မိူဝ်ႈၼႆႉ ဝၼ်းတီႈ 22/1/2025 ယၢမ်းၵၢင်ဝၼ်း 11:15 မူင်း ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇတူၵ်းသႂ်ႇ တီႈလုမ်းၽူႈၵွၼ်း ၸႄႈဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ 2 လုၵ်ႈ ၵူၼ်းတၢႆ 7 ၵေႃႉ မၢတ်ႇၸဵပ်းထႅင်ႈတင်းၼမ် ။
ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ – “မိူဝ်ႈၵႆႈ 11 မူင်းပၢႆ 15 မိၼိတ်ႉၼၼ်ႉ ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇၵမ်းၼိုင်ႈ တူၵ်းသႂ်ႇ ႁၢၼ်ႉၶၢႆၼမ်ႉၼဵင်ႈဝၢၼ် “ပႃႇရမီႇ 2 ” ၼႆၼၼ်ႉ 2 လုၵ်ႈ ၊ ၵူၼ်းတၢႆ 7 ၵေႃႉ မၢတ်ႇၸဵပ်းတင်းၼမ်။ မိူဝ်ႈဝႃးၵေႃႈ ၶဝ်မႃးယိုဝ်း 2 ၵမ်း မၢၵ်ႇတူၵ်း 4 လုၵ်ႈ။ မိူဝ်ႈၼႆႉၵေႃႈ ၶဝ်မႃးယိုဝ်းသႂ်ႇ တီႈမိူဝ်ႈဝႃး ၼၼ်ႉၵူၺ်း ပဵၼ်တီႈႁိမ်းလုမ်း ၽူႈၵွၼ်းၸႄႈဝဵင်း၊ လွင်ႈၵူၼ်းမၢတ်ႇၸဵပ်းတႄႉ တိုၵ်ႉသွၵ်ႈႁႃယူႇ”- ဝႃႈၼႆ။
ဝၼ်းတီႈ 21/1/2025 ယၢမ်းဝၢႆးဝၼ်း 2 မူင်းၶိုင်ႈ သိုၵ်းမၢၼ်ႈ ဢဝ်ၶိူင်ႈမိၼ် jet fighter ပွႆႇမၢၵ်ႇ 2 လုၵ်ႈ တူၵ်းတိူဝ်ႉ လုမ်းၽူႈၵွၼ်းၸႄႈဝဵင်းလႄႈ ႁူင်းပလိၵ်ႈသိုၵ်းမၢၼ်ႈ လူႉၵွႆ၊ ၼၢင်းယိင်း ၵေႃႉၼိုင်ႈ ဢႃယု 17 ပီ တၢႆထင်တီႈ၊ မီးၵူၼ်းမၢတ်ႇၸဵပ်း 2 ၵေႃႉ ဝႃႈၼႆ။
ၵူၼ်းၸၢႆး ယူႇဝဵင်းၼွင်ၶဵဝ် လၢတ်ႈၽူႈတွႆႇႁွၵ်ႈဝႃႈ -“ၸႂ်ႈယဝ်ႉဝႃႈ၊ မိူဝ်ႈဝႃး ဢဝ်ၶိူင်ႈမိၼ် မႃးပွႆႇ၊ တူၵ်းတင်း ဝၢၼ်ႈလူင်(ၵူင်းၵျီးယႂႃႇမ) ။ တီႈၼႂ်းဝဵင်းတႄႉ တူၵ်းတင်း လုမ်းၽူႈၵွၼ်းၸႄႈဝဵင်းၼၼ်ႉ၊ ၼၢင်းယိင်း ၵေႃႉၼိုင်ႈ လူႉတၢႆ ”- ဝႃႈ ၼႆ။
တီႈဝၢၼ်ႈလူင်ၼၼ်ႉ ဢမ်ႇမီးၵူၼ်းဝၢၼ်ႈယူႇသဝ်းယဝ်ႉလႄႈ ဢမ်ႇႁတ်းၵႂႃႇတူၺ်း လွင်ႈတုမ်ႉတိူဝ်ႉၼႂ်း ပိုၼ်ႉတီႈ။ ယၢမ်းလဵဝ် တီႈဝဵင်းၼွင်ၶဵဝ်ၼႆႉ ပၢင်တိုၵ်းယဵၼ်ဝႆႉသေတႃႉ ယၢမ်းလႂ် ၶိူင်ႈမိၼ်သိုၵ်းမၢၼ်ႈလႄႈ မၢၵ်ႇလူင်သိုၵ်းမၢၼ်ႈ တေမႃးပွႆႇၼႆ လႆႈၵူဝ်ႁႄမႆႈၸႂ်ဝႆႉယူႇတႃႇသေႇ – ၵူၼ်းပိုၼ်ႉတီႈလၢတ်ႈ။
ယွၼ်ႉသိုၵ်းမၢၼ်ႈ ဢဝ်ၶိူင်ႈမိၼ် ၵျႅတ်ႉၾၢႆႊတိူဝ်ႊ (jet fighter) မႃးပွႆႇလႄႈ ႁဵတ်းႁႂ်ႈ ႁွင်ႈၵၢၼ် ၾၢႆႇလိူမ်ႈလႆႇ ၺႃးၸၢၵ်ႇမၢၵ်ႇၵွႆ၊ ႁိူၼ်းၵူၼ်းမိူင်းၵေႃႈ ၾႆးမႆႈၵႂႃႇလၢႆလၢႆလင်ၼႆ – သိုၵ်းတဢၢင်း TNLA ပိုၼ်ၽၢဝ်ႇဝႆႉၼင်ႇၼႆ။
မိူၼ်ၼႆၼင်ႇၵဝ်ႇ ၼႂ်းဝၼ်းတီႈ 13/1/2025 ယၢမ်းၵၢင်ဝၼ်း 3 မူင်း ၼၼ်ႉၵေႃႈ ဢမ်ႇမီးပၢင်တိုၵ်းသိုၵ်းသိူဝ်သင်သေ သိုၵ်းမၢၼ်ႈ ဢဝ် jet fighter ပွႆႇမၢၵ်ႇ တီႈဝၢၼ်ႈပၢင်ပဝ်း (ပန်ပေါင်း) ဝဵင်းၵျွၵ်ႉမႄးၼႆ သိုၵ်းတဢၢင်း TNLA ပိုၼ်ၽၢဝ်ႇဝႆႉၼင်ႇၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ