ၽူႈမၢႆၾၢႆႇၽွင်းငမ်းၸႄႈတွၼ်ႈ မိူင်းသၢတ်ႇ ၸိုင်ႈတႆးပွတ်းဢွၵ်ႇ ၺႃးၵူၼ်းဢမ်ႇႁူႉၾၢႆႇ ယိုဝ်းတၢႆ ႁိုင်ၼၢၼ်းလႆႈလိူၼ်ပၢႆယဝ်ႉ လုၵ်ႈမေးတႄႉ တၢႆႁိုဝ်လိပ်းဢမ်ႇႁူႉ တိတ်းတေႃႇဢမ်ႇလႆႈ။  

ၽူႈမၢႆၾၢႆႇၽွင်းငမ်းၸႄႈတွၼ်ႈ မိူင်းသၢတ်ႇ တင်းလုၵ်ႈမေး ဢွၵ်ႇတၢင်းၵႂႃႇတင်း မိူင်းတူၼ်၊ ၼႃးၵွင်းမူး မိူဝ်ႈဝၼ်းတီႈ 26/12/2024။ ထိုင်မႃးဝၼ်းတီႈ 28/12/2024 ၵူၼ်းဢမ်ႇႁူႉၾၢႆႇ ယိုဝ်း တၢႆ တီႈဝၢၼ်ႈၼႃးၵွင်းမူး။ လုၵ်ႈမေးၵေႃႈ တေႃႇထိုင်ဝၼ်းမိူဝ်ႈၼႆႉ ဢမ်ႇမီးၽႂ် ၵပ်းသိုပ်ႇတိတ်း တေႃႇလႆႈ တူဝ်တၢႆၵေႃႈ ဢမ်ႇႁၼ်။

ၵူၼ်းမိူင်းသၢတ်ႇ လၢတ်ႈၽူႈတွႆႇႁွၵ်ႈဝႃႈ -“ပဵၼ်ၵႂႃႇၼႆႉတႄႉ မီးလိူၼ်ပၢႆယဝ်ႉ ၶဝ်ဢမ်ႇပၼ် ဢွၵ်ႇၶၢဝ်ႇ။ မၼ်းပဵၼ်ၽူႈမၢႆၾၢႆႇၽွင်းငမ်းၸႄႈတွၼ်ႈ မိူင်းသၢတ်ႇ၊ ၺႃးယိုဝ်းတၢႆ တီႈဝၢၼ်ႈၼႃးၵွင်းမူး တၢင်းၵႂႃႇမိူင်းၵျွတ်ႈ၊ လုၵ်ႈမေးတႄႉ လႅပ်ႈ ၺႃးတီႉၵႂႃႇ။ တေႃႇထိုင်ဝၼ်းမိူဝ်ႈၼႆႉ ဢမ်ႇလႆႈႁူႉၶၢဝ်ႇ၊ ၵပ်းသိုပ်ႇၵေႃႈဢမ်ႇလႆႈ”- ဝႃႈၼႆ။

ၽူႈမၢႆၾၢႆႇၽွင်းငမ်းၸႄႈတွၼ်ႈ မိူင်းသၢတ်ႇၼႆႉ ၸိုဝ်ႈႁွင်ႉ ဢူးငူၺ်ႇၸူဝ်းတၢၼ်း (ဉီးငွေစိုးသန်း) ဢႃယု 40 ပီ၊ ပဵၼ် ၵူၼ်းမိူင်းသၢတ်ႇ ယူႇပွၵ်ႉဝဵင်းဝၢႆ။

ၵူၼ်းပိုၼ်ႉတီႈ လၢတ်ႈၼႄၽူႈတွႆႇႁွၵ်ႈဝႃႈ – “ဢူးငူၺ်ႇၸူဝ်းတၢၼ်း (ဉီးငွေစိုးသန်း) ၼႆႉၵႆႉထႆၵိၼ် ငိုၼ်း ၵူၼ်းၵႃႉ ၵူၼ်းႁဵတ်းၵၢၼ်ပႃႇမႆႉ ၸိူဝ်းၼႆႉ။ ၵူၺ်းၵႃႈ ဢၼ်မၼ်းၸၢႆးထုၵ်ႇၶႃႈႁႅမ်ၼႆႉတႄႉ ပဵၼ်ယွၼ်ႉသင် ပဵၼ်ၽႂ် ၸုမ်းလႂ်တႄႉ ဢမ်ႇႁူႉၸွမ်း ပလိၵ်ႈၵေႃႈ ဢမ်ႇႁႃတီႉၺွပ်းႁႂ်ႈလႆႈ”- ဝႃႈၼႆ။ 

သိုပ်ႇလၢတ်ႈဝႃႈ – “တေႃႈလဵဝ် ၼႂ်းပိုၼ်ႉတီႈၼႆႉ လွင်ႈႁူမ်ႇလူမ်ႈၵေႃႈ ဢမ်ႇမီးယဝ်ႉ။ လႆႈမႆႈၸႂ်၊ လႆႈ ၵူဝ်ၵူႈမူႇၵူႈၸုမ်းဝႆႉဢေႃႈ”- ဝႃႈၼႆ။

ဝဵင်းမိူင်းသၢတ်ႇၼႆႉ ႁူမ်ႈၵၼ် 3 – 4 ဝၢၼ်ႈသေ ပဵၼ်ဝႆႉၼိုင်ႈဢိူင်ႇ၊ ၽွင်းၵဵပ်းငိုၼ်းတႃႇ ၸၢင်ႈသိုၵ်း မႂ်ႇပၼ်သိုၵ်းမၢၼ်ႈ ၼႆႉၵေႃႈ ယူႇတီႈႁူဝ်ၼပ်ႉႁိူၼ်းၼမ်/ ဢေႇသေ ၼိုင်ႈဢိူင်ႇလႄႈ ၼိုင်ႈဢိူင်ႇ လႆႈပၼ်ငိုၼ်းဢမ်ႇၽဵင်ႇၵၼ်။   

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)