မိူင်းၶႄႇဝႃႈ ဝၢႆးလင်ပွႆးပီမႂ်ႇၶႄႇယဝ်ႉ သိုၵ်းၵဝ်ႈၵၢင်ႉ တၵ်းလႆႈထွႆထွၼ်ဢွၵ်ႇဝဵင်းလႃႈသဵဝ်ႈၼႆသေတႃႉ တေႃႇထိုင်ဝၼ်းမိူဝ်ႈၼႆႉ တီႈဝဵင်းလႃႈသဵဝ်ႈ ဢမ်ႇမီးလွင်ႈလၢၵ်ႇလၢႆးတူင်ႉတိုၼ်ႇသင်၊ သိုၵ်းၵဝ်ႈၵၢင်ႉ လၢတ်ႈဝႃႈ တေၸတ်းပၢင်ပွႆးလႄႈ လွင်ႈတူင်ႉၼိုင်ထႅင်ႈလၢႆလၢႆဢၼ် တႃႇၶၢဝ်းတၢင်းၼိုင်ႈလိူၼ် ဝႃႈၼႆ။

တီႈဝဵင်းလႃႈသဵဝ်ႈၼၼ်ႉ သိုၵ်းၵဝ်ႈၵၢင်ႉ ၸတ်းႁဵတ်းပၢင်ပွႆးပီမႂ်ႇၶႄႇ တႄႇၸဵမ်မိူဝ်ႈဝၼ်းတီႈ 28/01/2025 ။ ဝၼ်းပိုတ်ႇပၢင်ၼၼ်ႉ ၸတ်းပၢင်ပွႆးယႂ်ႇလူင်၊ မီးတၢင်းၵႃႈၵူႈၸၢဝ်းၶိူဝ်း၊ တူဝ်တႅၼ်း ၸုမ်းယိပ်းၵွင်ႈၵၢင်ႇ ၵူႈမူႇၵူႈၸုမ်း မႃးၶဝ်ႈႁူမ်ႈ။

ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈဝႃႈ – “တေႃႇထိုင်ဝၼ်းမိူဝ်ႈၼႆႉ ၵၢၼ်ၽွင်းငမ်း သိုၵ်းၵဝ်ႈၵၢင်ႉၵေႃႈ တိုၵ်ႉပၼ်ႇယူႇ။ သိုၵ်းၵဝ်ႈၵၢင်ႉၵေႃႈ တိုၵ်ႉၵႂႃႇမႃး မိူၼ်ၵဝ်ႇယူႇ ဢမ်ႇမီးလွင်ႈတေႃႉၵူၼ်း တေႃႉၶူဝ်းသင်။ ၶဝ်ၵေႃႈလၢတ်ႈၵူၼ်းမိူင်းဝႆႉဝႃႈ ၵိုတ်းတိုၵ်းၵၼ်တင်း သိုၵ်းမၢၼ်ႈဝႆႉယဝ်ႉ ဢမ်ႇလႆႈၵူဝ်ၶိူင်ႈမိၼ်သိုၵ်း မၢၼ်ႈယဝ်ႉၼႆလႄႈ – ပွႆးၶဝ်ၵေႃႈ ၸင်ႇမီးၵူၼ်းဢိတ်းဢေႃႈ။ ပေႃးဢမ်ႇၸႂ်ႈတႄႉ ပိူၼ်ႈၵေႃႈ တေဢမ်ႇႁတ်းၵႂႃႇလေႃႇ”- ဝႃႈၼႆ။

တူဝ်တႅၼ်းသိုၵ်းၵဝ်ႈၵၢင်ႉ MNDAA လႄႈ တူဝ်တႅၼ်းသိုၵ်းမၢၼ်ႈ ဢုပ်ႇဢူဝ်းၵၼ်တီႈမိူင်းၶႄႇ ဝၼ်းတီႈ 16 လႄႈ 17 ၵျႅၼ်ႊၼိဝ်ႊရီႊယဝ်ႉဢမ်ႇႁိုင် မိူဝ်ႈဝၼ်းတီႈ 20 ၼၼ်ႉ မိူင်းၶႄႇပိုၼ်ၽၢဝ်ႇဝႃႈ ၶဝ်သွင်ၸုမ်း ၵိုတ်းတိုၵ်းၵၼ်ယဝ်ႉ။

လွင်ႈဝႃႈၶႄႇ ၸႂ်ႉသိုၵ်းၵဝ်ႈၵၢင်ႉထွႆထွၼ်ဢွၵ်ႇဝဵင်းလႃႈသဵဝ်ႈ ၼႆၼၼ်ႉ ဝၼ်းပိုတ်ႇပၢင်ပွႆးပီမႂ်ႇၶႄႇ တီႈဝဵင်းလႃႈသဵဝ်ႈ ၼၼ်ႉ ၸဝ်ႈၼႃႈတီႈ ၾၢႆႇမိူင်းၶႄႇ ၵေႃႉၼိုင်ႈ ၶိုၼ်ႈမႃးမွၵ်ႇလၢတ်ႈၶေႃႈၵႂၢမ်း လူၺ်ႈတင်း ၵႂၢမ်းၶႄႇဝႃႈ – ၸွမ်းၼင်ႇ ၶေႃႈလႆႈၸႂ်တူၵ်းလူင်း လွင်ႈငမ်းယဵၼ်ၵၼ်သေ သိုၵ်းၵဝ်ႈၵၢင်ႉ တေလႆႈထွႆထွၼ် ဢွၵ်ႇဝဵင်းလႃႈသဵဝ်ႈ ၼႂ်းလိူၼ်ၵျုၼ်ႊ 2025 ၼႆႉ ႁႂ်ႈယဝ်ႉတူဝ်ႈ။

ၵွပ်ႈၼႆ ၵွၼ်ႇထိုင်လိူၼ်ၵျုၼ်ႊ 2025 ၼႆႉ တီႈဝဵင်းလႃႈသဵဝ်ႈ တေဢမ်ႇမီးလွင်ႈၵဵပ်းသိုၵ်းမႂ်ႇ၊ ၵူၼ်းမိူင်းဝဵင်းလႃႈသဵဝ်ႈ ၸိူဝ်းပၢႆႈၽေးသိုၵ်း ၵႂႃႇမီးတၢင်ႇတီႈတၢင်ႇဝဵင်းၼၼ်ႉ ႁႂ်ႈဢွၼ်ၵၼ် ပွၵ်ႈၶိုၼ်းဝၢၼ်ႈၵိူတ်ႇ မိူင်းၼွၼ်း၊ တီႈဝဵင်းလႃႈသဵဝ်ႈၼႆႉ တေဢမ်ႇမီးပၢင်တိုၵ်းယဝ်ႉ ၸဵမ်ၸိူဝ်းၼႆႉ – ၵူၼ်းမိူင်းဝဵင်းလႃႈသဵဝ်ႈ ၵေႃႉၼိုင်ႈလၢတ်ႈၼင်ႇၼႆ။

ၾၢႆႇၼိုင်ႈၵေႃႈ သိုၵ်းၵဝ်ႈၵၢင်ႉၼႆႉ ပိုၼ်ၽၢဝ်ႇ ယိုတ်းလႆႈဝဵင်းလႃႈသဵဝ်ႈယဝ်ႉ ဝႃႈၼႆသေတႃႉ ၶဝ်ဢမ်ႇၵႂႃႇ ယူႇၼႂ်းလုမ်းတိူင်းသိုၵ်း တႅၼ်းမၢၼ်ႈ။ ဢၼ်ယူႇၼႂ်းလုမ်းတိူင်းသိုၵ်း ပဵၼ်ၸုမ်း PDF ၼႆ – ၵူၼ်းပိုၼ်ႉတီႈ ဢၼ်ႁူႉႁၼ်ၸွမ်းငဝ်းလၢႆး ၵေႃႉၼိုင်ႈၵေႃႈ လၢတ်ႈၼင်ႇၼႆ။