ၼႂ်းဝၼ်းတီႈ 22/1/2025 ၸုမ်းၼၢင်းယိင်းမိူင်းမၢၼ်ႈ ပိုၼ်ၽၢဝ်ႇဝႃႈ ၶၢဝ်းတၢင်းၼိုင်ႈပီ ၼႂ်းပီ 2024 ပူၼ်ႉ မႃးၼႆႉ ယွၼ်ႉပိူဝ်ႈပၢင်တိုၵ်းသေတုမ်ႉတိူဝ်ႉပႃးၼၢင်းယိင်း – မၢတ်ႇၸဵပ်းလူႉတၢႆ 478 ၵေႃႉ၊ ၼႂ်းၼၼ်ႉ မိူင်းတႆး ၼမ်သုတ်းထီႉသွင်။

ယွၼ်ႉသိုၵ်းမၢၼ်ႈလႄႈ သိုၵ်းၸၢဝ်းၶိူဝ်း ပိုတ်းယိုဝ်းၵၼ်သေ ၼၢင်းယိင်းၵူၼ်းမိူင်းတႆး တၢႆ 92 ၵေႃႉ တၢႆၼမ်သုတ်းထီႉသွင်၊ ၼၢင်းယိင်း ၼႂ်းမိူင်းရၶႅင်ႇသမ်ႉ တၢႆၼမ်သုတ်းထီႉၼိုင်ႈ။

ၼၢင်းယိင်း ဢၼ်ၸွႆႈထႅမ်ၵူၼ်းၼုမ်ႇၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“ပေႃးမႃးႁၼ်သဵၼ်ႈမၢႆ ၸိူင်ႉၼႆ ပဵၼ်ဢၼ် ၸႂ်ဢမ်ႇလီၸွမ်း၊ ဢၼ်ၼႆႉတင်းပဵၼ်သဵၼ်ႈမၢႆ ဢၼ်ႁူႉၸွမ်းလႄႈ ယိုၼ်းထိုင်လႆႈၵူၺ်း၊ ဢၼ်ဢမ်ႇယိုၼ်းထိုင်လႆႈသေ ဢမ်ႇႁူႉၵေႃႈ တေမီးတင်းၼမ်၊ ၼႂ်းပိုၼ်ႉတီႈၵေႃႈ တိုၵ်ႉသိုပ်ႇပဵၼ်ပၢင်တိုၵ်းဝႆႉ ယူႇလႄႈ ဢၼ်ႁဝ်းၶႃႈ ထုၵ်ႇပူၼ်ႉပႅၼ်သုၼ်ႇလႆႈသုၼ်ႇပဵၼ်၊ လွင်ႈဢၼ် ဢမ်ႇမီးလွင်ႈၽဵင်ႇပဵင်း ၼိူဝ်ႁဝ်းၸိူဝ်းၼႆႉ ၽႂ်ၸုမ်းလႂ် တေမႃးဢဝ်ပၼ်ပုၼ်ႈ ၽွၼ်း၊ တေႁဵတ်းႁိုဝ် ၵႄႈလိတ်ႈပၼ်ႁႃၼႆ မီးၶေႃႈထၢမ် တင်းၼမ်”- ဝႃႈၼႆ။

ၼၢင်းယိင်း ဢၼ်လႆႈလူႉတၢႆ ၼႂ်းၵႄႈပၢင်တိုၵ်းၵမ်ႈၼမ် ပဵၼ်ယွၼ်ႉသိုၵ်းမၢၼ်ႈ ၸႂ်ႉၶိူင်ႈမိၼ် ၸႂ်ႉၶိူင်ႈၵွင်ႈ ယႂ်ႇယိုဝ်းတိုၵ်း၊ မၢင်ၸိူဝ်း ယဵပ်ႇၺႃးမၢၵ်ႇမႅင်းၾင်လိၼ်သေလူႉတၢႆ၊ ၼၢင်းယိင်း ဢၼ်ၺႃးႁဵတ်းႁၢႆႉ ၶႃႈတၢႆၼႂ်းၶွၵ်ႈလႄႈ ၺႃးၵၼ်ႉ ၸၼ်လူလၢႆၵေႃႈ ၶဝ်ႈပႃးဝႆႉ။

ဢိင်ၼိူဝ် လွင်ႈၼႆႉသေ တႃႇတေလႆႈလွင်ႈၽဵင်ႇပဵင်း တႃႇၼၢင်းယိင်းၼၼ်ႉ ၸင်ႇလႆႈၵဵပ်းၶေႃႈမုလ်း ႁၢႆးငၢၼ်းဢွၵ်ႇဝႆႉ ၼႆ – ၽူႈမီးပုၼ်ႈၽွၼ်း ၼႂ်းၸုမ်းၼၢင်းယိင်းမိူင်းမၢၼ်ႈ လၢတ်ႈဝႆႉၼင်ႇၼႆ။

ဝၢႆးလင် သိုၵ်းမၢၼ်ႈ ယိုတ်းမိူင်းၶၢဝ်းတၢင်း 4ပီမႃးၼႆႉ သိုၵ်းမၢၼ်ႈ ႁဵတ်းႁၢႆႉၶႃႈတၢႆၵူၼ်းမိူင်း ဢိၵ်ႇပႃး ပူၼ်ႉပႅၼ်ၵၼ်ႉ ၸၼ်လူလၢႆၼၢင်းယိင်း ၸိူဝ်းၼႆႉ ပဵၼ်လွင်ႈပူၼ်ႉပႅၼ်ပိူင်ၵၢၼ်သိုၵ်း၊ မိူဝ်းၼႃႈ ၼင်ႇႁိုဝ် ၼၢင်းယိင်း တေဢမ်ႇလႆႈထုၵ်ႇပူၼ်ႉပႅၼ်ထႅင်ႈၼၼ်ႉ ထုၵ်ႇလီဢဝ်လိူင်ႈၵႂႃႇ ၼၵ်းၼၵ်းၼႃၼႃၼႆ ၸုမ်းၼၢင်း ယိင်းမိူင်းမၢၼ်ႈ တိုၵ်းသူၼ်းပႃးဝႆႉၼင်ႇၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)