ပလိၵ်ႈသိုၵ်းမၢၼ်ႈတင်း ပျီႇတူႉၸိတ်ႉ ၶိုၼ်ႈႁိူၼ်းလူင်းႁိူၼ်းသေ လမ်းတီႉၺွပ်း ၵူၼ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ ၵျႃးၽႅၼ်ႉ ၼႂ်းၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။
ၵူၼ်း မူႇၸေႊၵေႃႉၼိုင်ႈလၢတ်ႈဝႃႈ-“ မိူဝ်ႈဝၼ်းတီႈ 28/07/2025 ပလိၵ်ႈသိုၵ်းမၢၼ်ႈ တင်း ပျီႇတူႉၸိတ်ႉ ၶိုၼ်ႈႁိူၼ်းလူင်းႁိူၼ်းသေ ႁႃၵူတ်ႇထတ်းတီႉၺွပ်း ၵူၼ်းႁဵတ်းၵၢၼ်ၵျႃးၽႅၼ်ႉ ၼႂ်း 9 ပွၵ်ႉ ဝဵင်းမူႇၸေႊ။ ၵူတ်ႇထတ်းပႃးၸဵမ်ၼႂ်းၾူၼ်း မိုဝ်းထိုဝ်။ သင်ပဵၼ်ၵူၼ်းမႃးၶၢတ်ႈယူႇၵေႃႈ ၵူတ်ႇထတ်းပႃး။ ႁိူၼ်း ဢၼ်ၶဝ်ထၢင်ႇထိူမ်ၵေႃႈ ၶဝ်ႈၵူတ်ႇထတ်းၵႂႃႇ” – ဝႃႈၼႆ။
ဝၼ်းၼၼ်ႉ ပလိၵ်ႈ သိုၵ်းမၢၼ်ႈ တင်း ပျီႇတူႉၸိတ်ႉ ဢဵၼ်ႁႅင်းမွၵ်ႈ 20 ၵေႃႉ ပႃးတင်းၵႃးသိုၵ်းသေ ပၼ်ႇလဵပ်ႈၼႂ်းဝဵင်းယဝ်ႉ ၶိုၼ်ႈႁိူၼ်းလူင်းႁိူၼ်း ၶဝ်ႈၵူတ်ႇထတ်း။ ၶဝ်ႈထတ်းထိုင်ၼႂ်းႁွင်ႈၼွၼ်းႁွင်ႈၼမ်ႉပႃးလႄႈပဵၼ်ဢၼ်လီတူၵ်းၸႂ်ၼႆ ၸၢႆးၼုမ်ႇ ၵူၼ်းမိူင်းမူႇၸေႊ လၢတ်ႈ ၼင်ႇၼႆ။
“ရူတ်ႉၵႃးပလိၵ်ႈ ရူတ်ႉၵႃးသိုၵ်းမၢၼ်ႈ မႃးပဵၼ်ထႅဝ်လူင်ဢေႃႈ။ ဢဵၼ်ႁႅင်းၵူၼ်းၵေႃႈမီးမွၵ်ႈ 20 ၼႆႉဢေႃႈ။ ႁိူၼ်းမီးလၢႆၸၼ်ႉၵေႃႈ ၶဝ်ၶဝ်ႈထတ်းၵူႈၸၼ်ႉ။ လႆႈပိုတ်ႇၽၵ်းတူပၼ်ၵူႈႁွင်ႈယဝ်ႉ။ ႁဵတ်းႁႂ်ႈၵူၼ်းမိူင်းတူၵ်းၸႂ်ၵူဝ်ႁႄ ၼၼ်ႉၼႃႇ”- ဝႃႈၼႆ။
ၵူၼ်းပိုၼ်ႉတီႈတႄႉလၢတ်ႈဝႃႈ ၵၢၼ်ၵျႃးၽႅၼ်ႉ ဢၼ်လိူင်ႇၽႄႈယူႇတီႈဝဵင်းမူႇၸေႊၼႆႉ ၵဵဝ်ႇၵွင်ႉၵၼ်ဝႆႉတင်း ၸုမ်းပျီႇတူႉၸိတ်ႉ ဢၼ်ယူႇတႂ်ႈသိုၵ်းမၢၼ်ႈ ဝႃႈၼႆ။
ယွၼ်ႉမိူင်းၶႄႇပၼ်ႁႅင်းဢီးသေ တႄႇၵၢင်လိူၼ်ၵျူႊလၢႆႊမႃးၼႆႉ ပလိၵ်ႈ သိုၵ်းမၢၼ်ႈ ၵႆႉၶဝ်ႈၵူတ်ႇထတ်း ၼႂ်းပွၵ်ႉၼႂ်းယွမ်ႇ ဝဵင်းမူႇၸေႊ၊ မိူၼ်ႇၼင်ႇ ပွၵ်ႉၸွၼ်ႊၸူဝ်ႇ၊ ပွၵ်ႉၵွင်းမူးတူင်ႈ၊ ၵုင်း 45 ၸိူဝ်းၼႆႉသေ တီႉၺွပ်းၵူၼ်းႁဵတ်းၵၢၼ်ၵျႃးၽႅၼ်ႉၵမ်ႈၽွင်ႈသေတႃႉ ႁူဝ်ၼပ်ႉတႅတ်ႈတေႃးတႄႉ ပႆႇလႆႈႁူႉၸွမ်း။
ဝဵင်းမူႇၸေႊၼႆႉ ပဵၼ်ဝဵင်းလဵဝ်ၼႂ်းၸိုင်ႈတႆးပွတ်းႁွင်ႇ ဢၼ်လွတ်ႈၽေးၽႅၼ်ယၼ်ႇသိုၵ်း ဢၼ်ၸုမ်းသိုၵ်းဢူၺ်းလီသၢမ်ၸုမ်းပိုတ်းယိုဝ်းသိုၵ်းမၢၼ်ႈ။ တေႃႇထိုင်ယၢမ်းလဵဝ်ၵေႃႈ သိုၵ်းမၢၼ်ႈ တိုၵ်ႉၽွင်းငမ်းဝႆႉ။ လိူဝ်ၼၼ်ႉ ဢၼ်ႁူမ်ႈသိုၵ်းမၢၼ်ႈသေ တူင်ႉၼိုင်ဝႆႉသမ်ႉ တေမီး ၸုမ်းပျီႇတူႉၸိတ်ႉထႅင်ႈ မွၵ်ႈ 15 ၸုမ်း၊ မိူၼ်ၼင်ႇၸုမ်းပျီႇတူႉၸိတ်ႉၵွင်းၶႃး၊ ပျီႇတူႉၸိတ်ႉမဵဝ်ႉမ၊ ပျီႇတူႉၸိတ်ႉပၢၼ်းသေး၊ လူင်ထၢင်၊ ပဵင်းသႃႇ၊ မၢၼ်ႈၸႄႊ၊ သႅင်ၵႅဝ်ႉ၊ မၢၼ်ႈပဵင်း၊ သႅဝ်ႉႁေႃႇ၊ တႃႈမိူင်းငႅၼ်း၊ ပျီႇတူႉၸိတ်ႉ မိူင်းပေႃႈ ၸဵမ်ၸိူဝ်းၼႆႉ ။
တႅမ်ႈ – ၸၢႆးသႅင်ဢၢႆႈ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ