ၼၢင်းယိင်းၵေႃႉၼိုင်ႈ ၺႃးၸူၼ် ၼႂ်းၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ သုမ်းၵႂႃႇငိုၼ်းၶႄႇ 7,000 ယႂၼ်ႊ (တူၵ်းမႅၼ်ႈငိုၼ်းမၢၼ်ႈ 40 သႅၼ်ပၢႆ) ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 14/1/2025 ယၢမ်းႁူဝ်ၶမ်ႈမွၵ်ႈ 6 မူင်း ၼၢင်းယိင်း ဢႃယု 40 ၵေႃႉၼိုင်ႈ ၺႃးၸူၼ်တီႈႁိမ်းဝၢၼ်ႈၼႃးသေႃႉ ၼႂ်းၸႄႈဝဵင်းသႅၼ်ဝီ ၸိုင်ႈတႆးပွတ်းႁွင်ႇ မၼ်းၼၢင်း ၺႃးၵူၼ်းဢမ်ႇႁူႉၾၢႆႇ 5 ၵေႃႉ ဢဝ်ၵွင်ႈၸမ်ႈသေ ၸူၼ်ဢဝ်ငိုၼ်းၵႂႃႇ ဝႃႈၼႆ။
ၵူၼ်းပိုၼ်ႉတီႈ ဝဵင်းသႅၼ်ဝီ လၢတ်ႈၽူႈတွႆႇႁွၵ်ႈဝႃႈ – “မီးလုၵ်ႈဢွၼ်ႇၼုမ်ႇ ၶီႇရူတ်ႇၶိူင်ႈ 3 လမ်း ၸွမ်းလင်မၼ်းၼၢင်းမႃး ၸဵမ်မိူဝ်ႈဝၢၼ်ႈၼႃးၶႅၵ်းၼၼ်ႉ ၽိူဝ်ႇၸမ်ၽႅဝ်ႁိမ်းဝၢၼ်ႈၼႃးသေႃႉၼႆႉ ၸႂ်ႉမၼ်းၼၢင်း ၵိုတ်းရူတ်ႉၶိူင်ႈသေ ဢဝ်ၵွင်ႈငႃမၼ်း ၸႂ်ႉဢဝ်ငိုၼ်းၼႂ်းထူင်မၼ်းၼၼ်ႉ ပၼ်ၶဝ်။ မၼ်းၼၢင်းၵူဝ်သေ ဢဝ်ငိုၼ်းၼႂ်းထူင်ပၼ် 7,000 ယႂၼ်ႊ (ငိုၼ်းၶႄႇ) ရူတ်ႉၶိူင်ႈမၼ်းၼၢင်းတႄႉ ဢမ်ႇဢဝ်ၵႂႃႇၶႃႈ။ ၼၢင်းယိင်း ဢၼ်ၺႃးၸူၼ်ၼၼ်ႉ လုၵ်ႉတၢင်းလႃႈသဵဝ်ႈ မႃးတီႈသႅၼ်ဝီ ၵူၺ်းၵႃႈ ပဵၼ်ၵူၼ်းဝၢၼ်ႈလႂ် ယူႇတီႈလႂ် ၸိုဝ်ႈဝႃႈႁိုဝ် ၸိူဝ်းၼႆႉတႄႉ ဢမ်ႇလႆႈႁူႉၶႃႈ”- ဝႃႈၼႆ။
တင်ႈတႄႇ သိုၵ်းၵဝ်ႈၵၢင်ႉ MNDAA ယိုတ်းၵုမ်းမႃး ဝဵင်းသႅၼ်ဝီတင်း ဝဵင်းလႃႈသဵဝ်ႈၼႆႉ ၵူၼ်းမိူင်းၵႆႉၺႃး ၸူၼ်ၼမ် ႁဵတ်းႁႂ်ႈၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ ဝႃႈၼႆ။
“ၸူဝ်ႈသိုၵ်းၶႄႇ ၵဝ်ႈၵၢင်ႉ သိမ်းမိူင်းမႃးၼႆႉ ၼႂ်းမိူင်းတႆးပွတ်းႁွင်ႇၼႆႉ ၵူၼ်းမိူင်းဢွၼ်ၵၼ် ၸႂ်ႉတိုဝ်းငိုၼ်း ၶႄႇၼမ်။ လွင်ႈၸူၼ်ၵၼ်ၼႆႉၵေႃႈ မီးၼမ်မႃးၶႃႈယဝ်ႉ။ မိူဝ်ႈဢွၼ်တၢင်းၼႆႉ ၵူၼ်းၶၢႆၵၢတ်ႇ (စျေးသည်) ၶဝ် ၸိူဝ်းၼႆႉ ၺႃးႁႅမ်တၢႆ ၸွမ်းတၢင်းၵေႃႈ ယၢမ်ႈမီးမႃးယဝ်ႉ တၢင်းသႅၼ်ဝီၼႆႉ”- ၵူၼ်းပိုၼ်ႉတီႈ ဝဵင်းသႅၼ်ဝီ သိုပ်ႇလၢတ်ႈၼႄၼင်ႇၼႆ။
မိူၼ်ၼႆ ပူၼ်ႉမႃး မိူဝ်ႈဝၼ်းတီႈ 13 ၵူၼ်းၸၢႆး ၵေႃႉၼိုင်ႈ ယူႇပွၵ်ႉၼိုင်ႈ ဝဵင်းလႃႈသဵဝ်ႈ ၺႃးၸုမ်းဢမ်ႇႁူႉ ၾၢႆႇတီႉၺွပ်းႁဵတ်းပဵၼ်တူဝ်ယိူဝ်ႇၵႂႃႇၼၼ်ႉ ထိုင်မႃးဝၼ်းတီႈ 14 ယၢမ်းၵၢင်ၶမ်ႈ 7 မူင်း ၵူၼ်း 3 ၵေႃႉ ဢၼ်တီႉၺွပ်းၵႂႃႇၼၼ်ႉ သိုၵ်းၵဝ်ႈၵၢင်ႉလမ်းယိုဝ်းတီႉၺွပ်းလႆႈ တီႈၼွၵ်ႈဝဵင်းလႃႈသဵဝ်ႈ – ၶၢဝ်ႇသူၺ်ႇၽီႇမျေႇ ဢွၵ်ႇဝႆႉၼင်ႇၼႆ။
ၼႂ်းႁူဝ်လိူၼ်ၵျႅၼ်ႊၼိဝ်ႊရီးၼႆႉၵူၺ်း ၵူၼ်းမိူင်းတႆး ၺႃးၸူၼ်လၢႆလၢႆတီႈ မိူၼ်ၼင်ႇ – တီႈဝဵင်းမူႇၸေႊ ၸိုင်ႈတႆးပွတ်းႁွင်ႇ ၼၼ်ႉၵေႃႈ ပူၼ်ႉမႃး မိူဝ်ႈဝၼ်းတီႈ 10/1/2025 ယၢမ်းၵၢင်ၼႂ်မွၵ်ႈ 10 မူင်း မီးၵူၼ်း ဢမ်ႇႁူႉၾၢႆႇ 6 ၵေႃႉ ယိပ်းၵွင်ႈၸေးမိုဝ်းသေ ၶဝ်ႈၸူၼ်တီႈႁၢၼ်ႉမႄးရူတ်ႉၵႃး “ဟိုင်းရာဇာ ကား၀ပ်ရှော့” တီႈပွၵ်ႉမၢၼ်ႈဝဵင်း ၼႂ်းဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ လႆႈၵႂႃႇရူတ်ႉၵႃး၊ ၾူၼ်း လႄႈ ငိုၼ်းထႅင်ႈတင်းၼမ် ဝႃႈၼႆ။
လိူဝ်ၼၼ်ႉ မိူဝ်ႈဝၼ်းတီႈ 5/1/2025 ယၢမ်းႁူဝ်ၶမ်ႈမွၵ်ႈ 5 မူင်း မီးၵူၼ်းဢမ်ႇႁူႉၾၢႆႇ 4 ၵေႃႉ ၶီႇၵႃးမႃးၸွမ်း ၵၼ်လမ်းၼိုင်ႈသေ ၶဝ်ႈၸူၼ်ႁိူၼ်းယေး ၵူၼ်းမိူင်းပွၵ်ႉ 2 တီႈဝဵင်းၵုၼ်ႁဵင် ၸိုင်ႈတႆးပွတ်းၸၢၼ်း ၸဝ်ႈ ၶွင်ႁိူၼ်း ၽူႈၸၢႆးဢႃယု 50 ပၢႆ ၵေႃႉၼိုင်ႈ ၺႃးယိုဝ်းတၢႆ ဝႃႈၼႆ။
ဝၢႆးသိုၵ်းမၢၼ်ႈ ယိုတ်းမိူင်းမႃး ၸမ် 4 ပီၼႆႉ ႁဵတ်းႁႂ်ႈၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ၊ ၽူႈလၵ်ႉၸၵ်ႉၶုတ်ႈ၊ ပၢင်တေႃႇလွင်း၊ ယႃႈမဝ်းၵမ် ၸိူဝ်းၼႆႉ ယိင်ႈၶႅၼ်းၼမ်လိူင်ႇမႃးသေဢမ်ႇၵႃး ၵၢၼ်ပၢႆးမၢၵ်ႈမီး ၸိူဝ်းၼႆႉၵေႃႈ တူၵ်းႁႅင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ