ဝဵင်းလႃႈသဵဝ်ႈၼႆႉ ၵွၼ်ႇၸွမ်ၸိၵ်းသိုၵ်းမၢၼ်ႈမိၼ်းဢွင်ႇလၢႆႇ ပႆႇယိုတ်းမိူင်းၼၼ်ႉ ပဵၼ်ဝဵင်းဢၼ် ၵူၼ်းၵိုၼ်းငိုၼ်း ၶွၼ်ႈ ၵႃႉငၢႆႈၶၢႆထုၵ်ႇ။ ဝၢႆးၽႅၼ်ယၼ်ႇသိုၵ်း 1027 မႃးၼႆႉ လႆႈထုၵ်ႇၵူၼ်ႇပင်းလူႉလႅဝ် တူၵ်းယူႇတႂ်ႈမိုဝ်း သိုၵ်းၵဝ်ႈၵၢင်ႉ MNDAA ၵုမ်းၵမ်မႃး ႁၢၼ်ႉတေႃႇထိုင်ယၢမ်းလဵဝ်။

ၵွပ်ႈၼႆလႄႈ သိုၵ်းမၢၼ်ႈ ၶိုင်ၵူႈလၢႆး တႃႇတေလႆႈၶိုၼ်းဝဵင်းလူင်လႃႈသဵဝ်ႈၼႆႉ ယွၼ်ႉၼၼ် တႃႇၵူၼ်းမိူင်းလႃႈသဵဝ်ႈ တေလႆႈလွင်ႈၵတ်းယဵၼ်ၼိမ်တဵင်ႈၼၼ်ႉ ပႆႇၸၢင်ႈလၢမ်းၶၢတ်ႈလႆႈ။

ၵွၼ်ႇၼႃႇ ၽႅၼ်ယၼ်ႇသိုၵ်း 1027 ပႆႇတႄႇၼၼ်ႉ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇၼႆႉ သိုၵ်းမၢၼ်ႈ တိုၵ်ႉထၢင်ႇႁၢင်ႈၽွင်းငမ်းဝႆႉ ပႆႇမီးလွင်ႈၵိတ်ႇၶွင်ႈသင်။ မိူၼ်ၼင်ႇ ၾၢႆႇၼႃႈႁူင်းႁေႃး ဝဵင်းလႃႈသဵဝ်ႈ (လားရှိုးမြို့တော်ခန်းမ) ၼၼ်ႉၵေႃႈ မိူဝ်ႈဢွၼ်တၢင်းလႆႈႁၼ် ပၢႆႉလိၵ်ႈဢၼ်တႅမ်ႈဝႆႉဝႃႈ “စည်းလုံးညီညွတ်ခြင်းသည် အင်အား” ၽွမ်ႉၵၼ်ၸင်ႇပဵၼ် ႁႅင်းယႂ်ႇ ၼႆၼၼ်ႉၵူၺ်း။

ဝၢႆးသိုၵ်းၵဝ်ႈၵၢင်ႉ MNDAA ယိုတ်းၵုမ်းလႆႈယဝ်ႉတႄႉ ႁၢင်ႈၾၢင်ဢၼ်ယၢမ်ႈႁၼ်မႃး ၸိူဝ်းၼၼ်ႉ မီးလွင်ႈလႅၵ်ႈလၢႆႈမႃး။ သင်ဝႃႈ ႁွတ်ႈထိုင်ဝဵင်းလႃႈသဵဝ်ႈယၢမ်းလဵဝ်ၸိုင် တၢင်းၼႃႈႁူင်းႁေႃးလူင် (လားရှိုး မြို့တော်ခန်းမ) ၼၼ်ႉ တေလႆႈႁၼ်တုင်းသီသွမ်ႇလႄႈ သီႇလႅင် ဢၼ်ၼႂ်းၵၢင်မၼ်းမီး ႁူၺ်ႇလၢဝ်သီ ၶၢဝ်ဝႆႉ 3 လုၵ်ႈ။ ဢၼ်ပၵ်းတုင်းဝႆႉၼႆႉ ပွင်ႇဝႃႈ သိုၵ်းၵဝ်ႈၵၢင်ႉ တႄႇပၼ်ႇၵၢၼ် ၽွင်းငမ်းဝဵင်းလႃႈ သဵဝ်ႈယဝ်ႉ။

တႃႇၼႄၵၢၼ်ၽွင်းငမ်းၼၼ်ႉ သိုၵ်းၵဝ်ႈၵၢင်ႉၶဝ် ဢွၼ်ၵၼ်ပၵ်းတုင်းသိုၵ်းၶဝ် ပေႃးၶႂ်ႈၸွတ်ႈလႃႈသဵဝ်ႈယဝ်ႉ။ ၶဝ်တႄႇႁဵတ်းမႃးၸဵမ်မိူဝ်ႈ လိူၼ်ဢေႃႊၵတ်ႊသ် 2024 မီးမႃးၶၢဝ်းတၢင်း 6 လိူၼ်ပၢႆ။

မိူဝ်ႈဢွၼ်တၢင်း ႁၼ်ပၢႆႉဢၼ်ႁွင်ႈၵၢၼ် ၾၢႆႇသိုၵ်းမၢၼ်ႈ ပူၵ်းတင်ႈဝႆႉၸိူဝ်းၼၼ်ႉၵူၺ်းသေတႃႉ ယၢမ်းလဵဝ် သိုၵ်းၵဝ်ႈၵၢင်ႉ ပူၵ်းပၢႆႉသီလႅင်သေ တႅမ်ႈလိၵ်ႈၾၢႆႇၶႄႇလႄႈ ၾၢႆႇမၢၼ်ႈ။ လိူဝ်ၼၼ်ႉ လႆႈႁၼ် ၾၢႆႇႁူမ်ႇလူမ်ႈၸိူဝ်းၼုင်ႈသိူဝ်ႈၶူဝ်း ဢၼ်ပႃးမိၵ်ႈသိုၵ်း MNDAA ၸိူဝ်းၼၼ်ႉ မႅၵ်ႇၵွင်ႈသေ ပႂ်ႉဢဝ်လွင်ႈႁူမ်ႇလူမ်ႈၸွမ်းပွၵ်ႉၸွမ်းယွမ်ႇ။

သိုၵ်းၵဝ်ႈၵၢင်ႉ မႃးၽွင်းငမ်းလႃႈသဵဝ်ႈၸိူင်ႉၼႆလႄႈ သိုၵ်းမၢၼ်ႈ ဢမ်ႇႁၢၼ်ႉၸႂ်။ ယွၼ်ႉဝႃႈ လႃႈသဵဝ်ႈၼႆႉ ပဵၼ်ဢွင်ႈတီႈဢၼ်မီးဝႆႉ တိူင်းသိုၵ်းၸဵင်ႇႁွင်ႇဝၼ်းဢွၵ်ႇ ၶွင်သိုၵ်းမၢၼ်ႈ ဢၼ်ၶဝ်ယုမ်ႇဝႃႈ မၼ်းပဵၼ်ဝဵင်းဢၼ်ၶဝ်မီးဢဵၼ်ႁႅင်းယႂ်ႇ။ ယွၼ်ႉလႆႈၵိုင်ႉၵၢင်ႉတူၵ်းသုမ်းၵႂႃႇလႄႈ ပဵၼ်ပိုၼ်းဢၼ်ႁၢႆႉၸႃႉ တႃႇသိုၵ်းမၢၼ်ႈယဝ်ႉၼႆ ဢူးတၢၼ်းၸူဝ်းၼၢႆႇ ၽူႈလဵပ်ႈႁဵၼ်းၵၢၼ်မိူင်း ၵၢၼ်သိုၵ်း ၵေႃႉၼိုင်ႈ လၢတ်ႈ ၼႄဝႆႉၼင်ႇၼႆ –

“လွင်ႈၶဝ်တူၵ်းသုမ်းတီႈလႃႈသဵဝ်ႈၼႆႉ လႆႈဝႃႈပဵၼ်ပိုၼ်းႁၢႆႉ တႃႇၶဝ်ယဝ်ႉသိုၵ်းမၢၼ်ႈၼႆႉ။ တႃႇတေလႆႈ ၶိုၼ်းဝဵင်း ဢၼ်ၶဝ်သုမ်းၵႂႃႇၼႆႉ ၶဝ်ၵေႃႈ လႆႈၶဝ်ႈႁႃမိူင်းၶႄႇ။ ႁႂ်ႈမိူင်းၶႄႇ ငူပ်ႉငီႉပၼ်ၶဝ်။ သိုၵ်းမၢၼ်ႈ ၶဝ်ႁႃလွၵ်းလၢႆးယွၼ်း ၶိုၼ်းယူႇ တႃႇလႆႈလႃႈသဵဝ်ႈၶိုၼ်းၼၼ်ႉ” – ဝႃႈၼႆ။

သိုၵ်းၵဝ်ႈၵၢင်ႉတႄႉ ၸဵမ်မိူဝ်ႈတႄႇၵုမ်းလႆႈလႃႈသဵဝ်ႈသေ ၶိုင်ပွင်တႃႇပၼ်ႇၵၢၼ်ၽွင်းငမ်းမႃးတႃႇသေႇ။ ႁွင်ႉဢဝ်ၵူၼ်းမိူင်း ၸွမ်းပွၵ်ႉၸွမ်းယွမ်ႇသေ ၸတ်းပၢင်ႁူပ်ႉထူပ်းဢုပ်ႇဢူဝ်းၵၼ်မႃးၶိူဝ်းယႂ်း။

မိူၼ်ၼင်ႇ ႁူင်းယႃႈလူင် (ကုတင် – ၅၀၀) ဝဵင်းလႃႈသဵဝ်ႈၼၼ်ႉၵေႃႈ သိုၵ်းၵဝ်ႈၵၢင်ႉႁူၺ်းဢဝ် မေႃယႃ ၸိူဝ်းႁဵတ်းဝႆႉ CDM ၸိူဝ်းၼၼ်ႉ မႃးဢဝ်ပုၼ်ႈၽွၼ်းသေ ပိုတ်ႇၶိုၼ်း။ လိူဝ်ၼၼ်ႉ တႃႇတေၸႂ်ႉလႆႈ ၾႆးၾႃႉၶိုၼ်းၼၼ်ႉၵေႃႈ သိုၵ်းၵဝ်ႈၵၢင်ႉၶိုင်ပွင်။ ၼင်ႇႁိုဝ် ၽူႈလၵ်ႉၸၵ်ႉၶုတ်ႈ ပေႃးတေဢမ်ႇမီး ၼၼ်ႉၵေႃႈ ၾၢႆႇႁူမ်ႇလူမ်ႈ ဢၼ်ယူႇတႂ်ႈသိုၵ်းၵဝ်ႈၵၢင်ႉ ဢဝ်ပုၼ်ႈၽွၼ်း ပႂ်ႉလူလွမ်ၼႂ်းပွၵ်ႉၼႂ်းဝၢၼ်ႈ ဝႆႉၼႅၼ်ႈၼႃ – ၼႆ MNDAA ပိုၼ်ၽၢဝ်ႇဝႆႉ မိူဝ်ႈလိူၼ်တီႊသႅမ်ႊပိူဝ်ႊ 2024 ၼၼ်ႉၼင်ႇၼႆ။

ၵူၼ်းႁပ်ႉပုၼ်ႈၽွၼ်း ဢဝ်လွင်ႈႁူမ်ႇလူမ်ႈ ၵေႃႉၼိုင်ႈ လၢတ်ႈၼႄဝႃႈ – “ၼင်ႇႁိုဝ် ၵၢၼ်ဢဝ်လွင်ႈႁူမ်ႇလူမ်ႈ ပေႃးတေ ဢမ်ႇၶၢတ်ႇၼၼ်ႉ ႁဝ်းလႆႈပုတ်ႈၵၼ်ပႂ်ႉၵူႈယၢမ်းဢေႃႈ။ ပိူင်လူင်မၼ်း တႃႇၵူၼ်း မိူင်းတေ မီးလွင်ႈႁူမ်ႇလူမ်ႈ။ ယဝ်ႉ ၵေႃႈ တႃႇၵူၼ်းလၵ်ႉၵူၼ်းၸူၼ် တေဢမ်ႇမီးၼၼ်ႉ လႆႈပႂ်ႉလူလွမ် ပၼ်ၵူႈဝၼ်း”- ဝႃႈၼႆ။  

သင်ဝႃႈ တီႉလႆႈၽူႈလၵ်ႉၸၵ်ႉၶုတ်ႈ ၼႂ်းပွၵ်ႉၼႂ်းယွမ်ႇလႄႈသင် တီႉလႆႈပႃးၵူၼ်းသူင်ႇၶၢဝ်ႇ သိုၵ်းမၢၼ်ႈ ၸိူဝ်းၼႆႉၸိုင် ၾၢႆႇႁူမ်ႇလူမ်ႈ မွပ်ႈပၼ်သိုၵ်းၵဝ်ႈၵၢင်ႉၵမ်းသိုဝ်ႈသေ ပၼ်တူတ်ႈတၢမ်ႇၼင်ႇပိူင်မီးဝႆႉၼႆ ၵူၼ်းႁပ်ႉပုၼ်ႈၽွၼ်း ဢဝ်လွင်ႈႁူမ်ႇလူမ်ႈသိုပ်ႇလၢတ်ႈ။

ယၢမ်းလဵဝ် ဝဵင်းလႃႈသဵဝ်ႈၼႆႉ ၼင်ႇႁိုဝ် လႅင်းဢိၼ်ႊထိူဝ်ႊၼႅတ်ႊ တေၸၢင်ႈၸႂ်ႉလႆႈ 24 ၸူဝ်ႈမူင်း ၼၼ်ႉၵေႃႈ ၾၢႆႇသိုၵ်းၵဝ်ႈၵၢင်ႉ ဝၢင်းၶၢႆပၼ်သိမ်ႊၾူၼ်းဝႆႉၶေႃၶေႃ။ လိူဝ်ၼၼ်ႉ ၽွင်းၺႃးတတ်းလႅင်း ၾူၼ်းၼၼ်ႉၵေႃႈ ၼင်ႇႁိုဝ် တေ ဢမ်ႇၶၢတ်ႇလွင်ႈၵပ်းသိုပ်ႇ သိုၵ်းၵဝ်ႈၵၢင်ႉ ၵႅမ်ဝႆႉပႃးၶိူင်ႈ Star Link ဝႆႉၶႅမ်ႉလႅပ်ႈ။

ၵူၼ်းပၢႆႈၽေး ၵမ်ႈၼမ်ၵေႃႈ ယွၼ်ႉတူၵ်းၵိၼ်းလၢႆလွင်ႈလႄႈ သဵင်ၵွင်ႈယဵၼ်ၵႅပ်ႉၼိုင်ႈၵူၺ်းၵေႃႈ ႁႃလၢႆးတၢင်းပွၵ်ႈ ၶိုၼ်းလႃႈသဵဝ်ႈ။ ယၢမ်းလဵဝ် ၸိူဝ်းမိူဝ်းပိုတ်ႇႁၢၼ်ႉတၢင်းၶၢႆသေ ႁဵတ်းၵၢၼ်ႁႃ ၵိၼ်လဵင်ႉတွင်ႉၶိုၼ်းၵေႃႈမီး။

ႁူဝ်ပီ 2024 ၼႆႉ ၶွမ်ႊပၼီႊၾႆးၾႃႉ ဢၼ်ယူႇတႂ်ႈသိုၵ်းၵဝ်ႈၵၢင်ႉ ၸႅၵ်ႇပၼ်ၾႆးၾႃႉ ၵူၼ်းမိူင်း ပဵၼ်ပွၵ်ႉပဵၼ်ယွမ်ႇ ယဝ်ႉသေတႃႉ လွင်ႈလူင်း ၵဵပ်းၵႃႈမီႊတိူဝ်ႊၾႆးတႄႉ ပႆႇမီး။ တႃႇၸတ်းပွင် လွင်ႈမူတ်း သႂ်ပိုၼ်ႉတီႈၼၼ်ႉၵေႃႈ ၶွမ်ႊပၼီႊ ၾၢႆႇလိူမ်ႈလႆႇ ဢၼ်ယူႇတႂ်ႈသိုၵ်းၵဝ်ႈၵၢင်ႉ ဢဝ်ပုၼ်ႈၽွၼ်းသေ ပၼ်ႇၵၢၼ်ဝႆႉ။ ၼိုင်ႈႁိူၼ်းလႂ် လႆႈပၼ်ၵႃႈၵဵပ်းယုၵ်းယၢၵ်း တႅမ်ႇသုတ်း 3,000 ပျႃး။ ဢိင်ၼိူဝ် သႅၼ်းယုၵ်းယၢၵ်းၼၼ်ႉသေ ၵႃႈမၼ်းပိူင်ႈၵၼ်ၼႆ ၼၢင်းယိင်း ၵူၼ်းလႃႈသဵဝ်ႈ ၵေႃႉၼိုင်ႈလၢတ်ႈ။

ၵႃးတၢင်ႇယုၵ်းယၢၵ်းၼႆႉ 2 ဝၼ်း 3 ဝၼ်းလႂ် ၼိုင်ႈပွၵ်ႈ လူင်းပိုၼ်ႉတီႈသေၵဵပ်း။ သင်ပဵၼ်ႁၢၼ်ႉၶၢႆၵုၼ်ႇ ၼိုင်ႈႁၢၼ်ႉလႂ် လႆႈပၼ် 6,000 ပျႃး။ သင်ပဵၼ်ႁိူၼ်း ၼိုင်ႈလင်လႂ် လႆႈပၼ် 3,000 ပျႃး။ ၵူၼ်း ႁဵတ်းၵၢၼ်ၵေႃႈ သိုၵ်းၵဝ်ႈၵၢင်ႉ ၶိုၼ်းၸၢင်ႈ ၵူၼ်းပိုၼ်ႉတီႈ ၸတ်းပွင်ၵႂႃႇၵူၺ်း ဝႃႈၼႆ။

သိုၵ်းၵဝ်ႈၵၢင်ႉ ပႂ်ႉၸွမ်းတၢင်းၶဝ်ႈဢွၵ်ႇဝဵင်းသေ ၵဵပ်းၶွၼ်ႇရူတ်ႉၵႃး ၼိုင်ႈလမ်းလႂ် 1,000 ပျႃး။ သင်ပဵၼ်ၵႃးတၢင်ႇ ၵုၼ်ႇၸိုင် တူၺ်းသႅၼ်းၵုၼ်ႇမၼ်းသေ ၵဵပ်းဢဝ်ၶွၼ်ႇ ၼိုင်ႈပိူဝ်ႊသႅၼ်ႊ ၶွင်ၵႃႈၶၼ်ၵုၼ်ႇ။

ပေႃးမီးၵႃး ရူတ်ႉၶိူင်ႈဢမ်ႇမီးဝႂ် ၸိူဝ်းၼၼ်ႉလတ်းၵႂႃႇမႃးၼႆၸိုင် သိုၵ်းၵဝ်ႈၵၢင်ႉ ဢွၵ်ႇပၼ်ဝႂ်ၸူဝ်ႈၶၢဝ်းသေ ၸိူဝ်းပႆႇမႃးလူင်းသဵၼ်ႈမၢႆ ရူတ်ႉၵႃး ၸိူဝ်းၼၼ်ႉၵေႃႈ လူင်းၵဵပ်း ထိုင်ႁိူၼ်းယေးၼႆ ၸဝ်ႈၵႃး ၵေႃႉၼိုင်ႈ လၢတ်ႈၼင်ႇၼႆ။

တႃႇတေဢွၵ်ႇပၼ်ဝႂ်ရူတ်ႉၵႃးၸူဝ်ႈၶၢဝ်းၼၼ်ႉ သိုၵ်းၵဝ်ႈၵၢင်ႉ ပၵ်းလုမ်းၼႂ်းပွၵ်ႉ 3 ၊ 8 ၊ 12 လႄႈ ဝၢၼ်ႈႁူဝ်ပိုၵ်ႉ ၸိူဝ်းၼၼ်ႉဝႆႉ။ ရူတ်ႉၼိုင်ႈလမ်းလႂ် လႆႈၸၢႆႇၵႃႈဝႂ် 15,000 ပျႃၼႆ ၾၢႆႇပိုၼ်ၽၢဝ်ႇ ၵဝ်ႈၵၢင်ႉ ႁၢႆးငၢၼ်းဝႆႉမိူဝ်ႈဝၼ်းတီႈ 4/1/2025 ပူၼ်ႉမႃးၼႆႉ ၼင်ႇၼႆ။

ၽွၼ်းလီဢၼ်ၶဝ်ႁဵတ်းပၼ်ဝႂ်ရူတ်ႉတႄႉ သင်ဝႃႈ ပဵၼ်ၽေးၵိုင်ႉၵၢင်ႉမႃး တေၸၢင်ႈဢဝ်လႆႈ လၵ်း ထၢၼ်မၼ်းငၢႆႈသေ တေၵူတ်ႇထတ်းငၢႆႈ။ ၽွၼ်းၸႃႉတႄႉၵေႃႈ မႅၼ်ႈမိူဝ်ႈ ၵူၼ်းမိူင်းလူဝ်ႇ ဢွၵ်ႇတၢင်း ၵႂႃႇတၢင်း မိူင်းယႆ – တၢင်ႉယၢၼ်းလႄႈ သင်ၵႂႃႇတၢင်း မိူင်းတႆးပွတ်းၸၢၼ်း ၸိူဝ်းၼႆႉတႄႉ ၸၢင်ႈၺႃး သိုၵ်းမၢၼ်ႈ ၶဝ်တီႉၺွပ်းပၼ်တူတ်ႈတၢမ်ႇၼႆ ပဵၼ်ဢၼ်လီမႆႈၸႂ်ဝႆႉ ၵူၼ်းပိုၼ်ႉတီႈလၢတ်ႈ။

ၾၢႆႇၼိုင်ႈၵေႃႈ သိုၵ်းၵဝ်ႈၵၢင်ႉ ႁူၺ်းသူၼ်းၵူၼ်းပိုၼ်ႉတီႈသေ ပၼ်ႇၵၢၼ်ၽွင်းငမ်း ၊ ၾၢႆႇၼိုင်ႈၵေႃႈ သိုၵ်းမၢၼ်ႈသမ်ႉ ဢဝ်မိူင်းၶႄႇယူႇၵၢင်သေ ၶႂ်ႈႁိမ်ဢဝ်ၶိုၼ်းဝဵင်းလႃႈသဵဝ်ႈလႄႈ ႁႂ်ႈၵူၼ်းမိူင်း ပေႃးလႆႈ တၢင်းၵတ်းယဵၼ်ၸႅတ်ႈၸၢင်ႇတႄႉ ပႆႇမီး။

ၾၢႆႇသိုၵ်းၵဝ်ႈၵၢင်ႉတႄႉ ဢဝ်ၶေႃႈဢၢင်ႈဝႃႈ တႃႇႁႂ်ႈလႅၼ်လိၼ်တႆး – ၶႄႇ တေၵတ်းယဵၼ်ၼိမ်တဵင်ႈ၊ တႃႇလူတ်းယွမ်းလႆႈ ပၢင်တိုၵ်းၼႂ်းမိူင်းၼႆသေ ၶႂ်ႈဢဝ်ၵၢၼ်မိူင်းဢုပ်ႇၵုမ်ၵႄႈလိတ်ႈၵႂႃႇၼႆ ၶဝ်ပိုၼ်ၽၢဝ်ႇဝႆႉ မိူဝ်ႈဝၼ်းတီႈ 3/12/2024 ပူၼ်ႉမႃးၼၼ်ႉ ၼင်ႇၼႆ။ ဝၢႆးပိုၼ်ၽၢဝ်ႇဢမ်ႇႁိုင် ၸတ်းပၢင်ၵုမ် ၵၼ်ၵႂႃႇတီႈဝဵင်းၶုၼ်ႊမိင်ႊ မိူင်းၶႄႇ ၵၢင်လိူၼ်တီႊသႅမ်ႊပိူဝ်ႊ 2024 ၼၼ်ႉ ပဵၼ်ပွၵ်ႈၵမ်းၼိုင်ႈ။

ၼႂ်းပၢင်ၵုမ်ပွၵ်ႈၼၼ်ႉ ၾၢႆႇသိုၵ်းမၢၼ်ႈၵေႃႈ တုၵ်းယွၼ်းႁႂ်ႈသိုၵ်းၵဝ်ႈၵၢင်ႉ ထွႆဢွၵ်ႇပၼ်ဝဵင်းလႃႈသဵဝ်ႈ။ ၾၢႆႇသိုၵ်းၵဝ်ႈ ၵၢင်ႉသမ်ႉ ႁႂ်ႈသိုၵ်းမၢၼ်ႈ ၵိုတ်းတိုၵ်းတေႃႇၶဝ်။ ဢမ်ႇၶႂ်ႈႁႂ်ႈသိုၵ်းမၢၼ်ႈ ၸႂ်ႉသၢႆမိၼ်သေ မႃးလေႃႇတိုၵ်း ၼႂ်းဝဵင်းလႃႈသဵဝ်ႈ။ တင်းသွင်ၾၢႆႇဢမ်ႇတူၵ်းလူင်းၵၼ်လႆႈလႄႈ ႁဵတ်းႁႂ်ႈပၢင်ၵုမ်ၼၼ်ႉ ယၢႆႈၵႂႃႇ လႆႈႁူႉၼင်ႇၼႆ။

မိူဝ်ႈဝၼ်းတီႈ 16-17/1/2025 ၼၼ်ႉ ၶႄႇယူႇၵၢင်သေ သိုၵ်းၵဝ်ႈၵၢင်ႉလႄႈ သိုၵ်းမၢၼ်ႈ ႁူပ်ႉဢုပ်ႇၵၼ် တီႈဝဵင်းၶုၼ်ႊမိင်ႊထႅင်ႈ ပွၵ်ႈၵမ်း 2 ။ တင်းသွင်ၾၢႆႇ လႆႈၸႂ်တူၵ်းလူင်းၵၼ် တေၵိုတ်းတိုၵ်းၼႆသေ ထိုင်မႃး ဝၼ်းတီႈ 18/1/2025 ၼႆႉ ၸင်ႇတူၵ်းလူင်းၵိုတ်းတိုၵ်းၵၼ်မႃးယဝ်ႉ ယူႇတီႈ ၽွင်းလူင်ၾၢႆႇၼွၵ်ႈမိူင်း မိူင်းၶႄႇ မၢဝ်ႊၼိင်ႊ လၢတ်ႈၵႂႃႇၼႂ်းပၢင်သပ်း ၸႅင်ႈၶၢဝ်ႇ မိူဝ်ႈဝၼ်းတီႈ 20/1/2025 ၼႆႉၼင်ႇ ၼႆ။

ဝႃႈၼၼ်သေတႃႉ လွင်ႈဝႃႈ သိုၵ်းၵဝ်ႈၵၢင်ႉတင်း သိုၵ်းမၢၼ်ႈ ၵိုတ်းတိုၵ်းၵၼ်ဢၼ်ဝႃႈၼၼ်ႉ ထိုင်ယၢမ်းလဵဝ် တင်းသွင်ၾၢႆႇ ပႆႇမီးလွင်ႈပိုၼ်ၽၢဝ်ႇပဵၼ်တၢင်းၵၢၼ်။

ယူႇတီႈ သိုဝ်ႇၶၢဝ်ႇ Myanmar Now ႁၢႆးငၢႆးဝႆႉ မိူဝ်ႈဝၼ်းတီႈ 20/1/2025 ၼၼ်ႉဝႃႈ -“သိုၵ်းၵဝ်ႈၵၢင်ႉ တေထွႆဢွၵ်ႇလႃႈသဵဝ်ႈ ဝႃႈၼႆသေတႃႉ ၾၢႆႇပူၵ်းပွင်လႃႈသဵဝ်ႈ တႂ်ႈသိုၵ်းၵဝ်ႈၵၢင်ႉတႄႉ ဢမ်ႇယိုၼ် ယၼ်သင်ပၼ်သေဢမ်ႇၵႃး လၢတ်ႈဝႃႈ ပဵၼ်ၶၢဝ်ႇၽၢမ်းၵူၺ်း”- ဝႃႈၼႆ။

ၽူႈထတ်းသၢင် ၵၢၼ်မိူင်း ၵၢၼ်သိုၵ်း မိူင်းတႆးၵေႃႉၼိုင်ႈ လၢတ်ႈၼႄၼင်ႇၼႆ – “ယွၼ်ႉမိူင်းၶႄႇ ပၼ်ႁႅင်းဢီးသေ သိုၵ်းၵဝ်ႈၵၢင်ႉ တေထွႆဢွၵ်ႇၼႆၼၼ်ႉတႄႉ ပဵၼ်ၶေႃႈလီဝူၼ်ႉတႄႉယဝ်ႉ။ ပေႃးဝႃႈ သိုၵ်းၵဝ်ႈၵၢင်ႉထွႆၵေႃႈ မိူၼ်ၼင်ႇ သိုၵ်းပလွင်ႈတဢၢင်း TNLA ဢၼ်ၵုမ်းဝႆႉ တီႈၼွင်ၶဵဝ်၊ သီႇပေႃႉ၊ ၵျွၵ်ႉမႄး ၸိူဝ်းၼၼ်ႉၵေႃႈ ၵႃႈတေလႆႈထွႆဢွၵ်ႇယဝ်ႉ။ ယွၼ်ႉၼၼ် ပႆႇၸၢင်ႈလၢမ်းလႆႈသင်။ ငဝ်းလၢႆးၸိူင်ႉၼႆၼႆႉ ၵူၼ်းမိူင်းတေပႆႇၸၢင်ႈတမ်းၸႂ်သေ ပွၵ်ႈၶိုၼ်းယူႇႁိူၼ်းၽႂ်မၼ်းလႆႈ။ ၵၢၼ်သိုၵ်း တေပဵၼ်သင်မႃး ထႅင်ႈ လူဝ်ႇလႆႈပႂ်ႉတူၺ်းၵူၺ်းယဝ်ႉ”- ဝႃႈၼႆ။

ပေႃးၸူးၸႂ် ၵူၼ်းမိူင်းတႄႉ ၶႂ်ႈႁႂ်ႈဝၢၼ်ႈမိူင်းၸဵဝ်းၵတ်းယဵၼ်ၼိမ်တဵင်ႈသေ ၶႂ်ႈၸတ်းပွင်ၵၢၼ်ႁႃၵိၼ် လဵင်ႉတွင်ႉထၢင်ႇ ႁၢင်ႈ။ ၵူၼ်းမိူင်းၵေႃႉလႂ်ၵေႃႈ ဢိမ်ႇမိူဝ်ႇပၢင်တိုၵ်းသိုၵ်းသိူဝ်ယဝ်ႉလႄႈ  ဢမ်ႇၶႂ်ႈႁႂ်ႈ လိူတ်ႈတူၵ်းယၢင်ဢွၵ်ႇ ဢမ်ႇၶႂ်ႈပၢႆႈၶႂ်ႈ ၼီထႅင်ႈယဝ်ႉ။ ၶႂ်ႈႁႂ်ႈၵူႈၾၢႆႇၾၢႆႇဢုပ်ႇဢူဝ်းငူပ်ႉငီႉၵၼ် ၵႂႃႇလူၺ်ႈတၢင်းၵတ်းယဵၼ်ၵူၺ်းယဝ်ႉၼႆ – ၵူၼ်းပၢႆႈၽေးသိုၵ်း ဝဵင်းလႃႈသဵဝ်ႈၵေႃႉၼိုင်ႈလၢတ်ႈ။