ၼႂ်းၵၢင်လိူၼ်ၵျုၼ်ႊၼႆႉ သိုၵ်းမၢၼ်ႈလႄႈ ပလိၵ်ႈၸိူဝ်းယူႇတႂ်ႈဢႃႇၼႃႇ သိုၵ်းမၢၼ်ႈၵုမ်းၵမ် ႁူမ်ႈၵၼ် ၶဝ်ႈသွၵ်ႈတီႉၺွပ်းဢဝ် ၵူၼ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊ (ၵျႃးၽႅၼ်ႉ) ၼႂ်းပွၵ်ႉၵွင်းမူးတူင်ႈလႄႈ ပွၵ်ႉႁူဝ်ၼႃး တီႈဝဵင်းမူႇၸေႊ ၸိုင်ႈတႆးပွတ်းႁွင်ႇ။

မိူဝ်ႈဝၼ်းတီႈ 17/06/2025 ၼႆႉ ၵူၼ်းႁဵတ်းၵၢၼ်ၵျႃးၽႅၼ်ႉ ၸိူဝ်းၺႃးသိုၵ်းမၢၼ်ႈတီႉၺွပ်းၵႂႃႇၼၼ်ႉ ပဵၼ်ၵူၼ်းမိူင်းၶႄႇ 80 ၵေႃႉပၢႆလႄႈ ၵူၼ်းမိူင်းမၢၼ်ႈ 20 ၵေႃႉပၢႆၼႆ ၵူၼ်းၼႂ်းပိုၼ်ႉတီႈ ဝဵင်းမူႇၸေႊၵေႃႉၼိုင်ႈ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ပွၵ်ႈၼႆႉ ၶဝ်မႃးၺွပ်းဢဝ် ၵူၼ်းႁဵတ်းၵၢၼ်ၵျႃးၽႅၼ်ႉ မီးၵႂႃႇ 100 ပၢႆ။ ၵွၼ်ႇၼႃႈၶဝ်တေၺွပ်း ၼႂ်းဝူင်ႈၼႃႈၼၼ်ႉ ၵူၼ်းမိူင်းၶႄႇ ၺႃးပိူၼ်ႈၶႃႈႁႅမ်တၢႆၵႂႃႇ သွင်ၵေႃႉ။ ပဵၼ်ၸုမ်းလႂ်ႁႅမ်တၢႆတႄႉ ဢမ်ႇႁူႉ။ ငိၼ်းဝႃႈ ၶဝ်ၽိတ်းမေႃးထဵင်ၵၼ်တင်း ၸုမ်းပျီႇတူႉၸိတ်ႉ ဢၼ်ပႂ်ႉဢဝ်ႁူမ်ႇလူမ်ႈပၼ် ဢွင်ႈတီႈႁဵတ်းၵၢၼ်ၵျႃးၽႅၼ်ႉၼၼ်ႉၼႆဢေႃႈ။”

မိူဝ်ႈပူၼ်ႉမႃး ၼႂ်းၸႄႈဝဵင်းမူႇၸေႊၼႆႉ ဢွင်ႈတီႈႁဵတ်းၵၢၼ်လွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊ ၸုမ်းၵျႃးၽႅၼ်ႉ မီးယူႇ 30 ဢွင်ႈတီႈပၢႆ၊ ၼိုင်ႈၸုမ်းလႂ် ၵူၼ်းႁဵတ်းၵၢၼ် မီးယူႇ 2,000 ပၢႆ။ ဝၢႆးလင် ၽႅၼ်ယၼ်ႇသိုၵ်း 1027 မႃး ယွၼ်ႉ ႁႅင်းမိပ်ႇဢီး လူင်ပွင်ၸိုင်ႈမိူင်းၶႄႇၵေႃႈပိူင်ၼိုင်ႈ ၾၢႆႇၼိုင်ႈၵေႃႈ ယွၼ်ႉသိုၵ်းမၢၼ်ႈ ၶႂ်ႈလႆႈၼႃႈတႃမီးၸိုဝ်ႈသဵင်လီ တီႈ လူင်ပွင်ၸိုင်ႈမိူင်းၶႄႇၵေႃႈ လွင်ႈၼိုင်ႈလႄႈ ၸင်ႇႁဵတ်းၵႅင်ႈ ၵမ်းၵမ်းၸွမ်းတီႉၵဝ်းတီႉၺွပ်း ၵူၼ်းႁဵတ်းၵၢၼ်ၵျႃး ၽႅၼ်ႉမႃးၼႆ ၵူၼ်းၼႂ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။

“သိုၵ်းမၢၼ်ႈၺွပ်းႁႄ ၸုမ်းလွၵ်ႇလႅၼ်ၵိၼ်ငိုၼ်းၵျႃးၽႅၼ်ႉၼႆႉ ဢမ်ႇႁၢႆၵႂႃႇတႄႉၼင်ႇၵဝ်ႇ။ ဢွင်ႈတီႈ ႁဵတ်းၵၢၼ်ၵျႃး ၽႅၼ်ႉၼႆႉ ပၢႆၼမ်မႃးလိူဝ်ၵဝ်ႇၵွၼ်ႇ။ မိူဝ်ႈလဵဝ်မီးပဵၼ် 100 တီႈပၢႆ။ ၵူၼ်းႁဵတ်းၵၢၼ်ၶဝ်တႄႉ ဢမ်ႇႁတ်းဝႆႉၼမ် မိူၼ် ဢွၼ်တၢင်းယဝ်ႉ။ မိူဝ်ႈလဵဝ် ၼိုင်ႈတီႈလႂ် ၶဝ်တေဝႆႉၵူၼ်းႁဵတ်းၵၢၼ်ၶဝ် ၼမ်သုတ်း 100 ၵေႃႉပၢႆၸိူဝ်းၼႆႉၵူၺ်း။ မၢင်ၸိူဝ်း ပေႃႈလဵင်ႉၵေႃႉလဵဝ်ၵူၺ်း ႁႃၶၢတ်ႈႁိူၼ်းႁႄ ပိုတ်ႇပဵၼ် 4-5 တီႈၵွၼ်ႇ။ ပွၵ်ႈၼႆႉၵေႃႈ သင်ၵူၼ်းမိူင်းၶႄႇ ဢမ်ႇၺႃးႁႅမ်တၢႆ ၶဝ်ယင်းတေဢမ်ႇၶဝ်ႈၺွပ်းၵွၼ်ႇ”။

လႆႈႁူႉဝႃႈ ၸုမ်းဢၼ်ဢဝ်ႁူမ်ႇလူမ်ႈပၼ်ၵျႃးၽႅၼ်ႉ ၸုမ်းလွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊ ၼႂ်းဝဵင်းမူႇၸေႊၼႆႉ ပဵၼ်ပျီႇတူႉၸိတ်ႉ တႃႈမိူင်းငႄး။ သင်တေမီးၵၢၼ်တီႉၺွပ်း ၵူၼ်းႁဵတ်းၵၢၼ်ၵျႃးၽႅၼ်ႉၸိုင် ၾၢႆႇသိုၵ်းမၢၼ်ႈ ပွင်ႇၶၢဝ်ႇ ပၼ်ဝႆႉတီႈ ႁူဝ်ၼႃႈၸုမ်းၵျႃးၽႅၼ်ႉ လူင်ႈၼႃႈဢွၼ်တၢင်းၼႆ – ၵူၼ်းၸၢႆး ဢႃယု 40 ပၢႆၵေႃႉယူႇဝႆႉ ၼႂ်းဝဵင်းမူႇၸေႊ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ပွၵ်ႈၼႆႉၵေႃႈ ယွၼ်ႉၶႄႇၸႂ်ႉၶဝ်ၺွပ်းလႄႈ သိုၵ်းမၢၼ်ႈၼႆႉ ႁဵတ်းၵႅင်ႈၺွပ်းၼႄဢဝ်ၾၢင်ႁၢင်ႈမၼ်းၵူၺ်း။ တီႈတႄႉ ပေႃးပဵၼ်ၸုမ်းဢၼ်ဢဝ်ငိုၼ်းယဵတ်ႈပၼ်ၶဝ်ဝႆႉလႄႈ ဢၼ်မိုတ်ႈၵိုဝ်းၸမ်ၸႂ်ႁႄ ၶဝ်ယုမ်ႇလႆႈတႄႉ ပေႃးတေမီးၵၢၼ် တီႉၺွပ်းၸိူင်ႉၼႆ ၶဝ်ပေႃးပွင်ႇၶၢဝ်ႇပၼ်တီႈ ႁူဝ်ၼႃႈၸုမ်းၵျႃးၽႅၼ်ႉဝႆႉထႃႈယဝ်ႉ။ ၸိူဝ်းၺွပ်းၺႃးၼႆႉၵေႃႈ ပဵၼ်ၵူၼ်းဢွၼ်ႇမၼ်းၵူၺ်း”။

ဝဵင်းမူႇၸေႊၼႆႉ ႁွပ်ႈႁွပ်ႈၾၢႆႇၼွၵ်ႈဝဵင်း မီးၸုမ်းယိပ်းၵွင်ႈၵၢင်ႇၸၢဝ်းၶိူဝ်းလၢႆလၢႆၸုမ်း တူင်ႉၼိုင်ၵႂႃႇမႃး ဢဝ်ၼႃႈတီႈ ပၵ်းတပ်ႉပၢင်သဝ်းဝႆႉသေ ၼႂ်းဝဵင်းသမ်ႉ မီးသိုၵ်းမၢၼ်ႈလႄႈ ၸုမ်းပျီႇတူႉၸိတ်ႉ ၵုမ်းၵမ်ဝႆႉ။

ပဵၵ်ႉသမ်ႉဝႃႈ ပဵၼ်ဝဵင်းဢၼ်သိုၵ်းမၢၼ်ႈတင်း ၸုမ်းသိုၵ်းၸၢဝ်းၶိူဝ်း ဢမ်ႇယိုဝ်းၵၼ် ဢမ်ႇပဵၼ်ပၢင်တိုၵ်းၵၼ်ၼႆသေတႃႉ ယွၼ်ႉမီးၸုမ်းၵျႃးၽႅၼ်ႉ ၵူၼ်းႁဵတ်းၵိၼ်ၵၢၼ်လွၵ်ႇလႅၼ်ငိုၼ်းၼိူဝ်ဢွၼ်ႊလၢႆႊၼမ်ႁႅင်းလူၼ်ႉလႄႈ ႁဵတ်းႁႂ်ႈၵူၼ်းမိူင်းၼႂ်းပိုၼ်ႉတီႈ ဢမ်ႇလႆႈယူႇသႃႇ။ ၵႆႉၵႆႉမီးလွင်ႈၸူၼ်ၵၼ်သေ ၶႃႈႁႅမ်ၵၼ်တၢႆယူႇတႃႇသေႇ ၼႆယဝ်ႉ။

တႅမ်ႈ – ၽူၺ်းၼုမ်ႇ