ၼႂ်းလိူၼ်ၵျႅၼ်ႊၼိဝ်ႊရီႊ ပီ 2025 ၶၢဝ်းတၢင်း 2 ဝူင်ႈမႃးၼႆႉ သိုၵ်းမၢၼ်ႈ ယိုတ်းမိူင်း ၸႂ်ႉၶိူင်ႈမိၼ်ပွႆႇမၢၵ်ႇသႂ်ႇ ဢမ်ႇယွမ်း 15 ၵမ်း တႃႇ 13 ဝဵင်း ၼႂ်းမိူင်းႁူမ်ႈတုမ်မၢၼ်ႈ ပတ်းပိုၼ်ႉ ၵူၼ်းမိူင်းလူႉတၢႆၸမ် 100 ၵေႃႉ ဝႃႈၼႆ။
ပူၼ်ႉမႃး ဝၼ်းတီႈ 13/1/2025 ၼႂ်းဝၼ်းလဵဝ် ၶိူင်ႈမိၼ်သိုၵ်းမၢၼ်ႈ ပွႆႇမၢၵ်ႇတီႈဝဵင်းၵျွၵ်ႉမႄး မိူင်းတႆးပွတ်းႁွင်ႇလႄႈ ဝဵင်းၽႃၵၢၼ်ႉ ၸႄႈမိူင်းၶၢင်။
မိူဝ်ႈဝၼ်းတီႈ 10/1/2025 ၼၼ်ႉ ၼႂ်းဝၼ်းပီမႂ်ႇမိူင်းၶၢင် သိုၵ်းမၢၼ်ႈ သူင်ႇလိၵ်ႈၵႂႃႇ ၵဵဝ်ႇၵပ်းလွင်ႈငမ်းယဵၼ်သေတႃႉ ထိုင်မႃးၼႂ်းဝၼ်းတီႈ 11 ၶိူင်ႈမိၼ်သိုၵ်းမၢၼ်ႈ ၵႂႃႇပွႆႇမၢၵ်ႇသႂ်ႇ ႁဵတ်းႁႂ်ႈၵူၼ်းမိူင်း လႆႈမၢတ်ႇ ၸဵပ်းလူႉတၢႆ။
ၼႂ်းမိူင်းႁူမ်ႈတုမ်မၢၼ်ႈ ပတ်းပိုၼ်ႉၼႆႉ သိုၵ်းမၢၼ်ႈ သုမ်းသိုၵ်း သုမ်းပႃးၶိူင်ႈၵွင်ႈၵၢင်ႇ မၢၵ်ႇမိုဝ်ႉၸိုၼ်းယၢမ်း တင်းၼမ်။ ၽွင်းၼင်ႇၼႆ သိုၵ်းမၢၼ်ႈမွၵ်ႇႁွင်ႉ ႁႂ်ႈၸုမ်းယိပ်းၵွင်ႈၵၢင်ႇၸၢဝ်းၶိူဝ်းတင်း ၸုမ်းလုၵ်ႉၽိုၼ်ႉဝၢင်းၶိူင်ႈသေ ဢုပ်ႇဢူဝ်းၵၢၼ်ငမ်းယဵၼ်။
ၾၢႆႇၼိုင်ႈသမ်ႉ ၼႂ်းႁူဝ်ပီ 2025 ၼႆႉ သိုၵ်းမၢၼ်ႈ ၽိူမ်ႉထႅမ်ၶိူင်ႈမိၼ်တိုၵ်း 2 လမ်းသေ တိူဝ်းပွႆႇမၢၵ်ႇယူႇၶိူဝ်းယႂ်းႁဵတ်း ႁႂ်ႈၵူၼ်းမိူင်း လႆႈမၢတ်ႇၸဵပ်းလူႉတၢႆ ႁိူၼ်းယေးၵူၼ်းမိူင်း လူႉၵွႆၼမ် – သိုဝ်ႇၶၢဝ်ႇ The Irrawaddy ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ