ပၢင်တိုၵ်း ၼႂ်းပီ 2024 ၼႂ်းၸိုင်ႈတႆးပွတ်းၸၢၼ်း မိူၼ်ၼင်ႇ သီႇသႅင်ႇ၊ ႁူဝ်ပူင်း၊ လွႆလႅမ်၊ ပၢင်လွင်းလႄႈ ယွင်ႁူၺ်ႈ ၸိူဝ်းၼႆႉ ႁဵတ်းႁႂ်ႈၵူၼ်းမိူင်းတၢႆ 130 ၵေႃႉ မၢတ်ႇၸဵပ်း 180 ပၢႆ – ၸုမ်းၵူၼ်းၼုမ်ႇပဢူဝ်း PYO ပိုၼ်ၽၢဝ်ႇဝႆႉၼင်ႇၼႆ။
ပၢင်တိုၵ်းၼႆႉ တႄႇပဵၼ်မႃး မိူဝ်ႈဝၼ်းတီႈ 21/01/2024 တီႈဝၢၼ်ႈၸၢမ်ၽူး ထုင်ႉလွႆၼမ်ႉသွမ်ႇ (မႄးၼႄႇတွင်ႇ) သေ ၸင်ႇလၢမ်းၽႄႈမႃး လၢႆလၢႆၸႄႈဝဵင်း။
ၵူၼ်းမိူင်းၸိူဝ်းတၢႆ ၼႂ်းပိုၼ်ႉတီႈ ပၢင်တိုၵ်းၼႆႉ တၢႆယွၼ်ႉသိုၵ်းမၢၼ်ႈ ၶႃႈႁႅမ်၊ ဢၼ်တၢႆ ယွၼ်ႉၶိူင်ႈၵွင်ႈၵၢင်ႇမၢၵ်ႇလူင် သိုၵ်းမၢၼ်ႈသမ်ႉ 22 ပိူဝ်ႊသႅၼ်ႊ၊ တၢႆယွၼ်ႉၶိူင်ႈမိၼ်ပွႆႇမၢၵ်ႇသမ်ႉ 16 ပိူဝ်ႊသႅၼ်ႊၼႆ – PYO ပိုၼ်ၽၢဝ်ႇ မိူဝ်ႈဝၼ်းတီႈ 13/01/2025 ၼင်ႇၼႆ။
ၼႂ်းၵူၼ်းၸိူဝ်းမၢတ်ႇၸဵပ်းလူႉတၢႆၼႆႉ ပဵၼ်ၵူၼ်းၸၢႆး 89 ၵေႃႉ ၼၢင်းယိင်း 16 ၵေႃႉ လုၵ်ႈဢွၼ်ႇ 16 ၵေႃႉ လႄႈ ဢၼ်ဢမ်ႇႁူႉယိင်းႁႃႉၸၢႆး ပဵၼ် 6 ၵေႃႉ။ ဢၼ်မၢတ်ႇၸဵပ်းသမ်ႉ ပဵၼ်ၵူၼ်းၸၢႆး 90 ၵေႃႉ ၼၢင်းယိင်း 39 ၵေႃႉ လုၵ်ႈဢွၼ်ႇ 26 ၵေႃႉလႄႈ ဢၼ်ဢမ်ႇၸၢင်ႈၸႅၵ်ႇယိင်းၸၢႆးသမ်ႉ 34 ၵေႃႉ- ဝႃႈၼႆဝႆႉ။
ၶုၼ်ႇဢူး ၵူၼ်းၼုမ်ႇ ၼႂ်းၸုမ်းၵူၼ်းၼုမ်ႇပဢူဝ်းလၢတ်ႈဝႃႈ – “ၼႂ်းပီ 2024 ၼႆႉ ၵူၼ်းမိူင်းထုၵ်ႇ ပူၼ်ႉပႅၼ်သုၼ်ႇလႆႈသုၼ်ႇမႃးႁၢဝ်ႈႁႅင်း။ ၵွၼ်ႇၼႃႈပၢင်တိုၵ်းၼႆႉ ၵူၺ်းမီးပၼ်ႁႃ ယႃႈမဝ်းၵမ် ပၼ်ႁႃလိၼ်သူၼ်ႁႆႈၼႃး ပၼ်ႁႃၵဵပ်းၶွၼ်ႇ ၸိူဝ်းၼႆႉသေတႃႉ ထိုင်မႃးပီ 2022 မႃးၾၢႆႇၼႆႉတႄႉ ပဵၼ်ပၼ်ႁႃၶႃႈႁႅမ် ၵူၼ်းမိူင်း တၢႆပဵၼ်မူႇပဵၼ်ၾုင်၊ ပၼ်ႁႃၶႃႈႁႅမ်တၢႆသေ ပွႆႇပႅတ်ႈၼႂ်းထိူၼ်ႇၼႂ်းပႃႇ ပီႈၼွင်ႉၵူၼ်းႁိူၼ်း ဢမ်ႇလႆႈၶိုၼ်းတူဝ်တၢႆ၊ ပၼ်ႁႃၶိူင်ႈမိၼ် ပွႆႇမၢၵ်ႇတူၵ်းသႂ်ႇႁိူၼ်းယေးၵူၼ်းမိူင်းလႄႈ ပၼ်ႁႃၽဝ်ႁိူၼ်း ယေးတီႈယူႇၵူၼ်း မိူင်းၸိူဝ်းၼႆႉၼမ်မႃး”- ဝႃႈၼႆ။
ၼႂ်းပီ 2024 ၼႆႉ ပျီႇတူႉၸိတ်ႉပဢူဝ်း PNA ၵဵပ်းသိုၵ်းမႂ်ႇ။ ၶဝ်ပိုၼ်ၽၢဝ်ႇဝႃႈ ၵူၼ်းသိုၵ်းမႂ်ႇၶဝ် မီးထိုင် 5 မိုၼ်ႇၵေႃႉ ဝႃႈ ၼႆသေတႃႉ ၵူၼ်းပိုၼ်ႉတီႈလၢတ်ႈဝႃႈ ၶဝ်ႁွင်ႉၵူၼ်းဝၢၼ်ႈၵႂႃႇၼႄဢဵၼ်ႁႅင်းၵူၺ်း – ဝႃႈၼႆ။
ၵူၼ်းဝၢၼ်ႈလၢတ်ႈဝႃႈ ၽွင်းၶဝ်လူင်းပိုၼ်ႉတီႈ ႁူၺ်းသူၼ်းၵူၼ်းမိူင်းၶဝ်ႈႁၢပ်ႇၵၢၼ်သိုၵ်းၼၼ်ႉ ၶဝ်လၢတ်ႈဝႃႈ -“ပေႃး ၶဝ်ႈႁၢပ်ႇၵၢၼ်သိုၵ်း ၼႂ်းပျီႇတူႉၸိတ်ႉၼႆ တေဢမ်ႇလႆႈၶဝ်ႈသိုၵ်းမၢၼ်ႈ။ ယွၼ်ႉဝႃႈ ပေႃးၶဝ်ၾိုၵ်းပၼ်ယဝ်ႉ ပဵၼ်တႃႇၵႅတ်ႇၶႄဝၢၼ်ႈဢိူင်ႇၵူၺ်း ဢမ်ႇၸႂ်ႈတႃႇဢွၵ်ႇၼႃႈသိုၵ်း – ဝႃႈၼႆသေတႃႉ ၵမ်ႈၽွင်ႈၵေႃႈ လႆႈၾိုၵ်းၵၢၼ်သိုၵ်း 1 လိူၼ်၊ ၵမ်ႈၽွင်ႈလႆႈၾိုၵ်း 15 ဝၼ်း၊ ၵမ်ႈၽွင်ႈ 10 ဝၼ်း၊ ၵမ်ႈၽွင်ႈ 3 ဝၼ်းၵူၺ်းသေ ထုၵ်ႇသူင်ႇၼႃႈသိုၵ်း”- ဝႃႈၼႆ။
ဝၼ်းတီႈ 9/1/2025 ၼၼ်ႉ သိုၵ်းၽွမ်ႉႁူမ်ႈယၢင်းလႅင် ၶဝ်ႈယိုဝ်းတပ်ႉပၢင်သဝ်းပျီႇတူႉၸိတ်ႉ PNO တီႈဝၢၼ်ႈသူၺ်ႇတၵူႇ ၸႄႈဝဵင်းသီႇသႅင်ႇ၊ သိုၵ်းၽွမ်ႉႁူမ်ႈယၢင်းလႅင် တီႉလႆႈၵူၼ်းသိုၵ်းပျီႇတူႉၸိတ်ႉ 10 ပၢႆ။ ၼႂ်းၼၼ်ႉ ပႃးလုၵ်ႈဢွၼ်ႇ ၸၢႆးဢွၼ်ႇ ဢႃယု 13 လႄႈ 14 – 2 ၵေႃႉ လူးၵွၼ်ႇ – ၼႆ သိုၵ်းၽွမ်ႉႁူမ်ႈယၢင်းလႅင်ပိုၼ်ၽၢဝ်ႇၼင်ႇၼႆ။
ၶုၼ်ႇဢူး သိုပ်ႇလၢတ်ႈထႅင်ႈဝႃႈ – “တီႈဝဵင်းပၢင်လွင်း၊ ယွင်ႁူၺ်ႈ၊ သီႇသႅင်ႇ ၸိူဝ်းၼႆႉ တေႃႇထိုင်ယၢမ်းလဵဝ် ငဝ်းလၢႆး ၵၢၼ်သိုၵ်း တိုၵ်ႉၶဵင်ႈၶႅင်ၵၼ်ယူႇ။ ၼႂ်းပီ 2025 ၼႆႉ ပၢင်တိုၵ်း တေသိုပ်ႇပဵၼ်ထႅင်ႈယူႇ ငဝ်းလၢႆးမၼ်းတႄႉ”- ဝႃႈၼႆ။
တေႃႇထိုင်ယၢမ်းလဵဝ် ၼႂ်းၸႄႈဝဵင်းသီႇသႅင်ႇ၊ ပၢင်လွင်း၊ ၾၢႆၶုၼ် ၸိူဝ်းၼႆႉ သိုၵ်းမၢၼ်ႈ ႁူမ်ႉပျီႇတူႉၸိတ်ႉပဢူဝ်းလႄႈတင်း ၸုမ်းသိုၵ်းၸၢဝ်းၶိူဝ်းၶဝ် တိုၵ်ႉထႅမ်ႁႅင်းသိုၵ်းၶဵင်ႈၶႅင်ဝႆႉယူႇ ႁင်းၽႂ်မၼ်း ၵူၼ်းဝၢၼ်ႈလၢတ်ႈၼင်ႇၼႆ။
ဢိင်ၼိူဝ် ပၢင်တိုၵ်းထုင်ႉၼၼ်ႉ ပဵၼ်မႃးႁိုင်ၼၢၼ်းသေ တေႃႇထိုင်ယၢမ်းလဵဝ် ပႆႇယဝ်ႉပႆႇတူဝ်ႈလႄႈ ၵူၼ်းဝၢၼ်ႈၵူၼ်းမိူင်း 65,000 ပၢႆ လူဝ်ႇတၢင်းၸွႆႉထႅမ် လွင်ႈၶဝ်ႈၼမ်ႉတၢင်းၵိၼ်ဝႆႉ ႁၢဝ်ႈႁႅင်းၼႆ – ၸုမ်းၵူၼ်းၼုမ်ႇပဢူဝ်း ပိုၼ်ၽၢဝ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ