ပၢင်တိုၵ်း RCSS လႄႈ SSPP သိုပ်ႇပဵၼ်ၼႂ်းၸႄႈဝဵင်းၼမ်ႉၸၢင် မိူဝ်ႈဝႃး ဝၼ်းတီႈ 15/1/2025 ယၢမ်းႁူဝ်ၶမ်ႈ မၢၵ်ႇလူင်တူၵ်းသႂ်ႇ ႁွင်ႈယူတ်းယႃတူဝ် တီႈဝၢၼ်ႈၼမ်ႉမူဝ် ဢိူင်ႇၼွင်ႁီး။

ၼၢင်းယိင်း ပၢႆႈၽေးသိုၵ်း ႁွတ်ႈထိုင်ဝဵင်းၼမ်ႉၸၢင် လၢတ်ႈၽူႈတွႆႇႁွၵ်ႈဝႃႈ– “ၶမ်ႈဝႃး မၢၵ်ႇမႃးတူၵ်း တီႈႁူင်းယႃ (ဝၢၼ်ႈၼမ်ႉမူဝ်) တူၵ်းသႂ်ပၢႆႉႁူင်းယႃ ၵူၼ်းတႄႉ ဢမ်ႇပဵၼ်သင် မေႃယႃၶဝ် ဢွၼ်ၵၼ်တူၵ်းၸႂ်မူတ်း”- ဝႃႈၼႆ။

ပၢင်တိုၵ်း တီႈဝၢၼ်ႈၼမ်ႉမူဝ်ၼႆႉ ပဵၼ်ႁၢဝ်ႈႁႅင်းမႃး 10 ဝၼ်းပၢႆယဝ်ႉ။ ၵူၼ်းဝၢၼ်ႈႁူဝ်ၶူဝ်၊ ၵုၼ်သၢႆး၊ ဝၢၼ်ႈပၢင်ႇ၊ ၼမ်ႉ ဢုတ်ႇ ဢၼ်လႆႈငိၼ်းသဵင်ၵွင်ႈ သဵင်မၢၵ်ႇၸမ်ၼၼ်ႉ ဢွၼ်ၵၼ်ပၢႆႈၶဝ်ႈ သွၼ်ႈယူႇၼႂ်းဝၢၼ်ႈၼမ်ႉမူဝ်။ ၶမ်ႈဝႃးၼႆႉ မၢၵ်ႇမႃးတူၵ်းထိုင် ၼႂ်းဝၢၼ်ႈယဝ်ႉလႄႈ ၵူၼ်းဝၢၼ်ႈ ဢိၵ်ႇ ၵူၼ်းပၢႆႈမႃးသွၼ်ႈယူႇဝႆႉၼႂ်းဝၢၼ်ႈ ဢွၼ်ၵၼ်တူၵ်းၸႂ်ၵူဝ်ႁႄသေ ဢွၼ်ၵၼ်ပၢႆႈဢွၵ်ႇ ဝၢၼ်ႈထႅင်ႈ – ဝႃႈၼႆ။ 

ၼၢင်းယိင်း ၵူၼ်းဝၢၼ်ႈၼမ်ႉမူဝ် လၢတ်ႈၽူႈတွႆႇႁွၵ်ႈဝႃႈ -“သိုၵ်းဝႃႉ (သိုၵ်း SSPP ဢၼ်လၢတ်ႈ ၵႂၢမ်းဝႃႉ) ပွႆႇမၢၵ်ႇတူၵ်းသႂ်ႇႁူင်းယႃတႆး ၼႂ်းဝၢၼ်ႈႁဝ်း။ ၵူၼ်းၼႂ်းဝၢၼ်ႈဢွၼ်ၵၼ် ပၢႆႈထႅင်ႈ မိူဝ်ႈၼႆႉ၊ တူၵ်းၸမ်ဝၢၼ်ႈႁႅင်းၼႃႇ၊ ၵူၼ်းမၢတ်ႇၸဵပ်းတႄႉဢမ်ႇမီး၊ ပေႃးသဵင်မၢၵ်ႇဢွၵ်ႇႁႅင်းၵေႃႈ ဢွၼ်ၵၼ်ပၢႆႈဝႆႉထႃႈယဝ်ႉလႄႈဢေႃႈ၊ ၵူဝ်မၢၵ်ႇမႃးတူၵ်းသႂ်ႇ၊ ၶဝ်သမ်ႉ တေႃႈလဵဝ်ႁိမ်ၼႃႈတီႈၵၼ်ဝႆႉ”- ဝႃႈၼႆ။

ၵူၼ်းမိူင်း ဝဵင်းၼမ်ႉၸၢင်လၢတ်ႈၼႄဝႃႈ –  ထုင်ႉၼၼ်ႉ သိုၵ်း RCSS တူင်ႉၼိုင်ယူႇသဝ်း။ သိုၵ်း ဝႃႉ ဢၼ်ၵူၼ်းဝၢၼ်ႈဝႃႈၼၼ်ႉသမ်ႉ ပဵၼ်ၵူၼ်းသိုၵ်း SSPP ဢၼ်လၢတ်ႈၵႂၢမ်းဝႃႉ (ဢမ်ႇလၢတ်ႈ ၵႂၢမ်းတႆး)။ ၼၼ်ႉသမ်ႉ တူင်ႉၼိုင်တၢင်း ၼွၵ်ႈဝၢၼ်ႈၾၢႆႇဢွၵ်ႇဝဵင်းလၢႆးၶႃႈ လူင်းမႃးတၢင်းၸၢၼ်း ။

ၼၢင်းယိင်း ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၵူၼ်းပၢႆႈၽေးသိုၵ်း ဢၼ်မႃးသွၼ်ႈယူႇဝႆႉ တီႈၼႂ်းဝၢၼ်ႈၵေႃႈ ၵမ်း ၼႆႉ ဢွၼ်ၵၼ်ပၢႆႈထႅင်ႈ ၶဝ်ႈယူႇၼႂ်းဝဵင်းဢေႃႈ၊ မိူဝ်ႈဢွၼ်တၢင်းပၢင်တိုၵ်း ပဵၼ်ၶႅပ်ႇဝၢၼ်ႈၵူၺ်းသေတႃႉ၊ ၵမ်းၼႆႉ မၢၵ်ႇမႃးတူၵ်းတီႈဝၢၼ်ႈ ၸမ်မႃးလွႆးလွႆး ၵူၼ်းဝၢၼ်ႈၵေႃႈ ပၢႆႈပၢႆႈပွၵ်ႈပွၵ်ႈ”- ဝႃႈၼႆ။

ႁူင်းယႃ ဢၼ်မီးတီႈဝၢၼ်ႈၼမ်ႉမူဝ်ၼၼ်ႉ ပဵၼ်ႁူင်းယႃ ဢၼ်သိုၵ်း RCSS မႃးပိုတ်ႇယူတ်းယႃ ပၼ်ၵူၼ်းပိုၼ်ႉတီႈ ၼႂ်းဝၢၼ်ႈ။ ပိုတ်ႇမႃးၸဵမ်ပီ 2018 ၊ ယူတ်းယႃပၼ်ၵူၼ်းဝၢၼ်ႈၵူၼ်းသူၼ်။ မီးမေႃယႃ 7-8  ၵေႃႉ – ၵူၼ်းပိုၼ်ႉတီႈလၢတ်ႈၼႄၽူႈတွႆႇႁွၵ်ႈၼင်ႇၼႆ။

ၵဵဝ်ႇလူၺ်ႈလွင်ႈၼႆႉ ၽူႈတွႆႇႁွၵ်ႈလႆႈၵပ်းသိုပ်ႇၸူး ၸဝ်ႈသိုၵ်း ဢုမ်ႈၶိူဝ်း ၽူႈၶၢၼ်ပၢၵ်ႇ RCSS လၢတ်ႈဝႃႈ – “လွင်ႈၼႆႉတႄႉ ပႆႇလႆႈငိၼ်း” – ဝႃႈၼႆ။

လွင်ႈၼႆႉ ၾၢႆႇတၢင်း SSPP ၵေႃႈ ၽူႈတွႆႇႁွၵ်ႈ ၵပ်းသိုပ်ႇတူၺ်းယူႇ။ ၵူၺ်းၵႃႈ ၵပ်းသိုပ်ႇဢမ်ႇလႆႈ။

တၢင်းဢိူင်ႇၼွင်ႁီးၼႆႉ တေႃႇထိုင်ဝၼ်းမိူဝ်ႈၼႆႉ သဵင်ၵွင်ႈဢမ်ႇပႆႇယဵၼ်လႄႈ ၵူၼ်းဝၢၼ်ႈၼမ်ႉမူဝ် ဢမ်ႇႁတ်းမိူဝ်း ဢဝ်မၢၵ်ႇၶဝ်ႈတဝ်ႈၼမ်ႉၶိုၼ်း။ ပဵၼ်ဢၼ်ယၢပ်ႇၽိုတ်ႇ တႃႇလဵင်ႉလူၵၼ်။

ဝၢၼ်ႈၼမ်ႉမူဝ်ၼႆႉ မီးၾၢႆႇၸၢၼ်းဝဵင်းလၢႆးၶႃႈ မီးၾၢႆႇႁွင်ႇဝဵင်းၼမ်ႉၸၢင် ယၢၼ်ၵႆၵၼ်တၢင်း ဝဵင်း 13 လၵ်း။ ပဵၼ်ပီႈၼွင်ႉတႆးလႄႈ ပီႈၼွင်ႉယၢင်းလၢႆး ယူႇႁူမ်ႈၵၼ်။

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)