ႁွင်ႈၵၢၼ်ၶၢဝ်ႇ လူင်ပွင်ၸိုင်ႈမိူင်းၶႄႇ ပိုၼ်ၽၢဝ်ႇဝႃႈ – ၽူႈမီးပုၼ်ႈၽွၼ်း မိူင်းၶႄႇ ၊ မိူင်းမၢၼ်ႈ ၊ မိူင်းထႆး ဢုပ်ႇဢူဝ်းတူၵ်းလူင်းလႆႈၸႂ်ၵၼ် တႃႇတေၵႂၢတ်ႇလၢင်ႉ ၵၢၼ်လွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊ ႁႂ်ႈႁၢႆၵႂႃႇ – ဝႃႈၼႆ။

လွင်ႈၼႆႉ လႆႈႁူပ်ႉထူပ်းဢုပ်ႇၵုမ်ၵၼ်ၵႂႃႇ တီႈဝဵင်းၶုၼ်ႊမိင်ႊ မိူင်းၶႄႇ မိူဝ်ႈဝၼ်းတီႈ 21/1/2025 ပူၼ်ႉမႃးၼႆႉ ဝႃႈၼႆ။

ၼႂ်းၶၢဝ်းယၢမ်းလဵဝ်ၵၼ်ၼၼ်ႉၵူၺ်း ၽူႈမီးပုၼ်ႈၽွၼ်းၾၢႆႇ မိူင်းမၢၼ်ႈ ၊ မိူင်းၶႄႇ ၊ မိူင်းလၢဝ်း ၊ မိူင်းၵမ်ႇပူးၶျႃး ၊ မိူင်းထႆးလႄႈ မိူင်းဝႅတ်ႉၼၢမ်း ၶဝ်ၵေႃႈ တူၵ်းလူင်းလႆႈၸႂ်ၵၼ် တႃႇတေတီႉၺွပ်း ႁူဝ်ၼႃႈၸုမ်း ရႃႇၸဝတ်ႈ၊ တႃႇတေၽဵဝ်ႈယႃႉပႅတ်ႈ ဢွင်ႈတီႈႁဵတ်းၵၢၼ်လွၵ်ႇလႅၼ်ငိုၼ်းတၢင်းဢွၼ်ႊလၢႆႊ၊ တႃႇတေၸွႆႈထႅမ် ၵူၼ်းၸိူဝ်းၶမ်ဝႆႉယူႇတီႈၼႂ်း ၵၢၼ်လွၵ်ႇလႅၼ်  ဢၼ်မီးဝႆႉၼႂ်းမိူင်းၽႂ်မၼ်းၼႆ – ႁွင်ႈၵၢၼ်ၶၢဝ်ႇ CCTV လူင်ပွင်ၸိုင်ႈမိူင်းၶႄႇ ႁၢႆးငၢၼ်းဝႆႉၼင်ႇၼႆ။

ဝၢႆးလင် ၸၢႆးၸိူင်းမိူင်းၶႄႇ ႁၢႆလၢႆၵႂႃႇတီႈႁိမ်းလႅၼ်လိၼ်တိတ်းၸပ်း မိူင်းမၢၼ်ႈ – မိူင်းထႆးယဝ်ႉ လိူင်ႈၵူၼ်း ႁၢႆ ပဵၼ်မႃးထပ်းၵၼ်ၶိူဝ်းယႂ်းလႄႈ လူင်ပွင်ၸိုင်ႈမိူင်းၶႄႇ ၸင်ႇတိူဝ်းသႂ်ႇၸႂ်ႁဵတ်းသၢင်ႈ ၼႂ်းၵၢၼ်ၽဵဝ်ႈမူၺ်ႉ ၸုမ်းလွၵ်ႇလႅၼ်ၵိၼ်ငိုၼ်း တၢင်းဢွၼ်ႊလၢႆႊ – ၶၢဝ်ႇရၢႆႊတိူဝ်ႊ လၢတ်ႈဝႆႉၼင်ႇၼႆ။

မိူဝ်ႈၼႂ်းဝူင်ႈပူၼ်ႉမႃးၼႆႉၵေႃႈ ၽွင်းလူင်ၾၢႆႇၼွၵ်ႈမိူင်း မိူင်းၶႄႇ ဝမ်ယိ ႁွင်ႉထူပ်းၽွင်းတၢင် ၸိုင်ႈမိူင်း ၼႂ်းၵုၼ်ၶဵဝ်ဢေႊသျႃႊ ၸဵင်ႇၸၢၼ်းဝၼ်းဢွၵ်ႇ တီႈဝဵင်းပေႊၵျိၼ်ႊ မိူင်းၶႄႇ။ တုၵ်းယွၼ်းႁႂ်ႈဢဝ်လိူင်ႈ ၵၢၼ်လွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊလႄႈ ၵၢၼ်တေႃႇလွင်းတၢင်းဢွၼ်ႊလၢႆႊ ၸိူဝ်းၼႆႉႁၢဝ်ႈႁႅင်း – ဝႃႈ ၼႆ။

ၵဵဝ်ႇၵပ်းငဝ်းလၢႆး ပၢင်ဢုပ်ႇၵုမ်ၼၼ်ႉသေ ၾၢႆႇသိုၵ်းမၢၼ်ႈတႄႉ ပႆႇပိုၼ်ၽၢဝ်ႇသင်ပဵၼ်တၢင်းၵၢၼ်။ ၵူၺ်းၵႃႈ ၼႂ်းဝၼ်းတီႈ 20 ၼႆႉတႄႉ ပိုၼ်ၽၢဝ်ႇဝႆႉဝႃႈ လႆႈၵူတ်ႇထတ်း ၵူၼ်းၼွၵ်ႈမိူင်း ၸိူဝ်းယူႇသဝ်းၼႂ်း မိူင်းမၢၼ်ႈ ဢမ်ႇမႅၼ်ႈတၢင်းၵၢၼ်သေ ႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊ 5 မိုၼ်ႇပၢႆ သူင်ႇပွၵ်ႈ ၶိုၼ်းမိူင်းၽႂ်မၼ်း – ဝႃႈၼႆ။

လူင်ပွင်ၸိုင်ႈၽွမ်ႉႁူမ်ႈၸိူဝ်ႉၸၢတ်ႈ NUG တင်း ၸုမ်းယိပ်းၵွင်ႈၵၢင်ႇလုၵ်ႉၽိုၼ်ႉၶဝ်ၵေႃႈ တုၵ်းယွၼ်းဝႆႉ ၼႂ်းဝၼ်းတီႈ 20 ၼႆႉဝႃႈ – ႁႂ်ႈမိူင်းၶႄႇ၊ မိူင်းဢိၼ်ႊတီႊယိူဝ်ႊ၊ မိူင်းပင်းၵလႃႊတိတ်ႉၶျ်၊ မိူင်းလၢဝ်းတင်း မိူင်းထႆး ႁူမ်ႈၵၼ်တင်းၸုမ်းယိပ်းၵွင်ႈၵၢင်ႇလုၵ်ႉၽိုၼ်ႉသေ ၽဵဝ်ႈမူၺ်ႉၵၢၼ်ယွၼ်ႇလႅၼ်ၵိၼ်ငိုၼ်း တၢင်းဢွၼ်ႊလၢႆႊ ဢၼ်မီးၼႂ်းမိူင်းမၢၼ်ႈ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။