မိူဝ်ႈၼႆႉ ဝၼ်းတီႈ 27/01/2025 ယၢမ်းဝၢႆးဝၼ်း 2:18 မူင်း သိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ်တိုၵ်း Jet Fighter မႃးပွႆႇမၢၵ်ႇသႂ်ႇ ၼႂ်းဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတႅၵ်ႇတိူဝ်ႉသႂ်ႇၵူၼ်းမိူင်းလူႉတၢႆ 1 ၵေႃႉ မၢတ်ႇၸဵပ်း 2 ၵေႃႉ ။
ၼၢင်းယိင်း ၵူၼ်းၵျွၵ်ႉမႄး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ သိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇ မႃးတူၵ်းတီႈၵၢတ်ႇၵၢင်ၶမ်ႈ ႁိမ်းလုမ်းၽူႈၵွၼ်းၸႄႈတွၼ်ႈၵျွၵ်ႉမႄး ၸၢၵ်ႇမၢၵ်ႇတႅၵ်ႇတိူဝ်ႉသႂ်ႇ ႁိူၼ်းယေး ၵူၼ်းမိူင်းလူႉၵွႆတင်းၼမ် ယဝ်ႉၵေႃႈ တိူဝ်ႉၺႃး ၵူၼ်းၸၢႆးၵေႃႉၼိုင်ႈ လူႉတၢႆထင်တီႈ၊ တိူဝ်ႉၺႃး ထႅင်ႈၼၢင်းယိင်း 2 ၵေႃႉ လႆႈမၢတ်ႇၸဵပ်းဢေႃႈ”- ဝႃႈၼႆ။
မၢၵ်ႇၶိူင်ႈမိၼ် သိုၵ်းမၢၼ်ႈ ဢၼ်မႃးတူၵ်းသႂ်ႇၼၼ်ႉသမ်ႉ ၸၢၵ်ႇမၢၵ်ႇတိူဝ်ႉပႃးႁူင်းသဝ်းမျႃႉမႃႇလႃႇ (မြမာလာ) မိူဝ်ႈၽွင်းၼၼ်ႉ မႅၼ်ႈၽွင်းၵူၼ်းမိူင်း တိုၵ်ႉၵႂႃႇပိုတ်ႇၵၢတ်ႇလႄႈ ဢွၼ်ၵၼ်တူၵ်းၸႂ်လႅၼ်ႈပၢႆႈ တင်းၼမ် ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 24/1/2025 ယၢမ်းဝၢႆးဝၼ်း 1 မူင်းၶိုင်ႈ သိုၵ်းမၢၼ်ႈ ဢဝ်ၶိူင်ႈမိၼ် Jet fighter မႃးပွႆႇမၢၵ်ႇ 4 လုၵ်ႈ တီႈႁူင်းယႃႇလူင် ဝဵင်းၵျွၵ်ႉမႄး ၸၢၵ်ႇမၢၵ်ႇတိူဝ်ႉသႂ်ႇ မေႃယႃ CDM 1 ၵေႃႉလႄႈ ၵူၼ်းမိူင်း ဢၼ်မႃးယူတ်းယႃတူဝ်ဝႆႉ 1 ၵေႃႉ လႆႈလူႉတၢႆၵႂႃႇ။ ယဝ်ႉၵေႃႈ မၢတ်ႇၸဵပ်းၸွမ်းထႅင်ႈ 20 ၵေႃႉ – ယူႇတီႈ ႁွင်ႈၵၢၼ် ပိုၼ်ၽၢဝ်ႇတပ်ႉသိုၵ်းတဢၢင်း TNLA ဢွၵ်ႇဝႆႉၼင်ႇၼႆ။
တီႈဝဵင်းၵျွၵ်ႉမႄးၼႆႉ သိုၵ်းမၢၼ်ႈလႄႈ သိုၵ်းတဢၢင်း တႄႇပိုတ်းယိုဝ်းၵၼ် ၶိုၼ်းႁၢဝ်ႈႁႅင်း မိူဝ်ႈႁၢင်လိူၼ်ၵျုၼ်ႊ ပီ 2024 ၼၼ်ႉမႃး။ ၵူၼ်းပိုၼ်ႉတီႈ ဢွၼ်ၵၼ် ပၢႆႈၵႂႃႇတၢင်းဢိူင်ႇၼွင်ပိင်လႄႈ တၢင်ႇၸႄႈဝဵင်း မိူၼ်ၼင်ႇ တၢင်းဝဵင်းတူၼ်ႈတီး၊ ပၢင်ႇဢူႈလႄႈ ဝဵင်းလိူဝ်ႇ ၸိူဝ်းၼၼ်ႉထႅင်ႈ တင်းၼမ်။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ