မိူဝ်ႈၼႆႉ ဝၼ်းတီႈ 11/1/2026 ဝၼ်းပၢင်လိူၵ်ႈတင်ႈ တီႈဝဵင်းၵုၼ်ႁဵင် ၸိုင်ႈတႆးပွတ်းၸၢၼ်း ၵူၼ်းထဝ်ႈၸိူဝ်းၵႂႃႇပၼ်သဵင်ၵၢင်ၸႂ်ဢွၼ်ၵၼ်ယၢပ်ႇၽိုတ်ႇတႃႇတဵၵ်းၼဵၼ်တီႈၸၢၵ်ႈယွၼ်ႉပိူဝ်ႈ Logo ပႃႇတီႇ လဵၵ်ႉ/ ဢမ်ႇၸႅင်ႈလီ ဝႃႈၼႆ။
ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ –“ ၵူၼ်းၵႂႃႇပၼ်သဵင်ၵၢင်ၸႂ်တႄႉ မီးၼမ်ယူႇ ၊ ၵူၺ်းၵႃႈ မိူဝ်ႈၼႆႉယၢမ်းၵၢင်ၼႂ်ၸဝ်ႉ ႁူင်းတွတ်ႈမၼ်းလပ်းသိင်ႇႁႅင်းၼႃႇ တီႈတဵၵ်းၼဵၼ်ၼၼ်ႉ Logo ပႃႇတီႇၵေႃႈ လဵၵ်ႉႁႅင်းၼႃႇ ဢမ်ႇႁၼ်ၸႅင်ႈ။ ၵူၼ်းထဝ်ႈၸိူဝ်းဢမ်ႇႁူႉလိၵ်ႈတႄႉ ဢၼ်လႂ် ပဵၼ်ဢၼ်လႂ်ၵေႃႈ ဢမ်ႇႁူႉတွတ်ႈၵႂႃႇၸိူင်ႉၼၼ် တွတ်ႈၺႃးသင်ၵေႃႈဢမ်ႇႁူႉ တဵၵ်းၵႂႃႇ ၸိူင်ႉၼၼ်ၵူၺ်း ”– ဝႃႈၼႆ ။
ၶိူင်ႈၸၢၵ်ႈဢၼ်သိုၵ်းမၢၼ်ႈယိုတ်းမိူင်းႁဵတ်းဢွၵ်ႇမႃး တႃႇႁႂ်ႈၵူၼ်းမိူင်းၵႂႃႇၼဵၵ်း/ တဵၵ်းပၼ်သဵင်ၵၢင်ၸႂ်ၼၼ်ႉ ဢၼ်လႂ်ပဵၼ်ပႃႇတီႇသင် – ၼႆ ၵူၼ်းပိုၼ်ႉတီႈလၢတ်ႈၼင်ႇၼႆ ။
ဝၼ်းပၼ်သဵင်ၵၢင်ၸႂ်မိူဝ်ႈၼႆႉ ၵမ်ႈၽွင်ႈဢမ်ႇပႃးသဵၼ်ႈၸိုဝ်ႈ ၶဝ်လႄႈဢမ်ႇလႆႈ ၵႂႃႇသႂ်ႇၶႅပ်းၵၢင်ၸႂ် ၵေႃႈမီး ဝႃႈၼႆ ။ ၾၢႆႇၼိုင်ႈ သိုၵ်းမၢၼ်ႈလွၵ်ႇငိုတ်ႈၵူၼ်းၼုမ်ႇ တီႈဝဵင်းၵုၼ်ႁဵင် ဝႆႉဝႃႈ ပေႃးဢမ်ႇၵႂႃႇသႂ်ႇၶႅပ်းၵၢင်ၸႂ် ဢမ်ႇလႆႈဢွၵ်ႇၼွၵ်ႈဝၢၼ်ႈၼွၵ်ႈဝဵင်း ဝႃႈၼႆပႃး ။
ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ –“ၵူၼ်းၼုမ်ႇမၢင်ၸိူဝ်းသမ်ႉ ဢမ်ႇပႃးသဵၼ်ႈမၢႆ တႃႇတွတ်ႈၶႅပ်းၵၢင်ၸႂ် ၊ ဢၼ်ပႃးၵမ်ႈၼမ်ၼႆႉပဵၼ် ၵူၼ်းထဝ်ႈ ဢႃယု 50-60 လၢႆလၢႆ ၊ ၵူၼ်းထဝ်ႈမၢင်ၸိူဝ်းသမ်ႉဢမ်ႇႁူႉသင် ၊ တီႈၼႂ်းဝဵင်းတႄႉ ပေႃးဢမ်ႇတွတ်ႈၶႅပ်းၵၢင်ၸႂ်ၼႆႉ တေဢမ်ႇပၼ်ဢွၵ်ႇၼွၵ်ႈဝၢၼ်ႈၼွၵ်ႈဝဵင်း ၼွၵ်ႈမိူင်းၼႆ လၢတ်ႈဝႆႉၸိူင်ႉၼႆယူႇ”- ဝႃႈၼႆ ။
ပႃႇတီႇဢၼ်ၶဝ်ႈလိူၵ်ႈတင်ႈ တီႈဝဵင်းၵုၼ်ႁိင်းၼႆႉ မီး 2 ဢၼ် ၊ ပဵၼ်ပႃႇတီႇ သၢင်ႇသီႈ (USDP) လႄႈ ပႃႇတီႇသိူဝ်ၽိူၵ်ႇ (SNDP) ။ ႁူင်းပၼ်သဵင် တင်းသဵင်ႈမီးယူႇ 47 တီႈ။ သဵၼ်ႈမၢႆႁူဝ်ၼပ်ႉၵူၼ်း မီးသုၼ်ႇပၼ်သဵင် ဢၼ်သိုၵ်းမၢၼ်ႈ ပိုၼ်ၽၢဝ်ႇဝႆႉ မီးယူႇ 35221 ၵေႃႉ ၼႆယဝ်ႉ။ ၼႂ်းဝၼ်းပၼ် ၶႅပ်းၵၢင်ၸႂ် တႃႇပၢင်လိူၵ်ႈတင်ႈၼႆႉ ပလိၵ်ႈမၢၼ်ႈ သိုၵ်းမၢၼ်ႈလႄႈ ႁွင်ႈၵၢၼ်ၾၢႆႇၶႄၾႆး ဢဝ်ႁူမ်ႇလူမ်ႈ တီႈႁူင်းပၼ်ၶႅပ်းၵၢင်ၸႂ်ဝႆႉ လႆႈႁူႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ