ဝၼ်းတီႈ 15/01/2025 မိူဝ်ႈဝႃး ၽူႈၼမ်းၸုမ်းတပ်ႉပႂ်ႉလႅၼ်လိၼ်ယၢင်းၽိူၵ်ႇ BGF လႄႈ ၽူႈၼမ်းတပ်ႉ သိုၵ်းယၢင်း ၽိူၵ်ႇၵမ်ႉၸွႆႈ တီႇမူဝ်ႇၶရေႇသီႇ DKBA ႁူပ်ႉၵၼ်တင်း ၸဝ်ႈပၢႆးမၢၵ်ႈမီးမိူင်းၶႄႇ တီႈဝဵင်းမျႃႉဝတီႇ လႅၼ်လိၼ်ထႆး – မၢၼ်ႈ ဢုပ်ႇၵုမ်ၵၼ် လွင်ႈၵၢၼ်လွၵ်ႇလႅၼ်ၵိၼ်ငိုၼ်းၵျႃးၽႅၼ်ႉ ဝႃႈၼႆ။

တီႈပၢင်ထူပ်းၵၼ်ၼၼ်ႉ လႆႈဢုပ်ႇၵၼ်လွင်ႈ လၵ်ႉလွမ်ၶၢမ်ႈလႅၼ်လိၼ်၊ လွင်ႈလွၵ်ႇလႅၼ်ၵိၼ်ငိုၼ်းတင်း ဢွၼ်ႊလၢႆႊ၊ ၵၢၼ်ၵႃႉၶၢႆၵူၼ်း ၸိူဝ်းၼႆႉသေ ဢုပ်ႇၵၼ်ပႃးလွင်ႈမၢႆမီႈ ဢၼ်ၸဝ်ႈပၢႆးမၢၵ်ႈမီး ၶဝ်ထုၵ်ႇလီလႆႈႁဵတ်းၸွမ်း။

ၼႂ်းမၢႆမီႈၼၼ်ႉပႃးဝႆႉဝႃႈ – ၸဝ်ႈပၢႆးမၢၵ်ႈမီး ၸိူဝ်းၼႆႉ တေဢမ်ႇလႆႈႁဵတ်းၵၢၼ်ၵႃႉၶၢႆၵူၼ်း၊ လွၵ်ႇလႅၼ်ၵိၼ်ငိုၼ်း၊ တေဢမ်ႇလႆႈၸႂ်ႉၵိၼ်ႁႅင်းလၢႆ လုၵ်ႈဢွၼ်ႇ၊ ၵူၼ်းၼင်ႇၵၼ် တေဢမ်ႇလႆႈတဵၵ်းတဵင်ပေႉၵိၼ်ၵၼ်၊ တေဢမ်ႇလႆႈဢဝ်ငိုၼ်း တီႈၸုမ်းလွၵ်ႇလႅၼ်ၵိၼ်ငိုၼ်း ၸိူဝ်းၼၼ်ႉ လႃးလႃး။

ပေႃးႁၼ်ၸုမ်းႁဵတ်းၵၢၼ် ၸိူဝ်းၼၼ်ႉၵေႃႈ ႁႂ်ႈပွင်ႇၶၢဝ်ႇၸူးပၼ်ၸုမ်းယိပ်းၵွင်ႈၵၢင်ႇ၊ တပ်ႉပႂ်ႉလႅၼ်လိၼ် ၵမ်းလဵဝ်။ သင်ဢမ်ႇၸွမ်းမၢႆမီႈၸိူဝ်းၼႆႉၸိုင် တေထုၵ်ႇတီႉၺွပ်း ယိုတ်းဢဝ်ၶူဝ်းၶွင်လႄႈ ႁၢမ်ႈႁဵတ်းၵၢၼ်ၼႂ်းပိုၼ်ႉတီႈ၊ တေထုၵ်ႇလိုပ်ႈဢွၵ်ႇပိုၼ်ႉတီႈၵမ်းလဵဝ် – ဝႃႈၼႆ။

တီႈပၢင်ၵုမ်ၼၼ်ႉ ၾၢႆႇတၢင်းသိုၵ်းယၢင်းတႄႉ – ႁူဝ်ၼႃႈ BGF ယၢင်းၽိူၵ်ႇ ၸဝ်ႈသိုၵ်းလူင် ၸေႃးၶျိတ်ႉတူႇ၊ ႁူဝ်ၼႃႈ ၸုမ်းသိုၵ်း DKBA ၸဝ်ႈသိုၵ်းလူင် ၸေႃးသၢၼ်းဢွင်ႇ ဢိၵ်ႇပႃးတင်း ၽူႈၵွၼ်းတပ်ႉၶဝ်သေ ၾၢႆႇတၢင်း ၽူႈပၢႆးမၢၵ်ႈမီးၶဝ်တႄႉ မႃးၶဝ်ႈႁူမ်ႈမွၵ်ႈ 50 ။ တင်းမူတ်း ဢၼ်လႆႈႁူပ်ႉၵၼ်ၵႂႃႇ ႁူဝ်ၵူၼ်းမီးမွၵ်ႈ 60 ၼႆႉ ဝႃႈၼႆ။