မိူင်းၶႄႇ မိူင်းမၢၼ်ႈ မိူင်းလၢဝ်းတင်း မိူင်းထႆး တေႁူမ်ႈၵၼ်သေ ပႂ်ႉယၢမ်းဢဝ်ႁူမ်ႇလူမ်ႈ ၼႂ်းမႄႈၼမ်ႉၶူင် ဝႃႈၼႆ။

သိုဝ်ႇၶၢဝ်ႇၼႂ်းပိုၼ်ႉတီႈႁၢႆးငၢၼ်းဝႆႉဝႃႈ – ဢၼ်သီႇၸိုင်ႈမိူင်း တေႁူမ်ႈၵၼ် ပႂ်ႉယၢမ်းဢဝ်ႁူမ်ႇလူမ်ႈ ပိူဝ်ႈတႃႇတိုၵ်းတေႃး ၽဵဝ်ႈမူၺ်ႉၵၢၼ်တေႃႉသူင်ႇၵႃႉၶၢႆယႃႈမဝ်းၵမ်၊ ၵၢၼ်လၵ်ႉလွမ်ႉၶဝ်ႈမိူင်း ၸွမ်းလႅၼ်လိၼ် ၸွမ်းသဵၼ်ႈတၢင်းၼမ်ႉ ၸိူဝ်းၼႆႉ – ဝႃႈၼႆ။

လွင်ႈၼႆႉ လႆႈဢုပ်ႇၵၼ်ၵႂႃႇ ၽွင်းၽူႈမီးၸၼ်ႉသုင် သီႇၸိုင်ႈမိူင်း ႁူပ်ႉထူပ်းဢုပ်ႇဢူဝ်းၵၼ် ပူၼ်ႉမႃး ၼႂ်းဝၼ်းတီႈ 22/1/2025 ၼႆႉ။ ၵဵဝ်ႇလူၺ်ႈ လွင်ႈႁူမ်ႇလူမ်ႈၸွမ်းလႅၼ်လိၼ် ၸိူဝ်းၼႆႉၵေႃႈ တေပိၼ်ႇလႅၵ်ႈလၢႆႈၶေႃႈမုလ်း ၵမ်းလိုၼ်းသုတ်းပၼ်ၵၼ်ၵႂႃႇ – ၼႆယဝ်ႉ။

ဢၼ်တေႁူမ်ႈၵၼ် ဢဝ်ႁူမ်ႇလူမ်ႈ ၼႂ်းမႄႈၼမ်ႉၶူင် ပွၵ်ႈၼႆႉ ပဵၼ်ၵမ်းထူၼ်ႈ 149 ။ တေတႄႇၵႂႃႇ ဝၼ်းလႂ်ၼႆ ၼၼ်ႉတႄႉ ဢမ်ႇလၢတ်ႈဝႆႉတႅတ်ႈတေႃး။ လွင်ႈဢဝ်ႁူမ်ႇလူမ်ႈ ၵမ်းထူၼ်ႈ 148 တႄႉ ၸတ်းႁဵတ်းၵႂႃႇၼႂ်းလိူၼ်တီႊသႅမ်ႊပိူဝ်ႊ ပီ 2024 ၼႂ်း ပိုၼ်ႉတီႈသၢမ်ၸဵင်ႇၶမ်း။

မိူဝ်ႈၽွင်းၼၼ်ႉ မီးဢဵၼ်ႁႅင်းၵူၼ်း 200 ၵေႃႉ၊ ႁိူဝ်းသိုၵ်း 9 လမ်း လုၵ်ႉတီႈၸႄႈတွၼ်ႈယူႊၼၢၼ်ႊ မိူင်းၶႄႇ တႄႇပၼ်ႇဢဝ်ႁူမ်ႇလူမ်ႈ မႃးၸွမ်း သၢႆၼမ်ႉမႄႈၶူင် တေႃႇထိုင်မိူင်းလၢဝ်း ႁိုင်ၶၢဝ်းတၢင်း 3 ဝၼ်း – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။