သိုၵ်းၶၢင် KIA ႁႅၼ်းသိုၵ်း လေႃႇတိုၵ်းတပ်ႉသိုၵ်းမၢၼ်ႈ ယိုတ်းမိူင်းမႃးႁၢဝ်ႈႁႅင်း တီႈဝဵင်းမၢၼ်ႈမေႃႇ ၾၢႆႇသိုၵ်းမၢၼ်ႈ ဢဝ်ၶိူင်ႈမိၼ်ပွႆႇမၢၵ်ႇယိုဝ်းၸွႆႈၶိူဝ်းယႂ်း တိူဝ်ႉသႂ်ႇႁိူၼ်းယေးၵူၼ်းမိူင်းလူႉၵွႆၼမ်။

တႄႇဢဝ် ဝၼ်းတီႈ 23/01/2025 ယၢမ်းၵၢင်ၶမ်ႈမွၵ်ႈ 8 မူင်း တေႃႇထိုင်မိူဝ်ႈၼႆႉ ဝၼ်းတီႈ 24 ယၢမ်းၵၢင်ၼႂ်ၸဝ်ႉ 6 မူင်း သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇ တီႈဝဵင်းမၢၼ်ႈမေႃႇ ၸႄႈမိူင်းၶၢင် ႁၢဝ်ႈႁႅင်း ယၢမ်းလဵဝ် တီႈဝဵင်းမၢၼ်ႈမေႃႇ ၼႆႉ သိုၵ်းၶၢင် ယိုတ်းၵုမ်းလႆႈဝႆႉ ၵမ်ႈၼမ်ယဝ်ႉ ဝႃႈၼႆ။

ၽူႈတူင်ႉၼိုင်ႈ ၵၢၼ်သိုၵ်း တီႈဝဵင်းမၢၼ်ႈမေႃႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပူၼ်ႉမႃးလၢႆဝၼ်းၼႆႉ ပၢင်တိုၵ်းတႄႉ ယဵၼ်ဝႆႉဢေႃႈ။ တႄႇမိူဝ်ႈဝႃးမႃး ပၢင်တိုၵ်းတႄႇပဵၼ်ႁႅင်းဢေႃႈ။ ၾၢႆႇသိုၵ်းမၢၼ်ႈ ဢဝ်ၶိူင်ႈမိၼ် မႃးပွႆႇမၢၵ်ႇယိုဝ်းၸွႆႈ ဢမ်ႇထၢတ်ႇ။ ၼႂ်းဝဵင်းၵေႃႈ မီးလွင်ႈၾႆးမႆႈႁိူၼ်းယေးၵမ်ႈၼမ်ဢေႃႈ။ တေလႆႈဝႃႈ ပၢင်တိုၵ်းပဵၼ်ႁႅင်းၶႃႈယဝ်ႉ”- ဝႃႈၼႆ။

ၼႂ်းဝဵင်းမၢၼ်ႈမေႃႇၼႆႉ သိုၵ်းၶၢင် KIA ယိုတ်းၵုမ်းလႆႈဝႆႉယဝ်ႉ ယၢမ်းလဵဝ် တိုၵ်ႉၵိုတ်းတပ်ႉသိုၵ်းမၢၼ်ႈ ၸၵ ၶ 21 ၼၼ်ႉၵူၺ်း ၵွပ်ႈၼႆလႄႈ တၢင်းၾၢႆႇသိုၵ်းမၢၼ်ႈၶဝ် ဢဝ်ၶိူင်ႈမိၼ်မႃးပွႆႇမၢၵ်ႇယိုဝ်းၸွႆႈ ႁၢဝ်ႈႁႅင်း ၼႆယဝ်ႉ။

“ပူၼ်ႉမႃး 3-4 ဝၼ်းၼႆႉ လႆႈႁၼ်သိုၵ်းမၢၼ်ႈၶဝ် ဢဝ်ၶိူင်ႈမိၼ်မႃးတေႃႉဢွၵ်ႇၵႂႃႇ ၵူၼ်းမၢတ်ႇၸဵပ်း ၽူႈမီးၸၼ်ႉၶဝ် 15 ၵေႃႉ။ တူဝ်တၢႆ 10 ၵေႃႉ။ ၼႂ်းၼၼ်ႉ ပႃးၽူႈမီးၸၼ်ႉသုင်ၶဝ် ၵေႃႉၼိုင်ႈ။ ယဝ်ႉၵေႃႈ ယွၼ်ႉငဝ်းလၢႆး ပၢင်တိုၵ်းလႅပ်ႈတေဢမ်ႇၶႅမ်ႉယဝ်ႉလႄႈ ၶဝ်ၼႅတ်ႈဢဝ်ၶိူင်ႈမိၼ်မႃးတေႃႉၵူၼ်းၶဝ် ဢွၵ်ႇၼႂ်းပိုၼ်ႉတီႈၵႂႃႇၶႃႈဢေႃႈ။ ဢမ်ႇႁိုင်သင် တီႈဝဵင်းမၢၼ်ႈမေႃႇၼႆႉ သိုၵ်းၶၢင် တေလႅပ်ႈၵုမ်းလႆႈမူတ်းယဝ်ႉ”- ၽူႈတူင်ႉၼိုင်ၵၢၼ်သိုၵ်း ၼႂ်းပိုၼ်ႉတီႈ သိုပ်ႇလၢတ်ႈၼႄ ၼင်ႇၼႆ။

ယၢမ်းလဵဝ် ၼႂ်းဝဵင်းမၢၼ်ႈမေႃႇၼႆႉ သိုၵ်းမၢၼ်ႈၶဝ် ၵိုတ်းၶမ်ဝႆႉၼႂ်းပၢင်တိုၵ်းၼမ် ယွၼ်ႉသိုၵ်းၶၢင် ဝႅတ်ႉလွမ်ႉဝႆႉ ၵွပ်ႈၼႆ တၢင်းၾၢႆႇသိုၵ်းမၢၼ်ႈၶဝ် ၸင်ႇၸႂ်ႉၶိူင်ႈမိၼ် မႃးပွႆႇမၢၵ်ႇယိုဝ်းၸွႆႈ ၼႆယဝ်ႉ။

ပူၼ်ႉမႃး မိူဝ်ႈဝၼ်းတီႈ 20 သိုၵ်းမၢၼ်ႈ ယိုဝ်းၵွင်ႈလူင်သႂ်ႇ ၼႂ်းဝဵင်းမၢၼ်ႈမေႃႇမွၵ်ႈ 40 လုၵ်ႈ ထိုင်မႃးဝၼ်းတီႈ 21 သမ်ႉ ဢဝ်ၶိူင်ႈမိၼ်မႃးပွႆႇမၢၵ်ႇသႂ်ႇထႅင်ႈ 4 လုၵ်ႈ ဝႃႈၼႆ။

ၸွမ်းၼင်ႇ ၽႅၼ်ယၼ်ႇသိုၵ်းၶၢင် KIA ႁူမ်ႈတင်း PDF လေႃႇတိုၵ်းတပ်ႉသိုၵ်းမၢၼ်ႈ မႃးႁၢဝ်ႈႁႅင်း တီႈဝဵင်းမၢၼ်ႈမေႃႇတင်း မၢၼ်ႈၸေႊၼႆႉ တင်ႈတႄႇ ဝၼ်းတီႈ 4/12/2024 ၼၼ်ႉမႃးသေ ထိုင်မႃးဝၼ်းတီႈ 8/1/2025 ၸင်ႇယိုတ်းၵုမ်းလႆႈ ဝဵင်းမၢၼ်ႈၸေႊယဝ်ႉ။ ယၢမ်းလဵဝ် တႃႇတေယိုတ်းၵုမ်းလႆႈ ဝဵင်းမၢၼ်ႈမေႃႇ တင်းမူတ်းၼၼ်ႉ တိုၵ်ႉႁႅၼ်းသိုၵ်းလေႃႇတိုၵ်းဝႆႉ ႁၢဝ်ႈႁႅင်းယူႇ ဝႃႈၼႆ။

မိူၼ်ၼင်ႇ တၢင်းၸႄႈဝဵင်းမိတ်ႉၵျီးၼႃး (ၸေႈၼႃး) ၼၼ်ႉၵေႃႈ တႄႇဢဝ် ႁူဝ်လိူၼ်ၵျႅၼ်ႊၼိဝ်ႊရီႊၼႆႉ မႃးသိုၵ်းမၢၼ်ႈ ပိၵ်ႉဢိုတ်းတႃႈႁိူဝ်းလႄႈ သဵၼ်ႈတၢင်းဢၼ်ၵၢႆႉၸူး တၢင်းဝဵင်းၼႆႉဝႆႉ တင်းမူတ်း။ ယဝ်ႉၵေႃႈ လႅင်းၼႅတ်ႇ၊ လႅင်းၾူၼ်း ၸိူဝ်းၼႆႉၵေႃႈ တတ်းၶၢတ်ႇပႅတ်ႈတင်းမူတ်းယဝ်ႉ ဝႃႈၼႆ။