မိူဝ်ႈဝၼ်းတီႈ 10/06/2025 ၼႆႉ တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA တီႉၺွပ်းဢဝ် ၵူၼ်းႁဵတ်း ၵၢၼ်ၵျႃးၽႅၼ်ႉ လွၵ်ႇလႅၼ်ၵိၼ်ငိုၼ်းၼိူဝ်ဢွၼ်ႊလၢႆႊ ၼႂ်းၸႄႈဝဵင်းၼမ်ႉၶမ်း၊ ၼမ်ႉတူႈလႄႈ ၵူတ်ႉၶၢႆ ၸိူဝ်းၼႆႉ သူင်ႇမွပ်ႈပၼ်ၶိုၼ်း ၼႂ်းမိုဝ်းပလိၵ်ႈမိူင်းၶႄႇ တႃႇ 12 ၵေႃႉ ဝႃႈၼႆ။

ၾၢႆႇႁွင်ႈၵၢၼ်ပိုၼ်ၽၢဝ်ႇ သိုၵ်းတဢၢင်းၶဝ် ပိုၼ်ၽၢဝ်ႇ ပဵၼ်တၢင်းၵၢၼ်ဝႆႉဝႃႈ – ၵူၼ်းၸိူဝ်းၺႃးသိုၵ်းတ ဢၢင်း တီႉၺွပ်းၼႆႉ ပဵၼ်ၵူၼ်းၸၢႆးတင်းသဵင်ႈ။ ယူႇၼႂ်းၸႄႈဝဵင်းၼမ်ႉၶမ်း  4 ၵေႃႉ၊ ၸႄႈဝဵင်းၵူတ်ႉၶၢႆ 5 ၵေႃႉလႄႈ ၸႄႈဝဵင်းၼမ်ႉတူႈ 3 ၵေႃႉ။ ၾၢႆႇသိုၵ်းတဢၢင်း လႆႈၶၢဝ်ႇဝႃႈ ၵူၼ်းၸိူဝ်းၼႆႉ မီးၽႅၼ်ၵၢၼ်တေ လွၵ်ႇလႅၼ်ဢဝ်ငိုၼ်းၼိူဝ်ဢွၼ်ႊလၢႆႊၼႆလႄႈ ၸင်ႇၵႂႃႇၵူတ်ႇထတ်း တီႉၺွပ်းဢဝ်ၵႂႃႇ – ဝႃႈၼႆ။  

ၼႂ်းၵူၼ်းၸိူဝ်းၺႃးတီႉၺွပ်း 12 ၵေႃႉၼၼ်ႉ တႃႇ 1 ၵေႃႉ မီးႁွႆးမၢတ်ႇၸဵပ်းဝႆႉတီႈတိၼ် မၼ်းၸၢႆးသေ လႆႈယူတ်းယႃတူဝ်ဝႆႉလႄႈ ၾၢႆႇၸုမ်းပလိၵ်ႈမိူင်းၶႄႇၶဝ် လႆႈဢဝ်ရူတ်ႉၸွႆႈထႅမ်ၵူၼ်းပဵၼ်သေ မႃးႁပ်ႉဢဝ်ၵႂႃႇ မိူင်းၶႄႇၶိုၼ်း ၼႆယဝ်ႉ။

ၵူၼ်းမိူင်းၵေႃႉယူႇသဝ်း တီႈၼမ်ႉၶမ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“ယၢမ်းလဵဝ် ၵူၼ်းၸိူဝ်းႁဵတ်း ၵၢၼ်ၵျႃးၽႅၼ်ႉၸိူဝ်းၼႆႉ ဢမ်ႇႁၢႆမူတ်းသဵင်ႈလူး။ ၸွမ်းၼႂ်းဝဵင်းမူႇၸႄႈ၊ ၼမ်ႉၶမ်း။ ၼႂ်းၼႃႈတီႈသိုၵ်းၸၢဝ်းၶိူဝ်း ၵုမ်းၵမ်ၼၼ်ႉ မီးယူႇၵူႈတီႈလႄႇ။ မိူၼ်ပၢင်တေႃႇလွင်းၸိူဝ်းၼႆႉၵေႃႈ ၶဝ်ႈပႃးၼႂ်းၵၢၼ်ၵျႃးၽႅၼ်ႉယူႇ လူး။ ၶဝ်ယင်းပၼ်ပိုတ်ႇပဵၼ်တၢင်းၵၢၼ်ၵွၼ်ႇ။ ဢၼ်မႃးႁဵတ်းၵၢၼ်ၵျႃးၽႅၼ်ႉၸိူဝ်းၼႆႉ ၵမ်ႈၼမ် ပဵၼ်ၶႄႇလၢႆလၢႆ”- ဝႃႈၼႆ။

သိုၵ်းတဢၢင်း TNLA လႄႈ သိုၵ်းၵဝ်ႈၵၢင်ႉ MNDAA ၼႆႉ ပဵၼ်လုၵ်ႈၸုမ်း ၼႂ်းၸုမ်းဢူၺ်းလီ ပွတ်းႁွင်ႇ သၢမ်ၸုမ်းၼၼ်ႉသေ ဢဝ်ၶေႃႈဢၢင်ႈဝႃႈ တေၽဵဝ်ႈမူၺ်ႉပႅတ်ႈ ၵၢၼ်လွၵ်ႇလႅၼ်ၵိၼ်ငိုၼ်း ၸွမ်းသၢပ်ႇ လႅၼ်လိၼ်မိူင်းတႆး – မိူင်းၶႄႇသေ ၸတ်းၽႅၼ်ယၼ်ႇသိုၵ်း 1027 ၼႂ်းမိူင်းတႆးပွတ်းႁွင်ႇ မႃးသေတႃႉ ႁၢၼ်ႉတေႃႇထိုင်ယၢမ်းလဵဝ်ၵေႃႈ ၵူၼ်းႁဵတ်းၵၢၼ် ၵျႃးၽႅၼ်ႉၼႆႉ ယင်းပႆႇမူၺ်ႉသဵင်ႈ ၼႆယဝ်ႉ။

တႅမ်ႈ – ၽူၺ်းၼုမ်ႇ