လုၵ်ႈၸုမ်း ပျီႇတူႉၸိတ်ႉမၢၼ်ႈပဵင်း ၼင်ႇၵၼ် မဝ်းယႃႈသေ ယိုဝ်းၵၼ်တၢႆၶိုၼ်း တီႈဝဵင်းမူႇၸေႊ ၸိုင်ႈတႆးပွတ်းႁွင်ႇ။

ပူၼ်ႉမႃး မိူဝ်ႈဝၼ်းတီႈ 19/1/2025 ယၢမ်းၵၢင်ၶမ်ႈ လုၵ်ႈၸုမ်းပျီႇတူႉၸိတ်ႉမၢၼ်ႈပဵင်း 3 ၵေႃႉ မဝ်းလဝ်ႈ/ မဝ်းယႃႈသေ ပိုတ်းယိုဝ်းၶႃႈႁႅမ်ၵၼ်တၢႆၶိုၼ်း တီႈပွၵ်ႉတေႃႇယွတ်ႈ ဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ၵေႃႉၺႃး ၶႃႈတၢႆၼၼ်ႉ ထုၵ်ႇၾႆးၽဝ်ပႅတ်ႈ ဝႃႈၼႆ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈၽူႈတွႆႇႁွၵ်ႈဝႃႈ – “ၸႂ်ႈဢေႃႈ ၶဝ်ပဵၼ်ၸုမ်းလဵဝ်ၵၼ် ႁဵတ်းတီႈၵၼ် ၶိုၼ်း ယွၼ်ႉၶဝ်ၵိၼ်လဝ်ႈ၊ ယႃႈ (K) ၼမ်ႁႅင်းပူၼ်ႉလႄႈ ထိုင်တီႈလမ်းယိုဝ်းၵၼ် တၢႆၵေႃႉၼိုင်ႈဢေႃႈ။ ၵေႃႉၺႃးယိုဝ်းတၢႆၼႆႉ ထုၵ်ႇ ဢဝ်ၾႆးၽဝ်ပႅတ်ႈ ၸိူင်ႉၼၼ်ဢေႃႈ”- ဝႃႈၼႆ။

မိူဝ်ႈၶမ်ႈဝၼ်းၼၼ်ႉ လုၵ်ႈၸုမ်းပျီႇတူႉၸိတ်ႉမၢၼ်ႈပဵင်း 3 ၵေႃႉ ၵႂႃႇၵိၼ်လဝ်ႈ/ ယႃႈမဝ်းၵမ် ၸွမ်းၵၼ်သေ ၶိုၼ်းယိုဝ်း ၵၼ်တၢႆ ၵေႃႉၼိုင်ႈ။ ယၢမ်းလဵဝ် ဢၼ်ၵိုတ်းဝႆႉ 2 ၵေႃႉၼၼ်ႉ ထုၵ်ႇတီႉၺွပ်းၵုမ်းတူဝ်ဝႆႉယဝ်ႉ ဝႃႈၼႆ။

ဝၢႆးသိုၵ်းမၢၼ်ႈ ယိုတ်းဢႃႇၼႃႇ ၸိုင်ႈမိူင်းမႃးၸမ် 4 ပီၼႆႉ တီႈဝဵင်းမူႇၸေႊၼႆႉ ၸုမ်းပျီႇတူႉၸိတ်ႉ ဢၼ်ယူႇတႂ်ႈသိုၵ်းမၢၼ်ႈ ၵုမ်းၵမ်ၼၼ်ႉ ယိင်ႈၶႅၼ်းတိူဝ်းၼမ်မႃး ဢမ်ႇယွမ်း 20 ၸုမ်းယဝ်ႉ။ ၵမ်ႈၼမ် တေႁဵတ်းၵၢၼ်ပၢႆးမၢၵ်ႈမီး ၼွၵ်ႈမၢႆမီႈ ၸိူဝ်းၼႆႉ။ ယဝ်ႉၵေႃႈ ယႃႈမဝ်းၵမ်၊ ပၢင်တေႃႇလွင်း ၸိူဝ်းၼႆႉၵေႃႈ လိူင်ႇၼမ်။ လွင်ႈယိုဝ်းၵၼ်တၢႆ ၸိူင်ႉၼႆၵေႃႈ မီးမႃးၶိူဝ်းယႂ်းလႄႈ ႁဵတ်းႁႂ်ႈၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ – ၵူၼ်းပိုၼ်ႉတီႈလၢတ်ႈ။  

ယၢမ်းလဵဝ် ၸုမ်းပျီႇတူႉၸိတ်ႉ ဢၼ်တူင်ႉၼိုင်ယူႇဝႆႉၼႂ်းဝဵင်းမူႇၸေႊၼႆႉသမ်ႉ မိူၼ်ၼင်ႇ – ၸုမ်းပျီႇတူႉၸိတ်ႉၵွင်းၶႃး၊ မဵဝ်ႉမ၊ ပၢၼ်းသေး၊ လူင်ထၢၼ်၊ ပဵင်းသႃႇ၊ မၢၼ်ႈၸေႊ၊ သႅင်ၵႅဝ်ႉ၊ မၢၼ်ႈပဵင်း၊ တႃႈမိူင်းငႅၼ်း၊ မိူင်းပေႃႈလႄႈ သႅဝ်ႉႁေႃႇ (ရှောက်ဟော်) ၸဵမ်ၸိူဝ်းၼႆႉ။