ယၢမ်းလဵဝ် သိုၵ်းမၢၼ်ႈ ပိုတ်ႇပၼ်ၶိုၼ်းသဵၼ်ႈတၢင်းၶဝ်ႈဢွၵ်ႇဝဵင်း တီႈ 105 လၵ်း ဝဵင်းမူႇၸေႊယဝ်ႉသေတႃႉ တိုၵ်ႉၵူတ်ႇထတ်းထဵတ်ႈထၢမ် ယွၼ်းငိုၼ်းၸဝ်ႈရူတ်ႉၵႃး ၵႂႃႇမႃးႁၢဝ်ႈႁႅင်း ဝႃႈၼႆ။

တႄႇဢဝ် ဝၼ်းတီႈ 28/01/2025 မႃးၼႆႉ ယူႇတီႈ သိုၵ်းမၢၼ်ႈ ယိုတ်းမိူင်း ပိုတ်ႇပၼ်ၶိုၼ်းၵဵတ်ႉ/ လၢၼ်ႇ တီႈႁိမ်းဝၢၼ်ႈ ၼမ်ႉၶူမ် သဵၼ်ႈတၢင်းဢၼ်ၵၢႆႇၸူး တီႈပၢင်ၵၢတ်ႇၵႃႉၶၢႆ 105 လၵ်း ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇၼၼ်ႉ ပိုတ်ႇပၼ်ၵူၼ်းမိူင်း လတ်းၽၢၼ်ႇၵႂႃႇမႃးလႆႈၶိုၼ်း မိူၼ်ၵဝ်ႇယဝ်ႉ ဝႃႈၼႆ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈၽူႈတွႆႇႁွၵ်ႈဝႃႈ – “ယၢမ်းလဵဝ် ၸွမ်းတၢင်းၶဝ်ႈတၢင်းဢွၵ်ႇဝဵင်း တီႈႁိမ်းဝၢၼ်ႈၼမ်ႉ ၶူမ် ဢၼ်ပဵၼ်သဵၼ်ႈတၢင်းၵႂႃႇၸူး 105 လၵ်းၼၼ်ႉ သိုၵ်းမၢၼ်ႈ ၶိုၼ်းပိုတ်ႇပၼ် ႁႂ်ႈၵူၼ်းမိူင်းၵႂႃႇမႃးၶိုၼ်းယဝ်ႉ။ ၵူၺ်း ၵႃႈ ၶူဝ်းၵုၼ်ႇတႄႉ ဢမ်ႇပႆႇပၼ်တေႃႉတၢင်ႇ။ လိူဝ်ၼၼ်ႉ ၵူၼ်းမိူင်း ဢၼ် လတ်းၽၢၼ်ႇ ၵႂႃႇမႃးၵူႈၵေႃႉ ၺႃးသိုၵ်းမၢၼ်ႈ ထဵတ်ႈထၢမ်ယဝ်ႉ ယင်းလႆႈၼႄပႃး မၢႆၾၢင်ထႅင်ႈဢေႃႈ”-ဝႃႈၼႆ။

လွင်ႈသိုၵ်းမၢၼ်ႈ ပိုတ်ႇပၼ်ၵဵတ်ႉၼႆႉ ပဵၼ်ယွၼ်ႉလွင်ႈပွင်ႇၸႂ်ၽွင်းပီမႂ်ႇၶႄႉလႄႈ ပိုတ်ႇပၼ်ၶိုၼ်းၵေႃႈ ၸၢင်ႈပဵၼ်လႆႈ။ လိူဝ်ၼၼ်ႉ ဢၼ်လတ်းၽၢၼ်ႇၵႂႃႇမႃး ပေႃးပဵၼ်ရူတ်ႉၶိူင်ႈ ၼိုင်ႈလမ်းၼႆႉ လႆႈပၼ်ငိုၼ်း 5 ႁဵင်၊ ရူတ်ႉၵႃးဢွၼ်ႇသမ်ႉ 1 မိုၼ်ႇ 2 မိုၼ်ႇ။ ရူတ်ႉၵႃးလူင်လႄႈ ရူတ်ႉဢၼ်ၵႂႃႇမႃးၸွမ်း ဝဵင်းလိူဝ်ႇ ၸိူဝ်းၼႆႉတႄႉ ယင်းပႆႇၸၢင်ႈလတ်းၽၢၼ်ႇၵႂႃႇမႃး – ၵူၼ်းႁေႃႈရူတ်ႉၵႃး ၵေႃႉၼိုင်ႈ လၢတ်ႈၼင်ႇၼႆ။

တီႈ 105 လၵ်း ဝဵင်းမူႇၸေႊၼႆႉ ယၢမ်းလဵဝ် ပဵၼ်ၸုမ်းဢူၺ်းလီၵုမ်းၵမ်ဝႆႉ ၸဵမ်မိူဝ်ႈၽႅၼ်ယၼ်ႇသိုၵ်း 1027 ၼၼ်ႉမႃးသေ ၵူၺ်းၵႃႈ တၢင်းဝဵင်းမူႇၸေႊတႄႉ သိုၵ်းမၢၼ်ႈတိုၵ်ႉၵုမ်းၵမ်ဝႆႉ မိူၼ်ၵဝ်ႇ။

မိူဝ်ႈၽႅၼ်ယၼ်ႇသိုၵ်း 1027 ၼၼ်ႉ ၸွမ်းဝဵင်းမူႇၸေႊၼႆႉ လႆႈဝႃႈဢမ်ႇပဵၼ်ပၢင်တိုၵ်းႁၢဝ်ႈႁႅင်း မႃးသေပွၵ်ႈ ဝႃႈၼႆသေတႃႉ ယၢမ်းလဵဝ် ပဵၼ်ဢွင်ႈတီႈသိုၵ်းမၢၼ်ႈၶဝ် မႃးၶွၼ်ႈယူႇၼမ်ဝႆႉ ဝဵင်းၼိုင်ႈ ဝႃႈၼႆ။

တႅမ်ႈ – ၸၢႆးၶႂၢၼ်ၸဵင်