တႄႇႁၢင်ပီ 2024 မႃး သိုၵ်းမၢၼ်ႈ ထႆၵိၼ်ငိုၼ်းၸဝ်ႈၵႃးၵႂႃႇမႃး ပေႃးဢမ်ႇပၼ်ငိုၼ်း တေဢမ်ႇပၼ်လတ်း တၢင်း တီႈၵဵတ်ႉလွႆပျႃး (လွယ်ပြား) တၢင်းဢွၵ်ႇဝဵင်းပၢင်လွင်း ၸိုင်ႈတႆးပွတ်းၸၢၼ်း။
ၸဝ်ႈၵႃး ဝဵင်းတူၼ်ႈတီး ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“ၶဝ် (သိုၵ်းမၢၼ်ႈ) ယွၼ်းၵႃႈတၢင်းၵိၼ်တီႈ ၸဝ်ႈၵႃး၊ ပႂ်ႉဝႆႉတၢင်းၶဝ်ႈတၢင်းဢွၵ်ႇဝဵင်းသေ ပႂ်ႉၵူတ်ႇထတ်းယွၼ်းငိုၼ်း၊ ယွၼ်းၵႃႈဢမ်ႇလႆႈ ဢမ်ႇၸူး၊ ၶႃႈလႆႈပၼ်ပဵၼ် 5 မိုၼ်ႇ။ ဢိင်ၼိူဝ် ရူတ်ႉၵႃးယႂ်ႇ/ လဵၵ်ႉသေ ၶဝ်ယွၼ်း 2 မိုၼ်ႇ ထိုင် 5 မိုၼ်ႇပျႃး၊ ပေႃး ဢမ်ႇပၼ်ငိုၼ်းၶဝ် ဢမ်ႇပၼ်လတ်းၵႂႃႇ”- ဝႃႈၼႆ။
သိုၵ်းမၢၼ်ႈ ယွၼ်းငိုၼ်း ပေႃးပဵၼ်ရူတ်ႉၵႃးတၢင်ႇၵုၼ်ႇ (ကုန်တင်ကား) 1 လမ်း 5 မိုၼ်ႇပျႃး၊ ပေႃးပဵၼ် ရူတ်ႉၵႃး ၸႂ်ႉ ၵိုၵ်းႁိူၼ်း (အိမ်စီးကား) 3 မိုၼ်ႇပျႃး ၊ပေႃးၵႃး တၢင်ႇၵူၼ်း (ခရီးသည်တင်ကား) ယွၼ်း 2 မိုၼ်ႇပျႃး။
ၵူၼ်းပိုၼ်ႉတီႈ ဝဵင်းပၢင်လွင်း လၢတ်ႈၽူႈတွႆႇႁွၵ်ႈဝႃႈ -“ၵဵတ်ႉတင်းပုၼ်ႉ ယွၼ်းယူႇတႃႇသေယဝ်ႉ၊ ပေႃးပဵၼ် ရူတ်ႉၶိူင်ႈတႄႉ ၶဝ်တေဢမ်ႇယွၼ်း၊ ပေႃးၶဝ်ၵိၼ်လဝ်ႈဝႆႉၼႆတႄႉ ၶဝ်တေၵူတ်ႇထတ်း ထၢမ်တႂ်ႈထၢမ်ၼိူဝ်၊ ပေႃးပဵၼ်ၵႃးႁိူၼ်း ၼႆႉ ၶႅၼ်းထတ်းႁႅင်းၼႃႇ”- ဝႃႈၼႆ။
သိုၵ်းမၢၼ်ႈ တီႈၵဵတ်ႉလွႆပျႃးၼႆႉ ပေႃးပဵၼ်ၵူၼ်းမိူင်းတႄႉ ၶဝ်တေယွၼ်းငိုၼ်း။ ပေႃးပဵၼ် ၶႃႈႁၢပ်ႇၵၢၼ်ၶုၼ် ၸိူဝ်းဢမ်ႇႁဵတ်း CDM လႄႈ ၵူၼ်းသိုၵ်းလုၵ်ႈၸုမ်း PNO တႄႉ ၶဝ်ဢမ်ႇၵူတ်ႇထတ်းလႄႈ ယွၼ်း ငိုၼ်း။
ၵဵတ်ႉလွႆပျႃးၼႆႉ မီးၼႂ်းၵႄႈဝဵင်းဢွင်ႇပၢၼ်းလႄႈ ပၢင်လွင်း။ ယၢမ်းလဵဝ် သိုၵ်းမၢၼ်ႈလႄႈ ပျီႇတူႉၸိတ်ႉပဢူဝ်း PNO ပၼ်ႇပုတ်ႈၵၼ် ပႂ်ႉၵဵတ်ႉ။ ဢၼ်သိုၵ်းမၢၼ်ႈ ၵူတ်ႇထတ်းသေ ထႆၵိၼ်ငိုၼ်းၼႆႉ ပဵၼ်ၵူၼ်းတင်း ဝဵင်းၵၢတ်ႇလေႃႉ၊ ဢွင်ႇပၢၼ်း၊ တူၼ်ႈတီး၊ ယွင်ႁူၺ်ႈ၊ ယႂႃႇငၢၼ်ႇ၊ မိူင်းပၢႆး၊ ၾၢႆၶုၼ် ၸိူဝ်းၼႆႉ – ၵူၼ်းပိုၼ်ႉတီႈလၢတ်ႈ။
ယၢမ်းလဵဝ် ၼႂ်းၸႄႈဝဵင်းပၢင်လွင်း ၾၢႆႇတင်းသိုၵ်းမၢၼ်ႈလႄႈ လုၵ်ႈၸုမ်း ပျီႇတူႉၸိတ်ႉပဢူဝ်း PNO ထႅမ်ႁႅင်းၵႂႃႇတၢင်းၾၢႆၶုၼ်၊ မိူင်းပၢႆး တင်းၼမ် – ၵူၼ်းမိူင်းမႆႈၸႂ် ၵူဝ်ပဵၼ်ပၢင်တိုၵ်းထႅင်ႈၼႆ ၵူၼ်းပိုၼ်ႉတီႈ လၢတ်ႈၼင်ႇၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ