တႄႇဢဝ် ႁူဝ်လိူၼ်ၵျႅၼ်ႊၼိဝ်ႊရီႊ ပီ 2025 ၼႆႉမႃး တီႈၶူဝ်တႃႈၽွင်ႇ တၢင်းၶဝ်ႈဝဵင်းႁူဝ်ပၢင်ႇ ၼႂ်းၸိုင်ႈတႆး ပွတ်းႁွင်ႇ ဢၼ်တပ်ႉသိုၵ်းဝႃႉ UWSA ၽွင်းငမ်းဝႆႉၼၼ်ႉ ၵဵပ်းၶွၼ်ႇၶူဝ်းၵုၼ်ႇၵူၼ်းမိူင်း တႃႇလတ်းၶၢမ်ႈၶူဝ်ၼမ် လႆႈပၼ်ငိုၼ်း ၶႄႇ ၼိုင်ႈပွၵ်ႈလႂ်ၼပ်ႉႁူဝ်ပၢၵ်ႇယႂၼ်ႊ ဝႃႈၼႆ။

ၵူၼ်းပိုၼ်ႉတီႈ ဝဵင်းႁူဝ်ပၢင်ႇ လၢတ်ႈၽူႈတွႆႇႁွၵ်ႈဝႃႈ – “တီႈၶူဝ်တႃႈၽွင်ႇၼႆႉ မိူဝ်ႈလဵဝ် ဢၼ်ၶဝ်ၵဵပ်းၼႆႉ ၵမ်ႈၼမ် တေပဵၼ်ၶွၼ်ႇၵႃး။ ၼိုင်ႈလမ်းၼႆႉ တေၵဵပ်း 10 ယႂၼ်ႊ တေတူၵ်းမႅၼ်ႈငိုၼ်းမၢၼ်ႈ 6 ႁဵင်ပၢႆ။ ၵမ်းၼႆႉ ဢၼ်ၶဝ်ၵဵပ်းငိုၼ်း 500 ယႂၼ်ႊၼၼ်ႉသမ်ႉ ပဵၼ်ၶူဝ်းၵုၼ်ႇတၢင်းၶၢႆ ၸိူဝ်းၼႆႉ ၶဝ်တူၺ်းၶူဝ်းၵုၼ်ႇ ၼမ်ဢေႇ ဢွၼ်တၢင်းယဝ်ႉ ၶဝ်ၸင်ႇတေၵဵပ်းငိုၼ်း”- ဝႃႈၼႆ။

ၵဵဝ်ႇၵပ်းလွင်ႈၼႆႉ ၵူၼ်းႁေႃႈရူတ်ႉၵႃး တၢင်ႉယၢၼ်း – ႁူဝ်ပၢင်ႇ ၵေႃႉၼိုင်ႈ လၢတ်ႈဝႃႈ သင်ဢမ်ႇပၼ်ငိုၼ်း ၸွမ်းၼင်ႇ ဢၼ်ၶဝ်ယွၼ်းၸိုင် ၶဝ်ဢမ်ႇဢွၵ်ႇပၼ်ဝႂ်ၶၢမ်ႈၶူဝ် – ဝႃႈၼႆ။

ၼွၵ်ႈလိူဝ် ၵၢၼ်ၵဵပ်းၶွၼ်ႇၸွမ်းတၢင်းၶဝ်ႈဝဵင်းယဝ်ႉ ၼႂ်းဝဵင်းႁူဝ်ပၢင်ႇ ၸိူဝ်းၼႆႉၵေႃႈ မီးလွင်ႈၵဵပ်းၶွၼ်ႇ ႁၢဝ်ႈႁႅင်းထႅင်ႈ ၸွမ်းႁၢၼ်ႉၶၢႆၶူဝ်းၵုၼ်ႇၶွင်ၵိၼ်ယႅမ်ႉ ၸိူဝ်းၼႆႉသေ ႁဵတ်းႁႂ်ႈၵူၼ်းမိူင်းထူပ်းတၢင်းယၢပ်ႇ တႃႇႁႃၵိၼ်လဵင်ႉတွင်ႉ။

ၵူၼ်းၵႃႉၶၢႆ ၼႂ်းဝဵင်းႁူဝ်ပၢင်ႇ လၢတ်ႈၽူႈတွႆႇႁွၵ်ႈဝႃႈ – “ဢၼ်လႆႈသႂ်ႇၶွၼ်ႇၼမ်ၼႆႉ မၼ်းမီးလၢႆသႅၼ်း ယူႇတီႈ ႁၢၼ်ႉလဵၵ်ႉ၊ ႁၢၼ်ႉယႂ်ႇ ၊ ႁၢၼ်ႉၶၢႆၶူဝ်းၵုၼ်ႇ ၸိူဝ်းၼႆႉထႅင်ႈၵမ်ႉၼိုင်ႈ။ မၢင်ႁၢၼ်ႉလႆႈပၼ် 100 ယႂၼ်ႊ၊ 200 ယႂၼ်ႊ ၸိူဝ်းၼႆႉ ၵေႃႈမီး။ ပေႃးပဵၼ်ႁၢၼ်ႉယႂ်ႇလူင်သမ်ႉ လႆႈပၼ်ပဵၼ် ႁူဝ်ႁဵင်ယႂၼ်ႊ ၸိူဝ်းၼႆႉ။ ၵႃႈၶွၼ်ႇၼႆႉ တႃႇငိုၼ်းလိူၼ်ၵူၺ်း။ ႁဝ်းၶႃႈ ပိုတ်ႇႁၢၼ်ႉဝႆႉသေတႃႉ ဢမ်ႇပေႃးလႆႈၶၢႆလီ ၶွၼ်ႇသမ်ႉလႆႈသႂ်ႇၼမ်လႄႈ ပဵၼ်ဢၼ်ယၢပ်ႇၽိုတ်ႇဝႆႉ”- ဝႃႈၼႆ။

သိုပ်ႇလၢတ်ႈဝႃႈ – “ဢၼ်သိုၵ်းဝႃႉ ၵဵပ်းၶွၼ်ႇၼႆႉ မီးသွင်မဵဝ်း တေပဵၼ်ၶွၼ်ႇယုၵ်းယၢၵ်းလႄႈ ၶွၼ်ႇၸုမ်းသိုၵ်းၶဝ်။ တႃႇသႂ်ႇၶွၼ်ႇၼႆႉၵေႃႈ မီးလွင်ႈယၢပ်ႇၽိုတ်ႇဝႆႉ ႁဝ်းၶႃႈ ယွၼ်းႁႂ်ႈလူတ်းယွမ်းပၼ်ဢိတ်းၼိုင်ႈၼႆၵေႃႈ ၶဝ်ဢမ်ႇယွမ်းပၼ် ၶႃႈ”- ဝႃႈၼႆ။

ဢိင်ၼိူဝ် လွင်ႈၼႆႉသေ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇ ၽူႈၶၢၼ်ပၢၵ်ႇ UWSA ၵေႃႈ ဢမ်ႇလႆႈ။

ယူႇတီႈ ၵူၼ်းမိူင်းပိုၼ်ႉတီႈတႄႉ ၼင်ႇႁိုဝ် တေၸၢင်ႈႁႃၵိၼ်လဵင်ႉတွင်ႉ လႆႈငၢႆႈလူမ်ၸႂ်ၼၼ်ႉ တုၵ်းယွၼ်း ႁႂ်ႈသိုၵ်းဝႃႉ UWSA လူတ်းယွမ်းပၼ်ၵၢၼ်ၵဵပ်းၶွၼ်ႇ ၸိူဝ်းၼႆႉၽွင်း ဝႃႈၼႆ။

“မိူၼ်ၼင်ႇ ႁဝ်းၶႃႈၼႆႉ ပေႃးလႆႈသႂ်ႇၶွၼ်ႇၼႆ သမ်ႉပဵၼ်ငိုၼ်းၶႄႇလႄႈ တွၼ်ႈတႃႇႁဝ်းၶႃႈတႄႉ လႆႈသဵင်ႈငိုၼ်းၼမ်။ ပေႃးဝႃႈမွၵ်ႈ 200 ယႂၼ်ႊၼႆ မႅၼ်ႈငိုၼ်းမၢၼ်ႈ ပဵၼ်လၢႆမိုၼ်ႇပျႃးယဝ်ႉ။ ၵူၼ်းၶၢႆႁၢၼ်ႉၶဝ် မီးလွင်ႈယၢပ်ႇၽိုတ်ႇၵၼ် ၵူႈႁၢၼ်ႉယဝ်ႉ။ ၵွပ်ႈၼႆလႄႈ ၶွၼ်ႇၼႆႉ သင်ပဵၼ်လႆႈယႃႇၵဵပ်းၼမ်။ ပေႃးဝႃး လူတ်းယွမ်းၵႃႈၶွၼ်ႇပၼ်ၼႆ ႁဝ်းၵေႃႈ တေမီးငိုၼ်းၶဝ်ႈလူမ်ၸႂ် ႁႃၵိၼ်ငၢႆႈမိူၼ်ၵူႈပွၵ်ႈၶႃႈဢေႃႈ”- ၵူၼ်းပိုၼ်ႉတီႈ ဝဵင်းႁူဝ်ပၢင်ႇ လၢတ်ႈၼႄၼင်ႇၼႆ။

ဝဵင်းႁူဝ်ပၢင်ႇၼႆႉ ၸုမ်းဢူၺ်းလီပွတ်းႁွင်ႇသၢမ်ၸုမ်း ယိုတ်းၵုမ်းလႆႈ မိူဝ်ႈႁူဝ်ပီ 2024 သေ မွပ်ႈပၼ်သိုၵ်း ဝႃႉ UWSA ၽွင်းငမ်းဝႆႉ။ ယၢမ်းလဵဝ် တီႈဝဵင်းႁူဝ်ပၢင်ႇၼႆႉ မီးၵူၼ်းပၢႆႈၽေးသိုၵ်း ဢၼ်လုၵ်ႉတၢင်းဝဵင်း လႃႈသဵဝ်ႈ မႃးသွၼ်ႈယူႇဝႆႉတင်းၼမ်လႄႈ တႃႇၵူၼ်းပၢႆႈၽေးၶဝ်ၵေႃႈ မီးလွင်ႈယၢပ်ႇတႃႇႁႃၵိၼ်လဵင်ႉ တွင်ႉ။

တႄႇဢဝ်မိူဝ်ႈလိူၼ်ဢေႃႊၵတ်ႊသ် ပီ 2024 ၼၼ်ႉမႃး ၾၢႆႇမိူင်းၶႄႇသမ်ႉ ပိၵ်ႉဢိုတ်းၽၵ်းတူလႅၼ်လိၼ် တီႈမၢၼ်ႈ ၶႃး၊ ၼမ်ႉတိုၵ်း ဢၼ်မီးၼႂ်းၸႄႈဝဵင်းႁူဝ်ပၢင်ႇထႅင်ႈလႄႈ ၵူၼ်းပိုၼ်ႉတီႈ ယိင်ႈၶႅၼ်းထူပ်းလွင်ႈယၢပ်ႇ တႃႇႁႃသိုဝ်ႉၶူဝ်းၵုၼ်ႇၶွင်ၵိၼ်ယႅမ်ႉ ၸိူဝ်းၼႆႉပႃး။