တႄႇဢဝ် ဝၼ်းတီႈ 03/02/2025 ၼႆႉမႃး ၾၢႆႇပလိၵ်ႈမၢၼ်ႈ (ယေး) ဢၼ်ယူႇတႂ်ႈသိုၵ်းမၢၼ်ႈ ၵုမ်းၵမ် တီႈဝဵင်းၵဵင်းတုင် ၶဝ်ႈမႃးၵူတ်ႇထတ်း တီႉၺွပ်း ၼႂ်းႁၢၼ်ႉၶၢႆရူတ်ႉၵႃး တီႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ လႅၼ်လိၼ်တႆး – ထႆး။

ၵဵဝ်ႇလူၺ်ႈလွင်ႈၼႆႉ တီႈသိုဝ်ႇၶၢဝ်ႇတႃႈၶီႈလဵၵ်း တႅမ်ႈဝႆႉဝႃႈ – ၼႂ်းဝၼ်းတီႈ 3 တႄႇဢဝ်ဝၢႆးဝၼ်း တေႃႇထိုင် 8 မူင်းၵၢင်ၶမ်ႈ ၾၢႆႇပလိၵ်ႈမၢၼ်ႈတင်း ၽူႈမီးပုၼ်ႈၽွၼ်းၶဝ် 20 ပၢႆ ၶီႇရူတ်ႉၵႃး ၶဝ်ႈၵူတ်ႇထတ်းႁၢၼ်ႉၶၢႆ ရူတ်ႉၵႃး Show Room လၢႆတီႈ ၸွမ်းၼႂ်းသႅင်ႇတႃႈၶီႈလဵၵ်း။ ပဵၼ်ၾၢႆႇပလိၵ်ႈယေး တႃႈၶီႈလဵၵ်း ၵူၺ်းဢမ်ႇၵႃး ပႃးတင်းလုၵ်ႈၼွင်ႉ ၵႅမ် ၽူႈၵွၼ်းပလိၵ်ႈယေး ၵဵင်းတုင် တၢၼ်ႉၸိၼ်ႇၵေႃႈ မႃးၶဝ်ႈႁူမ်ႈ ၵူတ်ႇထတ်းပႃး – ဝႃႈၼႆ။

ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈၽူႈတွႆႇႁွၵ်ႈဝႃႈ – “ယၢမ်းလဵဝ် ၶဝ်တိုၵ်ႉၶဝ်ႈတီႉၺွပ်း ၸွမ်းႁၢၼ်ႉၶၢႆ ရူတ်ႉၵူၺ်းသေတႃႉ မိူၼ်ၼင်ႇ ရူတ်ႉၵႃး ဢၼ်ၵႂႃႇမႃးၸွမ်းတၢင်းၼၼ်ႉတႄႉ တေတီႉၺွပ်းမိူဝ်ႈလႂ် ပႆႇလၢမ်းလႆႈ ဢမ်ႇၼၼ်ၵေႃႈ ပဵၼ်လၢႆးႁႃၵိၼ်ၶဝ်ႁိုဝ် ၸိူဝ်းၼႆႉၵေႃႈ ၸၢင်ႈပဵၼ်လႆႈ”- ဝႃႈၼႆ။

ယၢမ်းလဵဝ် ၵူၼ်းမိူင်းၸိူဝ်းမီးရူတ်ႉၵႃး ဢမ်ႇမီးဝႂ်ၶဝ်တႄႉ ဢွၼ်ၵၼ်မႆႈၸႂ်ဝႆႉ သင်ၺႃးတီႉၺွပ်ႈၵႂႃႇၼႆၸိုင် ၵူဝ်လႆႈပၼ်ငိုၼ်းၼမ် ပူၼ်ႉတီႈပူၼ်ႉလႅၼ် ၸွမ်းၼင်ႇ ဢၼ်ၶဝ်ယၢမ်ႈႁဵတ်းမႃး ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 01/02/2025 ၼႆႉ ယူႇတီႈ ၾၢႆႇၽွင်းငမ်း၊ ၾၢႆႇပလိၵ်ႈမၢၼ်ႈ တီႈဝဵင်းၵဵင်းတုင် လႆႈၶွတ်ႇၽွတ်ႈ ၸုမ်း TASK FORCE တႃႇတီႉၺွပ်းရူတ်ႉၵႃး ၸိူဝ်းဢမ်ႇမီးဝႂ်။ လိူဝ်ၼၼ်ႉ ယင်းတေၶဝ်ႈ ၵူတ်ႇထတ်းပႃး ၸိူဝ်းပိုတ်ႇၶၢႆဝႆႉရူတ်ႉၵႃး ဢၼ်ဢမ်ႇမႅၼ်ႈၸွမ်းမၢႆမီႈ ၸိူဝ်းၼၼ်ႉထႅင်ႈ ဝႃႈၼႆ။

တႅမ်ႈ – ၸၢႆးမဵဝ်းဢူး