တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းၼၼ်ႉ သိုၵ်းမၢၼ်ႈတႄႇၵဵပ်းသဵၼ်ႈၸိုဝ်ႈ ၼၢင်းယိင်းဢွၼ်ႇ ၼႂ်းပိုၼ်ႉတီႈ – ဝႃႈတႃႇၾိုၵ်းၵၢၼ်သိုၵ်း တႃႇႁၢပ်ႇၵၢၼ်သိုၵ်းၼႆလႄႈ ပေႃႈမႄႈလုၵ်ႈဢွၼ်ႇ ဢွၼ်ၵၼ်မႆႈၸႂ် ႁႃလၢႆးတၢင်း တႃႇဢဝ်လုၵ်ႈလၢင်းၸဝ်ႈၵဝ်ႇငိူင်ႉဝႄႈ။

သိုၵ်းမၢၼ်ႈ တႄႇၵဵပ်းသဵၼ်ႈၸိုဝ်ႈၼၢင်းယိင်းဢွၼ်ႇ တႃႇႁဵတ်းသိုၵ်းၼႆႉ မႃးၸဵမ်မိူဝ်ႈႁူဝ်လိူၼ်ၵျႅၼ်ႊၼိဝ်ႊရီႊ လၢတ်ႈဝႃႈ တေပဵၼ်လွင်ႈၾိုၵ်းသိုၵ်းပၼ် ၼၢင်းယိင်းဢွၼ်ႇၶဝ်ပွၵ်ႈႁႅၵ်ႈ ဝႃႈၼႆ။

မႄႈလုၵ်ႈဢွၼ်ႇယိင်း ၵေႃႉၼိုင်ႈ ဢၼ်ယူႇတီႈဝၢၼ်ႈၽႃမူၼ်း ဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ – “ၶဝ်ပိုၼ် ၽၢဝ်ႇသဵၼ်ႈမၢႆၸိုဝ်ႈသဵင် ၼၢင်းယိင်းဢွၼ်ႇၵူၼ်းၼႂ်းပိုၼ်ႉတီႈ။ ၸိူဝ်းမီးဢႃယုၼႂ်းၵႄႈ 18 ထိုင် 35 ၼၼ်ႉ ႁႂ်ႈဢွၼ် ၵၼ်မႃးလၢႆးငၢၼ်းတူဝ် တႃႇၾိုၵ်းၵၢၼ်သိုၵ်း ဝႃႈၼႆလႄႈ ၸိူဝ်းပဵၼ်ပေႃႈမႄႈ လုၵ်ႈဢွၼ်ႇတႄႉ ဝူၼ်ႉၵႂင်သေ ႁႃတၢင်းဢဝ်လုၵ်ႈလၢင်းၸဝ်ႈၵဝ်ႇ ပၢႆႈဢွၵ်ႇၵႂႃႇဝႆႉတၢင်ႇတီႈ တၢင်ႇတၢင်းၵၼ်ယူႇ” – ဝႃႈၼႆ။

ၵူၼ်းၼုမ်ႇ ၸိူဝ်းထုၵ်ႇတီႉၺွပ်းၵႂႃႇၾိုၵ်းၵၢၼ်သိုၵ်း တင်ႈတႄႇပီ 2024 မႃးၼႆႉ သိုၵ်းမၢၼ်ႈ သူင်ႇၼႃႈသိုၵ်း ၵမ်းသိုဝ်ႈလႄႈ ၵႂႃႇတၢႆၼႃႈသိုၵ်းတင်းၼမ်တင်းလၢႆ။ ၵွပ်ႈၼႆ ပေႃႈမႄႈလုၵ်ႈလၢင်း ဢမ်ႇမီးၵၢင်ၸႂ်ၶႂ်ႈပၼ် ၵႂႃႇၾိုၵ်းၵၢၼ်သိုၵ်း ၸွမ်းသိုၵ်းမၢၼ်ႈသေဢိတ်း ဝႃႈၼႆ။

လွင်ႈၼႆႉ ၼၢင်းယိင်းဢႃယု 20 ပီ ၵူၼ်းမိူင်းဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ – “ပေႃးလႆႈငိၼ်းဝႃႈ ၸိုဝ်ႈၸဝ်ႈ ၵဝ်ႇပႃးမႃးၼႆၵေႃႈ ၸႂ်တၢႆပေႃးၶႂ်ႈဢွၵ်ႇဢေႃႈ။ တေလႆႈၵႂႃႇႁဵတ်းၸွမ်း တဵၼ်ႈၵႃႈၸွမ်း ဢၼ် သိုၵ်းမၢၼ်ႈၸီႉသင်ႇၵုမ်းၵမ်ၼၼ်ႉ 5 ပီၼႆလႄႈ – ၸူဝ်ႈပၢၼ်လူဝ်ႇႁဵၼ်းလိၵ်ႈလၢႆးၼႆႉ ဢမ်ႇလႆႈႁဵၼ်း လိၵ်ႈႁဵၼ်းလၢႆးသင်ယဝ်ႉ။ လီသဵင်ႈၸႂ် ၼႃႇ”- ဝႃႈၼႆ။

ဢၼ်သိုၵ်းမၢၼ်ႈ ၵဵပ်းသိုၵ်းမႂ်ႇပႃးၼၢင်းယိင်းၼႆႉ ပဵၼ်ယွၼ်ႉၵူၼ်းၸၢႆးၼုမ်ႇ ယွမ်းၵႂႃႇၼမ်ၼႃႇယဝ်ႉလႄႈ ၸင်ႇၵဵပ်းပႃးၼၢင်းယိင်း – ၼႆ ပေႃႈမႄႈလုၵ်ႈဢွၼ်ႇ ၵူၼ်းမိူင်းဝဵင်းတူၼ်ႈတီး ၵေႃႉၼိုင်ႈၵေႃႈ လၢတ်ႈၼင်ႇၼႆ။

မိူဝ်ႈဝၼ်းတီႈ 27 လိူၼ်ၵျႅၼ်ႊၼိဝ်ႊရီႊ ယၢမ်းၵၢင်ၼႂ်ၸဝ်ႉ ၼၼ်ႉၵေႃႈ သိုၵ်းမၢၼ်ႈ ၼုင်ႈၶူဝ်းၵူၼ်းႁိူၼ်း သေ ၶဝ်ႈတဝ်ၼႂ်းပွၵ်ႉၼႂ်းဝဵင်း၊ တီႉဢဝ်ၼုမ်ႇၸၢႆး ၵေႃႉၼိုင်ႈ ဢႃယု 27 ပီ – တီႈထႅဝ်ၶၢႆထၢၼ်ႇမီႈ ဢၼ်မီးတီႈသဵၼ်ႈတၢင်းလဵပ်ႈဝဵင်းတၢင်းတူၵ်း ဝဵင်းတူၼ်ႈတီး။ ဝၢႆးၼၼ်ႉ ၽိူဝ်ႇပေႃႈမႄႈ ၵႂႃႇယွၼ်းႁႂ်ႈပွႆႇပၼ်ၶိုၼ်းၼႆႉ သမ်ႉဝႃႈ – တေလႆႈပၼ်ငိုၼ်း 20 သႅၼ်ၵွၼ်ႇၼႆ။ ၵွပ်ႈၼႆလႄႈ ယၢမ်းလဵဝ် တီႈဝဵင်းတူၼ်ႈတီးၼႆႉ ဢမ်ႇမီးလွင်ႈႁူမ်ႇလူမ်ႈသေဢိတ်းယဝ်ႉ – ဝႃႈၼႆ။

ၵွပ်ႈၼႆလႄႈ တီႈဝဵင်းတူၼ်ႈတီးၼႆႉ ၸဵမ်ၵူၼ်းၼုမ်ႇယိင်းလႄႈၸၢႆး ထုၵ်ႇလီၾၢင်ႉလွင်ႈၵႂႃႇမႃး၊ ယၢမ်းၵၢင် ၶမ်ႈၵၢင် ၶိုၼ်း ဢမ်ႇလီဢွၵ်ႇၼွၵ်ႈႁိူၼ်းၵေႃႉလဵဝ်၊ ဢမ်ႇထုၵ်ႇၵႂႃႇတၢင်းၵႆလႃးလႃးၼႆ ပေႃႈမႄႈၵူၼ်းၼုမ်ႇ ဢွၼ်ၵၼ်လၢတ်ႈၼင်ႇၼႆ။

ယၢမ်းလဵဝ် တီႈဝဵင်းတူၼ်ႈတီးၼႆႉ ၶွင်ႇသီႇသိုၵ်းမၢၼ်ႈ ၼုင်ႈၶူဝ်းၵူၼ်းႁိူၼ်းသေ လဵပ်ႈယၢမ်း ပႂ်ႉတူၺ်းၼႂ်း ပွၵ်ႉၼႂ်းဝၢၼ်ႈ။ သၢင်ႇထုၵ်ႇတီႈလႂ်ၵေႃႈ တီႉၺွပ်းၶျေႃးတီႈၼၼ်ႈ ၵူၼ်းမိူင်းဝဵင်းတူၼ်ႈတီး ဢွၼ်ၵၼ် လၢတ်ႈၼင်ႇၼႆ။

တႅမ်ႈ – ၼၢင်းငဝ်းလိူၼ် (ၽူႈသိုဝ်ႇၶၢဝ်ႇၾိုၵ်းၵၢၼ်)