သိုၵ်းမၢၼ်ႈ ယိုတ်းမိူင်းတင်း တပ်ႉသိုၵ်းၵႅတ်ႇၶႄ ၸိူဝ်ႉၸၢတ်ႈယၢင်းလႅင် KNDP ႁူမ်ႈတင်း PDF သေ သိုပ်ႇပဵၼ်ပၢင်တိုၵ်းၵၼ်ထႅင်ႈ ႁၢဝ်ႈႁႅင်း တီႈဝဵင်းမိူင်းပၢႆး ၸိုင်ႈတႆးပွတ်းၸၢၼ်း။

ယၢမ်းလဵဝ် တပ်ႉသိုၵ်းမၢၼ်ႈ ၶမယ 422 တင်း တပ်ႉသိုၵ်းၵႅတ်ႇၶႄ ၸိူဝ်ႉၸၢတ်ႈယၢင်းလႅင် KNDP ႁူမ်ႈတင်း PDF ပဵၼ်ပၢင်တိုၵ်းၵၼ် တၢင်းၾၢႆႇႁွင်ႇဝဵင်းမိူင်းပၢႆး ယဝ်ႉၵေႃႈ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ် ယိုဝ်းၸွႆႈထႅင်ႈ ၵူႈဝၼ်း ဝႃႈၼႆ။

ၽူႈတူင်ႉၼိုင် ၵၢၼ်သိုၵ်း ၼႂ်းပိုၼ်ႉတီႈ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ပၢင်တိုၵ်းၼႆႉ ဢမ်ႇၸႂ်ႈပဵၼ်ၼႂ်းဝဵင်း။ ပဵၼ်တၢင်းၾၢႆႇႁွင်ႇဝဵင်း ၸွမ်းတပ်ႉသိုၵ်းမၢၼ်ႈ ၶမယ 422 ၼၼ်ႉဢေႃႈ။ ယဝ်ႉၵေႃႈ သိုၵ်းမၢၼ်ႈ ယိုဝ်းၵွင်ႈလူင် ၶႂ်ႈဝႃႈၵူႈဝၼ်းယဝ်ႉ ၼိုင်ႈၵမ်းလႂ် ၶဝ်ယိုဝ်း 3-4 လုၵ်ႈ။ ပူၼ်ႉမႃးလၢႆဝၼ်းၼႆႉ ၶဝ်ယိုဝ်းၶဝ်ႈမႃး ၼႂ်းဝဵင်းၶႃႈဢေႃႈ။ ပၢင်တိုၵ်းၼႆႉ ပဵၼ်မႃးၸမ် 2 လိူၼ်ယဝ်ႉ”- ဝႃႈၼႆ။

ယၢမ်းလဵဝ် တွၼ်ႈတႃႇ သိုၵ်းမၢၼ်ႈ တေၵုမ်းၵမ်လႆႈၶိုၼ်း ဝဵင်းၾၢႆၶုၼ်၊ ဝဵင်းမိူင်းပၢႆး၊ ဝဵင်းလွႆၶေႃ ၸိူင်ႉၼႆလႄႈ ၵွပ်ႈၼႆ ၶဝ်ၸင်ႇထႅမ်ႁႅင်းသိုၵ်း ၶဝ်ႈလေႃႇတိုၵ်းမႃးႁၢဝ်ႈႁႅင်းသေဢမ်ႇၵႃး ယဝ်ႉၵေႃႈ ဝႆႉဢွင်ႈတီႈ ၵူၼ်းပၢႆႈၽေးသိုၵ်း ပဵၼ်ပဝ်ႉမၢႆသေ ၵႆႉယိုဝ်းၵွင်ႈလူင်သႂ်ႇ ႁဵတ်းႁႂ်ႈၵူၼ်းပၢႆႈၽေးသိုၵ်း မီးလွင်ႈမၢတ်ႇၸဵပ်း လူႉတၢႆၼမ် – ၵူၼ်းပၢႆႈၽေးသိုၵ်း ၵေႃႉၼိုင်ႈလၢတ်ႈ။

“ပၢင်တိုၵ်းၼႆႉ တႄႇပဵၼ်မႃးတၢင်းဝဵင်းပၢင်လွင်းၼၼ်ႉသေ လၢမ်းၶဝ်ႈမႃးဢေႃႈ။ သိုၵ်းမၢၼ်ႈသမ်ႉ ဢဝ်ဢွင်ႈတီႈ ၵူၼ်းပၢႆႈၽေး ဝႆႉပဵၼ်ပဝ်ႉမၢႆသေ ပိုတ်းယိုဝ်းသႂ်ႇ ႁဵတ်းႁႂ်ႈၵူၼ်းပၢႆႈၽေးသိုၵ်းမၢတ်ႇၸဵပ်းလူႉတၢႆ တိူဝ်းၼမ်မႃး။ ၵွပ်ႈၼႆလႄႈ တႃႇႁဝ်းၶႃႈ ၵူၼ်းပၢႆႈၽေးသိုၵ်း တေသိုပ်ႇပၢႆႈထႅင်ႈတႄႉ ဢမ်ႇမီးတီႈပၢႆႈထႅင်ႈယဝ်ႉ ၵႃႈလႆႈသိုပ်ႇယူႇၵႂႃႇ ၸိူင်ႉၼႆထႅင်ႈၵူၺ်းယဝ်ႉ”- ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 7-8/12/2024 ၼၼ်ႉ ၸွမ်းႁိမ်းႁွမ်း ဝဵင်းမိူင်းပၢႆးၼၼ်ႉ ၶိူင်ႈမိၼ်ၻရူၼ်ႊ မႃးပွႆႇမၢၵ်ႇ ဢၼ်မီးၵွင်ႉ (S – PHOS) ဢၼ်သႂ်ႇဝႆႉမိၵ်ႈမၢႆ 560 ၼၼ်ႉ တင်းၼမ် ဝႃႈၼႆ။