ၸုမ်းသၢၼ်ၶတ်း ၽဵဝ်ႈမူၺ်ႉၵၢၼ်ၵႃႉၵူၼ်း ၵူႈမိူင်းမိူင်းၼႂ်းလုမ်ႈၾႃႉ တႅမ်ႈလိၵ်ႈယိုၼ်ႈထိုင် ၶွမ်ႊမသျိၼ်ႊ သုၼ်ႇလႆႈ ၵူၼ်းမိူင်းထႆးဝႃႈ ယၢမ်းလဵဝ် ၼႂ်းမိူင်းမၢၼ်ႈၼႆႉ ၵၢၼ်လွၵ်ႇလႅၼ်ၵိၼ်ငိုၼ်းလိူင်ႇၼမ်မႃးလိူဝ် ႁႅင်း ၵူၼ်းမိူင်း 21 ၸိုင်ႈမိူင်းၼႂ်းလုမ်ႈၾႃႉ ႁူဝ်ၼပ်ႉၵူၼ်း 6,000 ပၢႆ ထုၵ်ႇၵုမ်းၶင်သေ ၸႂ်ႉၵိၼ်ႁႅင်း ၼႂ်းၵၢၼ်လွၵ်ႇလႅၼ်ၵိၼ်ငိုၼ်း တင်း ဢွၼ်ႊလၢႆႊဝႆႉ ဝႃႈၼႆ။

ၽိုၼ်ၶၢဝ်ႇThe Nation  တႅမ်ႈဢွၵ်ႇပိုၼ်ၽၢဝ်ႇဝႃႈ – ဢၼ်မႃးယိုၼ်ႈလိၵ်ႈၸူးၸုမ်းသုၼ်ႇလႆႈၵူၼ်း မိူင်းထႆးၼႆႉ ပဵၼ် ၸုမ်းၼႅင်ႈသၢၼ် ၸုမ်းၸွႆႈထႅမ်တူၺ်းလူ ၵူၼ်းၸိူဝ်းထုၵ်ႇလွၵ်ႇလႅၼ်ၵႃႉၶၢႆ 9 ၸိုင်ႈမိူင်းၼႂ်းလုမ်ႈ ၾႃႉ။ ၸိူဝ်းၶဝ် ႁူမ်ႈ ၵၼ်တႅမ်ႈလိၵ်ႈတၢင်ႇထိုင် မိူဝ်ႈဝၼ်းတီႈ 10/1/2025 ။ ၼႂ်းၽိုၼ်ႁၢႆးငၢၼ်းၼၼ်ႉ ပႃးဝႆႉဝႃႈ ႁႂ်ႈမိူင်းထႆး ၸွႆႈထႅမ်တူၺ်းလူပၼ် ၸွႆႈၵႅတ်ႇၶႄႁႄႉၵင်ႈပၼ်သေၵမ်း ဝႃႈၼႆ။

ၵူၼ်းမိူင်း 21 မိူင်းၼႂ်းလုမ်ႈၾႃႉ ၸိူဝ်းထုၵ်ႇၸုမ်းၵျႃးၽႅၼ်ႉ တီႉၺွပ်းသေ ၸႂ်ႉၵိၼ်ႁႅင်းဝႆႉတီႈမိူင်းမၢၼ်ႈ ၼၼ်ႉပဵၼ် ၵူၼ်းမိူင်းၶႄႇ 3,900 ၵေႃႉ။ ၸိူဝ်းၶဝ်ထုၵ်ႇတဵၵ်းတဵင်ပေႉၵိၼ် လွၵ်ႇငိုတ်ႈယွၼ်းငိုၼ်းၵူၼ်း တင်းႁိူၼ်း။ ၵမ်ႈၼမ် ၸုမ်းလွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊၼႆႉ လႆႈဢဝ်တၢင်းၸွႆႈထႅမ် တီႈၸုမ်း ယိပ်းၵွင်ႈၵၢင်ႇယၢင်းၽိူၵ်ႇသေ တေႃႉ ၵူၼ်း ၸိူဝ်းထုၵ်ႇပဵၼ်တူဝ်ယိူဝ်ႇၶဝ်ႈဢွၵ်ႇၶၢမ်ႈလႅၼ်လိၼ်မၢၼ်ႈ – ထႆး တၢင်းဝဵင်းမျႃႉဝတီႇ မိူင်းယၢင်းၽိူၵ်ႇ – ၼႂ်း ၽိုၼ်ႁၢႆးငၢၼ်း ၸုမ်းတူင်ႇဝူင်းၵူၼ်းၼၼ်ႉ တႅမ်ႈဝႆႉၼင်ႇ ၼႆ။

ၸွမ်းၼင်ႇ ၽိုၼ်ႁၢႆးငၢၼ်း ဢိၼ်ႊသတီႊၵျုတ်ႉ လွင်ႈငမ်းယဵၼ် မိူင်းဢမေႊရိၵၼ်ႊ ပီ 2024 တႄႉ တႅမ်ႈဝႆႉဝႃႈ – မိူင်းမၢၼ်ႈ၊ ၵမ်ႇပူးၶျႃး၊ လၢဝ်း 3 မိူင်းၼႆႉ ၵူၼ်းလွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊၼမ်။ ၼိုင်ႈပီ မီးငိုၼ်းၶဝ်ႈဢမ်ႇယွမ်း 43,000 သႅၼ်လၢၼ်ႉတေႃႊလႃႊ – ဝႃႈၼႆ။

ပိူင်ပဵၼ်ဢၼ်လီယုပ်းၽၢၼ်ႈ ဢၼ်ပဵၼ်ၵႂႃႇလိုၼ်းသုတ်းၼႆႉတႄႉ ႁူဝ်လိူၼ်ႊၵျႅၼ်ႊၼိဝ်ႊရီႊ 2025 ၼႆႉ ၸၢႆးၸိူင်းၸိုဝ်ႈလိုဝ်း မိူင်းၶႄႇ Xingxing ထုၵ်ႇလွၵ်ႇလႅၼ်တႃႇထၢႆႇၸိူင်းၼႆသေ လုၵ်ႉမိူင်းၶႄႇ မႃးထိုင် လႅၼ်လိၼ်ထႆး – မၢၼ်ႈ။ ထုၵ်ႇတီႉၺွပ်းၵုမ်းတူဝ်ႁွင်ႉၵႂႃႇၵုမ်းသေ သွၼ်ပၼ်လွင်ႈလွၵ်ႇလႅၼ်ၵိၼ်ငိုၼ်းတႃႇ 4 ဝၼ်း။ ဝၢႆးလင်ပလိၵ်ႈထႆး ၸွႆႈဢဝ်တူဝ်မၼ်းၸၢႆး ဢွၵ်ႇမႃးလႆႈၶိုၼ်းယဝ်ႉ ႁဵတ်းႁႂ်ႈၸုမ်းပၵ်းတႃ တူင်ႇဝူင်းၵူၼ်း သႂ်ႇၸႂ်ၼိူဝ်လွင်ႈၽေးၶဵၼ် ၸုမ်းလွၵ်ႇလႅၼ်ၵိၼ်ငိုၼ်း – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။