တႄႇႁူဝ်လိူၼ်ၵျႅၼ်ႊၼိဝ်ႊရီႊ ပီ 2025 ၼႆႉမႃး ပၢင်တိုၵ်း ၼႂ်းၵႄႈသိုၵ်းမၢၼ်ႈလႄႈ သိုၵ်းယၢင်းလႅင် KNDF – PDF သိုပ်ႇပဵၼ်ႁၢဝ်ႈႁႅင်း တၢင်းဝဵင်းလွႆၶေႃ – မိူင်းပၢႆး ၸိုင်ႈတႆးပွတ်းၸၢၼ်း။
ဝၼ်းတီႈ 19/1/2025 ထိုင် 21/1/2025 ၼႂ်းၶၢဝ်းတၢင်း 2-3 ဝၼ်းၼႆႉ သိုၵ်းမၢၼ်ႈ ထႅမ်ႁႅင်းသိုၵ်းမႃးႁၢဝ်ႈႁႅင်းလႄႈ ပဵၼ်ပၢင်တိုၵ်းၵၼ် တင်းသိုၵ်းယၢင်းလႅင် ႁဵတ်းႁႂ်ႈၵူၼ်းပိုၼ်ႉတီႈ လႆႈငိၼ်းသဵင်ၵွင်ႈသဵင်မၢၵ်ႇ ၵူႈဝၼ်း မႆႈၸႂ်တႃႇလွင်ႈလွတ်ႈၽေး ဝႃႈၼႆ။
ယၢမ်းလဵဝ် တီႈႁိမ်းႁွမ်းဝဵင်းလွႆၶေႃ လႆႈငိၼ်းသဵင်ၵွင်ႈသဵင်မၢၵ်ႇလႄႈ ၵူၼ်းပွၵ်ႈၶိုၼ်းႁိူၼ်းဢမ်ႇပဵၼ်လပ်း ပဵၼ်ၼွၼ်း လႆႈၵူဝ်ႁႄယူႇသဝ်းဝႆႉ။ ၵူၼ်းၼႂ်းပိုၼ်ႉတီႈ တႅမ်ႈတၢင်ႇၼိူဝ် Facebook ဝႆႉဝႃႈ ဝၼ်းတီႈ 20/1/2025 ဝၼ်းလဵဝ် ယူႇတီႈဝဵင်းလွႆၶေႃ လႆႈငိၼ်းသဵင်ၵွင်ႈလူင် 30 ၵမ်းပၢႆ။ မိူဝ်ႈၼႆႉၵေႃႈ လႆႈငိၼ်းသဵင် ၵွင်ႈလူင်ယူႇထႅင်ႈ ဝႃႈၼႆ။
ၼၢင်းယိင်း ပိုၼ်ႉတီႈဝဵင်းလွႆႇၶေႃ လၢတ်ႈၽူႈတွႆႇႁွၵ်ႈဝႃႈ -“ႁိမ်းႁွမ်းဝဵင်းလွႆႇၶေႃၼႆႉၵေႃႈ လႆႈငိၼ်းသဵင်ၵွင်ႈလူင် ၵူႈဝၼ်းၵူႈၶိုၼ်း၊ ယွၼ်ႉလႆႈငိၼ်းသဵင်ၵွင်ႈသဵင်မၢၵ်ႇလႄႈ ၵူၼ်းပိုၼ်ႉတီႈ ဢမ်ႇလႆႈၼွၼ်းလပ်း လီလီ၊ ၵူဝ်မၢၵ်ႇလူင် တေမႃးတူၵ်းတီႈႁိူၼ်း”- ဝႃႈၼႆ။
ယွၼ်ႉပိူဝ်ႈၽႅၼ်ယၼ်ႇသိုၵ်း 1111 ပၢင်တိုၵ်း ၼႂ်းၵႄႈသိုၵ်းမၢၼ်ႈလႄႈ သိုၵ်းယၢင်းလႅင် KNDF- PDF သေ ဝဵင်းလွႆ ၶေႃ ၵူၼ်းမိူင်းၼႂ်းဝဵင်း ပႃးၸဵမ်တၢင်းဝၢၼ်ႈ လႆႈဢွၼ်ၵၼ် ပၢႆႈၽေးသိုၵ်းၵႂႃႇယူႇသဝ်းဝႆႉ ႁိမ်းႁွမ်းဝဵင်းလွႆၶေႃ ပႃးၸဵမ်ၼႂ်းသူၼ်ၼႂ်းထိူၼ်ႇ။ ပေႃးသဵင်ၵွင်ႈသဵင်မၢၵ်ႇယဵၼ်ၵေႃႈ ဢွၼ်ၵၼ် ပွၵ်ႈမိူဝ်းတူၺ်း ႁိူၼ်းယေးၽႂ်မၼ်း၊ ပေႃးလႆႈငိၼ်းသဵင်ၵွင်ႈသဵင်မၢၵ်ႇၵေႃႈ ပၢႆႈဢွၵ်ႇၶိုၼ်းထႅင်ႈ တင်ႈတႄႇပီ 2021 မႃး တေႃႇထိုင်ယၢမ်းလဵဝ် ဢွၼ်ၵၼ်ပၢႆႈပၢႆႈပွၵ်ႈပွၵ်ႈ ဢမ်ႇမီးတီႈယူႇတီႈသဝ်းလီလီ ဝႃႈၼႆ။
တႄႇလိူၼ်တီႊသႅမ်ႊပိူဝ်ႊ ပီ 2024 ၼႆႉမႃး သိုၵ်းမၢၼ်ႈ ၸႂ်ႉၵူၼ်းပၢႆႈၽေးသိုၵ်း ပွၵ်ႈၶိုၼ်းႁိူၼ်းၽႂ်မၼ်း။ ပေႃးဢမ်ႇပွၵ်ႈၼႆ တေယိုတ်းဢဝ်ႁိူၼ်းယေးၼႆလႄႈ ၵူၼ်းပၢႆႈၽေးသိုၵ်းၵေႃႈ ၵႃႈလႆႈဢွၼ်ၵၼ် ပွၵ်ႈမႃး ႁိူၼ်းၽႂ်မၼ်းၶိုၼ်း ဝႃႈၼႆ။
ၼၢင်းယိင်း ၵူၼ်းပိုၼ်ႉတီႈဝဵင်းလွႆၶေႃ လၢတ်ႈၽူႈတွႆႇႁွၵ်ႈဝႃႈ – “မိူဝ်ႈဢွၼ်တၢင်းၵေႃႈ ၶဝ်ယၢမ်ႈလၢတ်ႈယူႇ ၊ ယၢမ်းလဵဝ်တႄႉ လွၵ်ႇငိုတ်ႈပႃး ၊ ပေႃးၽႂ်ဢမ်ႇ မႃးႁိူၼ်းၶိုၼ်း တေယိုတ်းဢဝ် ႁိူၼ်းၼႆ။ ၽႂ်ၽႂ်ၵေႃႈ ဢဝ်ၼမ်ႉႁိူဝ်ႇၼမ်ႉၶႆးသေ ႁဵတ်းမႃးႁႃမႃးလႄႈ ဢွၼ်ၵၼ်သေးလၢႆ။ ၵူဝ်သိုၵ်းမၢၼ်ႈ ယိုတ်းဢဝ်လၢႆလႄႈ ၸင်ႇဢွၼ်ၵၼ် ပွၵ်ႈမႃးၶိုၼ်း၊ တီႈၼႆႉ တေႁဵတ်းၵိၼ်ၵၢၼ်သင်ၵေႃႈ ဢမ်ႇႁူႉ၊ ၵၢၼ်ႁႃၵိၼ်လဵင်ႉတွင်ႉ ယၢပ်ႇၼႃႇ”- ဝႃႈၼႆ။
ဝၼ်းတီႈ10/12/2024 ၵၢင်ႉၵႄႇ တႂ်ႈသိုၵ်းမၢၼ်ႈ မႃးလၢတ်ႈတီႈၵျွင်းမုၼ်ၸဝ်ႈ ပွၵ်ႉပၢင်ၵၢင်းဝႃႈ ၵူၼ်းၸၢႆး ၼႂ်းပွၵ်ႉ တေလႆႈၵႂႃႇႁၢပ်ႇၵၢၼ်သိုၵ်း၊ ၽႂ်ဢမ်ႇၸွမ်းၵႂၢမ်းသင်ႇ တေယိုတ်းဢဝ်ၶူဝ်းၶွင်ႁိူၼ်းယေး တီႈယူႇ တင်းမူတ်း ဝႃႈၼႆပႃး။
ၽႅၼ်ယၼ်ႇသိုၵ်း 1111 ၼႆႉ ဝဵင်းလွႆၶေႃ ထိုင်တီႈလူႉလႅဝ်ႁၢမ်းၵႂႃႇသေတႃႉ ယၢမ်းလဵဝ် သိုၵ်းမၢၼ်ႈ ၶဝ်ႈဢဝ်တီႈယူႇဝႆႉၼႂ်းဝဵင်း။ ႁိမ်းၶႅပ်ႇၶၢင်ႈဝဵင်း ၸွမ်းဝၢၼ်ႈၸွမ်းသူၼ်ၵေႃႈ သိုၵ်းမၢၼ်ႈ ထႅမ်ႁႅင်းသိုၵ်းၶဝ်ႈမႃး ဢဝ်တီႈယူႇဝႆႉလႄႈ ႁဵတ်းႁႂ်ႈၵူၼ်းပိုၼ်ႉတီႈ ၸိူဝ်းပၢႆႈၽေးသိုၵ်းဝႆႉ ဢမ်ႇႁတ်းပွၵ်ႈယူႇၶိုၼ်းႁိူၼ်းယေး။ ဢၼ်ဢမ်ႇၸၢင်ႈႁဵတ်းႁိုဝ်လႄႈ လႆႈပွၵ်ႈၶိုၼ်းမီး 3 ပုၼ်ႈ 1 ပုၼ်ႈယဝ်ႉ ဝႃႈၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ