ၵူၼ်းဝၢၼ်ႈသၢႆးမူၼ်ႇ ၸႄႈဝဵင်းၵုၼ်ႁဵင် ၵႂႃႇႁႆႈၸွမ်းၵၼ် 3 ၵေႃႉ ယဵပ်ႇၺႃးမၢၵ်ႇ တၢႆထင်တီႈ ၵေႃႉၼိုင်ႈ ၽွင်းၵူၼ်းဝၢၼ်ႈမႃးၸွႆႈၼၼ်ႉ တႅၵ်ႇထႅင်ႈလုၵ်ႈၼိုင်ႈလႄႈ ႁဵတ်းႁႂ်ႈမၢတ်ႇၸဵပ်း တင်းၼမ်။
ဝၼ်းတီႈ 20/08/2024 ယၢမ်းၵၢင်ၼႂ်ၸဝ်ႉ ၵူၼ်းဝၢၼ်ႈ 3 ၵေႃႉ ယဵပ်ႇၺႃးမၢၵ်ႇ တီႈႁိမ်းၼွင်ဝူဝ်းၶမ်း ဢၼ်မီးႁိမ်းဝၢၼ်ႈသၢႆးမူၼ်ႇ ၼႂ်းၼၼ်ႉ ၸၢႆးလွတ်ႈ ဢႃယု 15 ပီ တၢႆထင်တီႈ။
ၵူၼ်းဝၢၼ်ႈသၢႆးမူၼ်ႇ လၢတ်ႈတီႈၽူႈတွႆႇႁွၵ်ႈဝႃႈ -“ဝၢႆးၸၢႆးလွတ်ႈတၢႆယဝ်ႉ ဢူၺ်းၵေႃႉမၼ်းထႅင်ႈ 2 ၵေႃႉ သိုပ်ႇၾူၼ်းမႃး ႁႂ်ႈၵူၼ်းတီႈဝၢၼ်ႈၵႂႃႇၸွႆႈ။ ၽွင်းၵူၼ်းဝၢၼ်ႈဢဵၼ်ႁႅင်းမွၵ်ႈ 18 ၵေႃႉ ထိုင်ၵႂႃႇတီႈၼၼ်ႉ ၵႂႃႇၶွင်ႉၺႃးသၢႆမၢၵ်ႇတႅၵ်ႇသႂ်ႇထႅင်ႈ ၵူၼ်းဝၢၼ်ႈမၢတ်ႇၸဵပ်း ၸၢၵ်ႇမၢၵ်ႇ 16 ၵေႃႉ။ ယၢမ်းလဵဝ် ၵူၼ်းမၢတ်ႇၸဵပ်း ၸိူဝ်းၼၼ်ႉ သူင်ႇယူတ်းယႃတူဝ်ဝႆႉ တီႈႁူင်းယႃ ဝဵင်းၶူဝ်လမ်”- ဝႃႈၼႆ။
မၢၵ်ႇၼၼ်ႉ ပဵၼ်မၢၵ်ႇၽႂ် ၸုမ်းလႂ်ႁၢင်ႈၵၢင်တေႃႇၵၼ်တႄႉဢမ်ႇႁူႉ။ ၵူၺ်းၵႃႈ တၢင်းထုင်ႉၼွင်ဝူဝ်းၶမ်းၼၼ်ႉ မီးၸုမ်းသိုၵ်း RCSS လႄႈ SSPP တူင်ႉၼိုင်ဝႆႉ။
ၽွင်းၵူၼ်းဝၢၼ်ႈတေၵႂႃႇၸွႆႈ ၸုမ်းၸၢႆးလွတ်ႈၶဝ်ၼၼ်ႉ ၸွမ်းသဵၼ်ႈသၢႆတၢင်းၵေႃႈ လႆႈႁၼ်မၢၵ်ႇဢၼ် ႁၢင်ႈၵၢင်ဝႆႉ ဝႃႈၼႆ။
ၵူၼ်းဝၢၼ်ႈသၢႆးမူၼ်ႇ လၢတ်ႈဝႃႈ – “ၸွမ်းသဵၼ်ႈသၢႆတၢင်းၼၼ်ႉ လႆႈႁၼ်မၢၵ်ႇမႅင်းႁၢင်ႈၵၢင်ဝႆႉ မီးယူႇ 4 – 5 လုၵ်ႈ။ ပဵၼ်ဢၼ်မႆႈၸႂ် ၵူဝ်ပဵၼ်ၽေးတေႃႇသၢႆၸႂ် ၵူၼ်းဝၢၼ်ႈၸိူဝ်းတေၵႂႃႇႁဵတ်းၵၢၼ်သူၼ်ၵၢၼ်ႁႆႈ ၵူၺ်းယဝ်ႉ”- ဝႃႈၼႆ။
ဝၢႆးလင် ၵူၼ်းဝၢၼ်ႈသၢႆးမူၼ်ႇ ယဵပ်ႇၺႃးမၢၵ်ႇ မၢတ်ႇၸဵပ်းလူႉတၢႆၼၼ်ႉ ၸုမ်းယိပ်းၵွင်ႈၵၢင်ႇ မႃးၽဵဝ်ႈ မႃးၵဵပ်းမၢၵ်ႇမႅင်း ၸိူဝ်းၼၼ်ႉပၼ်ယူႇ ၵူၼ်းဝၢၼ်ႈလၢတ်ႈၼင်ႇၼႆ။
တီႈဢၼ်ၸုမ်းယိပ်းၵွင်ႈၵၢင်ႇ ႁၢင်ႈၵၢင်မၢၵ်ႇဝႆႉၼႆႉ ယၢၼ်ၵၼ်တင်းဝၢၼ်ႈသၢႆးမူၼ်ႇ မွၵ်ႈ 2 လၵ်း။ မီးၾၢႆႇၸၢၼ်း ဝၢၼ်ႈလၢႆးၵမ် ၸႄႈဝဵင်းၵုၼ်ႁဵင် မွၵ်ႈ 3 လၵ်း။ ထုင်ႉၼၼ်ႉ ပီႈၼွင်ႉလွႆလႄႈ ပီႈၼွင်ႉတႆးယူႇႁူမ်ႈ ၵၼ်ဝႆႉ။
ၸွမ်းၼင်ႇၶေႃႈလႆႈၸႂ် ၵျီႊၼီႊဝႃႊ ၶွၼ်ႊဝႅၼ်ႊသျိၼ်ႊတႄႉ ပႃးဝႆႉဝႃႈ – ၸုမ်းယိပ်းၵွင်ႈၵၢင်ႇၼႆႉ ႁၢမ်ႈဢဝ်ၵူၼ်းဝၢၼ်ႈ ၵူၼ်းမိူင်းလႄႈ ဝၢၼ်ႈသူၼ်ႁိူၼ်းယေး ႁဵတ်းပဝ်ႉမၢႆၵၢၼ်သိုၵ်း၊ ႁၢမ်ႈၸႂ်ႉမၢၵ်ႇမႅင်းၾင်လိၼ်လႄႈ မၢၵ်ႇဢၼ်ၸၢင်ႈတႅၵ်ႇၽူင်ႉ၊ မၢၵ်ႇဢၼ်မီးၵွင်ႉငူၼ်ႉ မႃးၸႂ်ႉတိုဝ်းႁိမ်းဝၢၼ်ႈသူၼ်ၵူၼ်းမိူင်း ဝႃႈၼႆဝႆႉ။
တႅမ်ႈ – ယိင်းသဵဝ်ႈၶၢဝ် (ၽူႈသိုပ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ