းၼမ်။ တီႈၼမ်သုတ်း ၼိုင်ႈလိူၼ် ၼိုင်ႈ လင်ႁိူၼ်း တေတူၵ်းထိုင် 8 မိုၼ်ႇထိုင် 1 သႅၼ်ပျႃး ဝႃႈၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ