မိူဝ်ႈဝႃး ဝၼ်းတီႈ 16/1/2025 ၵၢင်ဝၼ်းတဵင်ႈ 12 မူင်း ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇ တီႈထုင်ႉၵျွၵ်ႉၵူႇ ၼႂ်းၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်း။

တပ်ႉသိုၵ်းပူတ်းပွႆႇၵူၼ်းမိူင်းထၼု DPLA လႄႈ သိုၵ်းမၢၼ်ႈ ယိုတ်းမိူင်း ပဵၼ်ပၢင်တိုၵ်းၵၼ် ႁၢဝ်ႈ ႁႅင်းသေ သိုၵ်းမၢၼ်ႈ ဢဝ်ၶိူင်ႈမိၼ်မႃးပွႆႇမၢၵ်ႇ ဝႃႈၼႆ။

ၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“မႃးပွႆႇထပ်းၵၼ် 5-6 ပွၵ်ႈယဝ်ႉ၊ တေႃႇထိုင်ဝၢႆးဝၼ်းၼႆႉ ၶိူင်ႈမိၼ်တိုၵ်ႉမိၼ်ယူႇ၊ မၢၵ်ႇတူၵ်းတီႈလႂ်တႄႉတႄႉ ပႆႇႁူႉ၊ ႁိမ်းႁွမ်းၵျွၵ်ႉၵူႇၼႆႉၵူၺ်း၊ ၵူၼ်းဝၢၼ်ႈ တႄႉ ပၢႆႈၸဵမ်ဝၼ်းပၢင်တိုၵ်း တႄႇပဵၼ်ၼၼ်ႉယဝ်ႉ”- ဝႃႈၼႆ။

ၵဵဝ်ႇလွင်ႈသိုၵ်းမၢၼ်ႈ မႃးပွႆႇမၢၵ်ႇၼႆႉသေ ယူႇတီႈ ၸုမ်းၶၢဝ်ႇၽူႈတွႆႇႁွၵ်ႈ ၵပ်းသိုပ်ႇၸွပ်ႇထၢမ် ဝႆႉထႅင်ႈ ႁူဝ်ယွႆႈမၼ်းယူႇ။

မိူဝ်ႈဝႃး သိုၵ်းထၼု (DPLA) ပိုၼ်ၽၢဝ်ႇလၢတ်ႈဝႆႉဝႃႈ ၾၢႆႇတၢင်းသိုၵ်းမၢၼ်ႈ ပိုတ်းယိုဝ်း ၵွင်ႈလူင် လႄႈ မီးၵူၼ်းမၢတ်ႇၸဵပ်း ဝႃႈၼႆ။  တီႈထုင်ႉၵျွၵ်ႉၵူႇၼႆႉ ၾၢႆႇတင်းသိုၵ်းမၢၼ်ႈ ထႅမ်ဢဵၼ်ႁႅင်းမႃး ၶိူဝ်းယႂ်းလႄႈ ပဵၼ်ပၢင်တိုၵ်းၵၼ် ႁၢဝ်ႈႁႅင်း။

ၼႂ်းဝၼ်းတီႈ 14/1/2025 ယၢမ်းၵၢင်ၼႂ် 2 မူင်း သိုၵ်းမၢၼ်ႈ ယိုဝ်းၵွင်ႈလူင်လႄႈ ႁိူၼ်း ၵူၼ်းပိုၼ်ႉ တီႈလူႉၵွႆ 2 လင်။ ဝၼ်းတီႈ 15/1/2025 သိုၵ်းမၢၼ်ႈ ယိုဝ်းၵွင်ႈလူင်လႄႈ ၵူၼ်းပိုၼ်ႉတီႈ မၢတ်ႇ ၸဵပ်းၵေႃႉ 1 ၼႆ သိုၵ်းထၼု (DPLA ) ပိုၼ်ၽၢဝ်ႇဝႆႉ ၼင်ႇၼႆ။

ၽူႈၶၢၼ်ပၢၵ်ႇ (DPLA ) လၢတ်ႈၽူႈတွႆႇႁွၵ်ႈဝႃႈ -“ဢၼ်ႁိူၼ်းၵူၼ်းဝၢၼ်ႈ ၾႆးမႆႈၼၼ်ႉတႄႉ ပဵၼ် ယွၼ်ႉသိုၵ်းမၢၼ်ႈ ယိုဝ်းၵွင်ႈလူင်သႂ်ႇလႄႈ မႆႈၵူၺ်း။ ၵူၼ်းဝၢၼ်ႈမၢတ်ႇၸဵပ်း ၵေႃႉၼိုင်ႈ ယၢမ်း လဵဝ် ႁဝ်းၶႃႈ ယူတ်းယႃပၼ်ဝႆႉယူႇ ၊ ၶႅၼ်းမႃးယဝ်ႉ ဢမ်ႇလႆႈမႆႈၸႂ်”- ဝႃႈၼႆ။

ၾၢႆႇတၢင်းသိုၵ်းမၢၼ်ႈ ဢဝ်ၵူၼ်းမိူင်းႁဵတ်းပဝ်ႉမၢႆသေ ပိုတ်းယိုဝ်း ၵွင်ႈလူင်တူၵ်းတိူဝ်ႉ တီႈဝၢၼ်ႈ ၶႄးၵျႃး (ခဲကြား)လႄႈ ၽတ်ႉယိၼ်းၵူင်း(ဖက်ရင်းကုန်း) သေ ႁဵတ်းႁႂ်ႈၾႆးမႆႈႁိူၼ်း ၵူၼ်းပိုၼ်ႉတီႈ ဝႃႈၼႆ။  

ယၢမ်းလဵဝ် တီႈထုင်ႉၵျွၵ်ႉၵူႇၼႆႉ ပၢင်တိုၵ်းသိုပ်ႇပဵၼ်ႁၢဝ်ႈႁႅင်းဝႆႉသေ ၵူၼ်းပိုၼ်ႉတီႈလႆႈပၢႆႈၽေး သိုၵ်းၼပ်ႉႁူဝ်ႁဵင်။ ၵူၼ်းဝၢၼ်ႈပယိၼ်း (ပယင်း) ၊ ဝၢၼ်ႈထမိၼ်းပွင်း (ထမင်းပေါင်း) လႄႈ ဝၢၼ်ႈၼွင်ဝူဝ်း လႆႈပၢႆႈဝႆႉတင်းဝၢၼ်ႈ လင်ႁိူၼ်းၵူၼ်း 100 ပၢႆ ဝႃႈၼႆ။

ထုင်ႉၵျွၵ်ႉၵူႇၼႆႉ ယၢၼ်ၵႆၵၼ်တင်း ဝၢၼ်ႈတွင်းၶမ်း 30 လၵ်း ၊ ဢၼ်သိုၵ်းမၢၼ်ႈတင်း သိုၵ်းတ ဢၢင်း TNLA ပဵၼ်ပၢင်တိုၵ်းၵၼ်ၼၼ်ႉ ဝႃႈၼႆ။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)