မိူင်းထႆး ပၼ်ၾၢင်ႉ ထိုင်ႁႅင်းၵၢၼ်ၼွၵ်ႈမိူင်း ဢိၵ်ႇပႃးႁႅင်းၵၢၼ်မိူင်းမၢၼ်ႈ ႁႂ်ႈတေႃႇဢႃယုဝတ်းဝႂ် ၵၼ်ၶိုတ်းတၼ်းၶၢဝ်းယၢမ်း ဝႃႈၼႆ။

ဝၼ်းတီႈ 22/1/2025 ၼႆႉ ႁွင်ႈၵၢၼ် ၽွင်းလူင်ၾၢႆႇၵူၼ်းႁဵတ်းၵၢၼ် မိူင်းထႆး ပၼ်ၾၢင်ႉ ႁႅင်းၵၢၼ်ယၢၼ်မိူင်း မိူင်းမၢၼ်ႈ ဢိၵ်ႇထႅင်ႈ ႁႅင်းၵၢၼ်တၢင်ႇၸိုင်ႈမိူင်း ၸိူဝ်းဢႃယုဝႂ်ႁဵတ်းၵၢၼ်တေမူတ်း ၼႂ်းဝၼ်းတီႈ 13 လိူၼ်ၼႃႈၼႆႉ ႁႂ်ႈ ဢွၼ်ၵၼ်ၵႂႃႇတေႃႇ ၶိုတ်းတၼ်းၸွမ်းၶၢဝ်းယၢမ်း – ဝႃႈၼႆ။

ၼႂ်းၶၢဝ်းယၢမ်း တေႃႇပၼ်ဢႃယုဝႂ်ႁဵတ်းၵၢၼ်ၼၼ်ႉ တေတိူဝ်းပၼ်ၶႂၢင်ႉယူႇသဝ်း ၼႂ်းမိူင်းထႆးၵႂႃႇထႅင်ႈ 6 လိူၼ် တႄႇဢဝ်ဝၼ်းတီႈ 13/2/2025  တေႃႇထိုင် ဝၼ်းတီႈ 13/8/2025 ၼႆ – လူင်ပွင်ၸိုင်ႈထႆး ပိုၼ်ၽၢဝ်ႇ ဝႆႉၼင်ႇၼႆ။

ၵႃႈၸႂ်ႉၸၢႆႇ ဢၼ်တေလႆႈသဵင်ႈ ၽွင်းယၢမ်းသႂ်ႇသဵၼ်ႈၸိုဝ်ႈ တႃႇတေႃႇဝႂ်ႁဵတ်းၵၢၼ်ၼၼ်ႉ ႁႅင်းၵၢၼ် (ၵူၼ်းႁဵတ်း ၵၢၼ်) တင်း ၸဝ်ႈၵၢၼ် တေလႆႈၸၢႆႇ ၵေႃႉၶိုင်ႈ။ ႁႅင်းၵၢၼ် ၼိုင်ႈၵေႃႉလႂ်  တေလႆႈသဵင်ႈ 7,000 ဝၢတ်ႇ – ဝႃႈၼႆ။

ၸဝ်ႈၵၢၼ် ၸိူဝ်းၸၢင်ႈႁႅင်းၵၢၼ်ၼွၵ်ႈမိူင်းဝႆႉသေ  ဢမ်ႇတေႃႇဢႃယုဝႂ်ႁဵတ်းၵၢၼ်ပၼ် ၵူၼ်းႁဵတ်းၵၢၼ် ႁႂ်ႈၶိုတ်းတၼ်းၸွမ်းၶၢဝ်းယၢမ်းၸိုင် တေယဵၼ်းပဵၼ်ႁႅင်းၵၢၼ် ဢမ်ႇၶဝ်ႈတၢင်းၵၢၼ်ၵႂႃႇၼႆ ပၼ်ၾၢင်ႉပႃးဝႆႉ ၼင်ႇၼႆ။

ၸွမ်းၼင်ႇ ၶေႃႈမုလ်းတီႈၸုမ်းၸွႆႈထႅမ်ႁႅင်းၵၢၼ်ၶဝ်သေ ႁႅင်းၵၢၼ်မိူင်ႈမၢၼ်ႈ ၼႂ်းမိူင်းထႆးမီး 7 လၢၼ်ႉပၢႆ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။