ပေႃးမႃးတူၺ်း ၵူၼ်းၶိူဝ်းတႆးၼႆ ၵမ်ႈၼမ် တေဝႃႈ ႁဝ်းပဵၼ်ၸၢဝ်းၶိူဝ်းယႂ်ႇ ႁဝ်းယၢမ်ႈမီးၸဝ်ႈမီးၸွမ် ယၢမ်ႈထိုင်ၸၼ်ႉ ႁေႃသႅင်ႁေႃၶမ်းမႃးၼႆသေ တိုၵ်ႉယွင်ႇမဝ်းၸွမ်း ပိုၼ်းဝၼ်းလင် ဢၼ်ပူၼ်ႉမႃး ၼပ်ႉႁူဝ်ႁဵင်ပီမၼ်းၼၼ်ႉၵူၺ်း။

ၵူၺ်းၵႃႈ ဢမ်ႇမေႃၶုၵ်းၸႂ်လႆႈ တေႁၵ်ႉသႃႁွမ်ပႅင်းဝႆႉၾိင်ႈတႆး ၶူဝ်းၶွင်ၵိုၵ်းၶိူဝ်းတႆးၸိူင်ႉႁိုဝ်။ ပေႃးမႃးတူၺ်း ပွတ်းတၢင်း တိူင်းၸႄႈၵႅင်း ၸိူဝ်းၼႆႉ ယၢမ်ႈပဵၼ်ထုင်ႉ ဢၼ်တႆးႁိူင်းမႃးလၢႆပီမိူင်းသေတႃႉ ယၢမ်းလဵဝ် ၵူၼ်းမေႃလၢတ်ႈၵႂၢမ်းတႆး ၵူၼ်းႁူႉၾိင်ႈတႆးဢေႇမႃးလိူဝ်ႁႅင်း။

ယွၼ်ႉဝႃႈ ဢမ်ႇမီးသုၼ်ႇႁႄႉၵင်ႈတူၺ်းထိုင်လူလွမ် ၾိင်ႈထုင်းထၢင်ႇႁၢင်ႈ။ ၼႂ်းၵႄႈလွင်ႈယၢပ်ႇၽိုတ်ႇ လူင်လၢႆလွင်ႈ ၼႆႉ ၵတ်ႉၵႃႈ မီးၵူၼ်းၼုမ်ႇတႆးၵေႃႉၼိုင်ႈ ၸိုဝ်ႈႁွင်ႉ ၸၢႆးၺီႇၺီႇၽဵဝ်း ပဵၼ်ၸၢဝ်းတႆးလႅင် ယူႇဝၢၼ်ႈပႄးၶူး ၸႄႈဝဵင်းမေႃႇလူး ၸႄႈတွၼ်ႈဢိၼ်းတေႃႇ တိူင်းၸႄႈၵႅင်းၼၼ်ႉ မၼ်းၸၢႆး တိုၵ်ႉမီး ၸႂ်ႁၵ်ႉၾိင်ႈၸဝ်ႈၵဝ်ႇသေ တိုၵ်ႉဝူၼ်ႉၶူင်ႁဵတ်းဢွၵ်ႇ ၶိူင်ႈၸႂ်ႉၶူဝ်းသွႆၾိင်ႈတႆးႁဝ်းဝႆႉယူႇ။

မၼ်းၸၢႆး ဢဝ်မႆႉသၢၼ်ႁဵတ်းၵူၺ် သႃႉ သွင်း ဢုပ်းသႂ်ႇၶဝ်ႈၽၵ်းလႄႈ ၵုပ်း ၸဵမ်ၸိူဝ်းၼႆႉသေ ၼႄၾၢင်ႁၢင်ႈတႆးဝႆႉ။ မၼ်းၸၢႆး ဝူၼ်ႉၸိူင်ႉႁိုဝ်သေ ၸင်ႇလႆႈႁဵတ်းၶိူင်ႈၶူဝ်းၸိူဝ်းၼႆႉဢွၵ်ႇမႃး ယိူင်းဢၢၼ်း ၸိူင်ႉႁိုဝ် မီးလွင်ႈၶဵင်ႇတႃႉၸိူင်ႉႁိုဝ် ၼႆၼၼ်ႉ ၸၢႆးသႂ်ၸိုၼ်ႈမိူင်း ၸုမ်းၶၢဝ်ႇၽူႈတွႆႇႁွၵ်ႈ တွင်ႈထၢမ်ဝႆႉ ၼင်ႇပႃႈတႂ်ႈၼႆႉၶႃႈဢေႃႈ။

ထၢမ် – လႆႈႁၼ် ဢဝ်မႆႉသၢင်းသၢၼ်ႁဵတ်းသႃႉ ႁဵတ်းၵုပ်း ၸိူဝ်းၼႆႉသေ တၢင်ႇၼႄဝႆႉ တီႈၾဵတ်ႉသုၼ်ႇ တူဝ် ၸိူဝ်းၼႆႉလႄႈ ပဵၼ်ဢၼ်လီသူၼ်ၸႂ်ဝႆႉၶႃႈၼေႃ။ ၽွင်းယၢမ်း ဝၢၼ်ႈမိူင်းသုၵ်ႉၸိူင်ႉၼႆ  တိုၵ်ႉပဵၼ်ၵၢၼ် ယူႇၶႃႈႁႃႉ?

တွပ်ႇ – ၵၢၼ်ဢၼ်ၼႆႉတႄႉ ၶႃႈလႆႈလိုဝ်ႈဝႆႉၸူဝ်ႈၶၢဝ်း။ ယွၼ်ႉဝႃႈ တႃႇၵႂႃႇမႃးတၢင်းလႂ်ၵေႃႈယၢပ်ႇ သဵၼ်ႈတၢင်းၵႂႃႇမႃး ၵေႃႈ ဢမ်ႇထၢင်ႇႁၢင်ႈမိူၼ်ၵူႈပွၵ်ႈ။ မီးၵူၼ်းသင်ႇႁႂ်ႈႁဵတ်းပၼ်ယူႇသေတႃႉၵေႃႈ ယွၼ်ႉၵၢၼ်တေႃႉသူင်ႇယၢပ်ႇလႄႈ ဢမ်ႇပဵၼ်ႁဵတ်း။ လွင်ႈၵပ်းသိုပ်ႇၵပ်းသၢၼ်ၵၼ်ၵေႃႈ ဢမ်ႇငၢႆႈ လႅင်းၾူၼ်း လႅင်းဢိၼ်ႊထိူဝ်ႊၼႅတ်ႊၵေႃႈ ဢမ်ႇလီ။ ယွၼ်ႉၼၼ် ၶၢဝ်းမိူင်းသုၵ်ႉၼႆႉ ဢမ်ႇပေႃး ဢဝ်ၶႅပ်းႁၢင်ႈၶူဝ်းၶွင် ဢၼ်ႁဵတ်းဝႆႉၸိူဝ်းၼၼ်ႉ တၢင်ႇၼိူဝ်ဢွၼ်ႊလၢႆႊယဝ်ႉ။ သင်ဝႃႈ မီးၵူၼ်းသင်ႇ မႃးၵေႃႈ ဢမ်ႇသူင်ႇပၼ်လႆႈငၢႆႈငၢႆႈလႄႈ ၵဵင်ၸႂ်ၵူၼ်းသင်ႇသိုဝ်ႉ ၸိူဝ်းၼၼ်ႉၵေႃႈပႃး။

ထၢမ် – ဢၼ်ႁဵတ်းဢွၵ်ႇ ၶိူင်ႈၶူဝ်းၸိူဝ်းၼႆႉသမ်ႉ ႁဵတ်းဢွင်ႈတီႈလႂ်။ ယဝ်ႉၵေႃႈ မီးၶူဝ်းၶွင်သင်လၢႆလၢႆ ဢၼ်ႁဵတ်းဢွၵ်ႇယူႇၸိူဝ်းၼႆႉ?

တွပ်ႇ – ဢွင်ႈတီႈႁဵတ်းတႄႉၵေႃႈ ပဵၼ်တီႈဝၢၼ်ႈပႄးၶူး ဝဵင်းမေႃႇလူး ၸႄႈတွၼ်ႈဢိၼ်းတေႃႇ တိူင်းၸႄႈၵႅင်း။ ႁဵတ်းတီႈႁိူၼ်းၶႃႈၵူၺ်း။ ၵမ်ႈၼမ်ၵေႃႈ တေႁဵတ်းၵုပ်းလႄႈသင် ဢုပ်းၶဝ်ႈသွမ်းၽၵ်းသွမ်းလႄႈ ၵူၺ် သွင်း သႃႉ ၶူဝ်းၶွင်ၾိင်ႈထုင်းတႆးၵူႈသႅၼ်းသႅၼ်းၸွမ်းၼင်ႇ လဵပ်ႈႁဵၼ်းယိုၼ်းထိုင်လႆႈ ၸွမ်းၼင်ႇၾီမိုဝ်း ၸဝ်ႈၵဝ်ႇႁဵတ်းပဵၼ်လႆႈ။ မိူဝ်ႈလဵဝ် ၶတ်းၸႂ်ႁဵတ်းတူၺ်းၵုပ်းတႆးယူၼ်း ဢၼ်ယၢမ်ႈ မီးမႃးမိူဝ်ႈၵွၼ်ႇ ၸိူဝ်းၼႆႉ။

ထၢမ် – ပွတ်းတၢင်းဝဵင်းမေႃႇလူးၼႆႉ မီးပီႈၼွင်ႉတႆးယူႇသဝ်းယူႇၶႃႈႁႃႉ။ ၸွင်ႇတိုၵ်ႉမၵ်းမၼ်ႈဝႃႈ ပဵၼ်ၵူၼ်းၶိူဝ်းတႆးယူႇၶႃႈႁိုဝ်?

တွပ်ႇ – မီးယူႇၶႃႈ ၵူၺ်းၵႃႈ ဢမ်ႇမေႃၵႂၢမ်းတႆးယဝ်ႉ။ ၵူၼ်းဢၼ်မေႃၵႂၢမ်းတႆးၵေႃႈ ဢႃယုယႂ်ႇ လိုမ်းၼႃႈလိုမ်းလင်သေ ၸိူဝ်းလူႉသဵင်ႈၵေႃႈသဵင်ႈၵႂႃႇမူတ်းယဝ်ႉ။ ပေႃးထၢမ်ဝႃႈ ၵူၼ်းပၢၼ်ၼႆႉ ၶဝ်ပဵၼ်ၵူၼ်း ၶိူဝ်းသင်ၼႆ မၢင်ၸိူဝ်းၵေႃႈ တွပ်ႇဝႃႈပဵၼ်မၢၼ်ႈၼႆၵေႃႈမီး။ မၢင်ၸိူဝ်းၵေႃႈတွပ်ႇဝႃႈ တႆးဢိူဝ်ႈၼႆၵေႃႈမီး။

ယွၼ်ႉလႆႈယူႇတႂ်ႈၵၢၼ်ၽွင်းငမ်းမၢၼ်ႈမႃး ပီယၢဝ်းၶၢဝ်းႁိုင် ၼပ်ႉႁူဝ်ပၢၵ်ႇပီမၼ်းယဝ်ႉလႄႈ ၶိူဝ်းတႆးၵေႃႈ ၸင်ႇယဵၼ်းပဵၼ်ပိူၼ်ႈၵႂႃႇ။ ယဝ်ႉၵေႃႈ ႁၢင်ႇၵႆၵၼ်တင်းၶိူဝ်းတႆးတႄႉတႄႉ။ ပၢၼ်ၸၢဝ်းမၢၼ်ႈ ယိုင်ႈယႂ်ႇ ၽွင်းငမ်းမႃးၸိူဝ်းၼၼ်ႉ ၵေႃႈ တႆးဢမ်ႇမီးသုၼ်ႇ ႁဵၼ်းသွၼ်လိၵ်ႈလၢႆး ၵႂၢမ်းလၢတ်ႈၸဝ်ႈ ၵဝ်ႇမႃးၶၢဝ်းႁိုင်။

ထိုင်မႃးပၢၼ်ၼႆႉ ယွၼ်ႉဢမ်ႇမေႃၵႂၢမ်းတႆးယဝ်ႉလႄႈ တႃႇတေလၢတ်ႈဝႃႈ ၸဝ်ႈၵဝ်ႇပႃးလိူတ်ႈတႆးဢိူဝ်ႈ ၼႆၼၼ်ႉၵေႃႈ လၵ်ႉလွမ်လီဢၢႆသေ ဢမ်ႇႁတ်းလၢတ်ႈ ပိူၼ်ႈဝႃႈ ၸဝ်ႈၵဝ်ႇပဵၼ်တႆး။ ပေႃးၼုင်ႈၶူဝ်း တႆးသေ ဢမ်ႇမေႃလၢတ်ႈၵႂၢမ်းတႆးၵေႃႈ သမ်ႉၺႃးတႆးမၢင်ၸိူဝ်းသႄႉသွမ်းၶိုၼ်းၵေႃႈမီးလႄႈ ဢဝ်ပဵၼ် ၸႂ်ၵူဝ်ၸႂ်လီဢၢႆသေ ဢမ်ႇႁတ်းၼုင်ႈၶူဝ်းတႆး ၵေႃႈ မီးမႃးၼမ်ယဝ်ႉ လီၸႂ်လဵၵ်ႉၼႃႇ။

ထၢမ် – ဢၼ်တႄႇႁဵတ်းမႃး ၶိူင်ႈယိပ်းတိုဝ်းၸိူဝ်းၼႆႉ တႃႇၶၢႆလႆႈငိုၼ်းလႄႈႁဵတ်းႁႃႉ။ ႁဵတ်းႁိုဝ်လႄႈ ပဵၼ်ႁဵတ်းၼႃႈ ၵၢၼ်ဢၼ်ၼႆႉမႃး?

တွပ်ႇ – ပိူင်လူင်မၼ်းတႄႉ ၶႃႈဝူၼ်ႉဝႃႈ မေႃတိၼ်မေႃမိုဝ်းၸိူဝ်းၼႆႉ ၸမ်ႁၢႆယဝ်ႉ။ ယဝ်ႉၵေႃႈ မၼ်းပဵၼ်ၾိင်ႈတႆး ဢၼ်ၼိုင်ႈ။ ယွၼ်ႉၼၼ် ၶႃႈၵေႃႈ ၸင်ႇလဵပ်ႈႁဵၼ်းသေႁဵတ်းမႃး။ လဵပ်ႈႁဵၼ်းလၢႆးသၢၼ်မၼ်း ၼိူဝ်ဢွၼ်ႊလၢႆႊၽွင်ႈ။ တေဝႃႈၵႂႃႇထၢမ်ၵူၼ်းႁဵတ်းမၼ်းတႄႉတႄႉၼႆၵေႃႈ လႆႈဝႃႈဢမ်ႇမီးၽႂ်ယဝ်ႉၶႃႈ။ ၸွမ်းၼင်ႇ ဢၼ်ၸဝ်ႈၵဝ်ႇပႃးဝႃႇသ ၼႃႇသေ တင်းၾိုၵ်းတင်းႁဵတ်းတူၺ်းၼၼ်ႉၶႃႈယဝ်ႉ။ မိူဝ်ႈဢွၼ်တၢင်းတႄႉ ယၢမ်ႈၵႂႃႇတူၺ်းၶူဝ်းၶွင်ၵဝ်ႇ ဢၼ်ၵိုတ်းဝႆႉ ဢၼ်ပိူၼ်ႈၼႄဝႆႉၼႂ်းႁွင်ႈၼႄပိုၼ်း ၸိူဝ်းၼၼ်ႉလႄႈသင် တူၺ်းၼႂ်းၶႅပ်းႁၢင်ႈၵဝ်ႇၵဝ်ႇ ဢၼ်ႁႃႁၼ်လႆႈဝႆႉၸိူဝ်း ၼၼ်ႉလႄႈသင် ႁဵတ်း ၼၼ်သေ ၾိုၵ်းသၢၼ်ႁဵတ်းမႃးဢေႃႈ။

ထၢမ် – ဢၼ်ႁဵတ်းဢွၵ်ႇမႃးၶိူင်ႈၸႂ်ႉတိုဝ်းၸိူဝ်းၼႆႉ လၢတ်ႈလႆႈဝႃႈ ပဵၼ်ၾိင်ႈတႆး ပဵၼ်ၶူဝ်းၶွင် ၾိင်ႈထုင်းတႆးယူႇၶႃႈ ႁႃႉ?

တွပ်ႇ – လၢတ်ႈလႆႈဝႃႈ ပဵၼ်ၾိင်ႈတႆးယူႇ တေပဵၼ်ၶူဝ်းၶွင်ၾိင်ႈတႆးလႅင်ၸိူဝ်းၼႆႉ ယဝ်ႉၵေႃႈ မိူၼ်ၼင်ႇ ဢုပ်းၶဝ်ႈသွမ်းၽၵ်းသွမ်းၸိူဝ်းၼႆႉတႄႉ တေပဵၼ်ၾိင်ႈထုင်းပီႈၼွင်ႉတႆးၶမ်းတီႈ တႆးၽႃၵေး ၸဵမ် ၸိူဝ်းၼႆႉ။ ပေႃးပဵၼ်ၶူဝ်းၶွင်ၵဝ်ႇ ဢၼ်ႁၼ်ၸိူဝ်းၼၼ်ႉတႄႉ တေဢမ်ႇပႃးမွၵ်ႇပႃးမၢၵ်ႇသင်တႄႉတႄႉ ။ ၵူၺ်းၵႃႈ ၶႃႈသမ်ႉပၢၼ်ၵဝ်ႇၵေႃႈ ဢမ်ႇႁႂ်ႈႁၢႆ ပၢၼ်မႂ်ႇၵေႃႈ ႁႂ်ႈၶိုတ်းၵၢပ်ႈၼႆသေ ၸင်ႇသႂ်ႇပႃးမွၵ်ႇပႃး ဝၼ်းသေ ယွမ်ႉသီသၢၼ် ႁႂ်ႈႁၢင်ႈလီတႃၶႃႈဢေႃႈ။

ထၢမ် – ဢၼ်ႁဵတ်းမႃး ၶိူင်ႈၸႂ်ႉတိုဝ်းၾိင်ႈတႆးၸိူဝ်းၼႆႉၶႃႈလူး ၸွင်ႇမီးၽႂ်မၵ်းမၼ်ႈ ပၼ်ႁႅင်းယူႇၶႃႈႁိုဝ်?

တွပ်ႇ – မီးယူႇၶႃႈ။ မီးၵူၼ်းသူၼ်ၸႂ်ၼမ်ယူႇ။ ၸိူဝ်းပၼ်ႁႅင်းၵေႃႈ မီးယူႇ။ မီးၵူၼ်းလၢတ်ႈပၼ်ႁႅင်းဝႃႈ လီႁဵတ်းၵႂႃႇထႅင်ႈ ဢေႃႈၼႆယူႇ။

ထၢမ် – ၶၢဝ်းယၢမ်းဝၢၼ်ႈမိူင်းသုၵ်ႉၸိူင်ႉၼႆ တႃႇသၢၼ်ၶိူင်ႈၸႂ်ႉတိုဝ်းၸိူဝ်းၼႆႉလူး မီးႁႅင်းၸႂ်ယူႇၶႃႈႁႃႉ။ ဝူၼ်ႉဝႆႉၸိူင်ႉႁိုဝ်ၽွင်ႈ တႃႇသိုပ်ႇၵႂႃႇမိူဝ်းၼႃႈ?

တွပ်ႇ – ပေႃးမႃးတူၺ်း ပွတ်းတၢင်းႁဝ်းယူႇၼႆႉ တႆးလႅင်ၵမ်ႈၼမ်ၵေႃႈ ဢမ်ႇလၢတ်ႈၵႂၢမ်းတႆးယဝ်ႉ၊ မၢင်ၸိူဝ်းသမ်ႉပေႃးဢမ်ႇႁူႉဝႃႈ တူဝ်ၵဝ်ႇပဵၼ်တႆးယဝ်ႉ။ ယွၼ်ႉၼၼ် တူဝ်ၶႃႈၵေႃႈ ၶႂ်ႈႁႂ်ႈတႆးႁဝ်းႁူႉၶိုၼ်း ဝႃႈၸဝ်ႈၵဝ်ႇတိုၵ်ႉမီးၾိင်ႈထုင်းယူႇ။ ၶူဝ်းၶွင်ဢၼ်ၶႃႈသၢၼ်ႁဵတ်းၸိူဝ်းၼႆႉၵေႃႈ ၶႂ်ႈႁႂ်ႈတႆးႁဝ်းႁူႉဝႃႈ ပဵၼ်ၶူဝ်းၶွင်တႆးယူႇ ၼႆၸိူဝ်းၼႆႉသေ ၸင်ႇမီးၸႂ်ၶႂ်ႈသိုပ်ႇႁဵတ်းၵႂႃႇထႅင်ႈဢေႃႈ။ တၢင်းႁူႉတၢင်းမေႃၸိူဝ်း ၼႆႉၵေႃႈ ၶႃႈဝူၼ်ႉဝႆႉဝႃႈ တေသိုပ်ႇယိုၼ်ႈမႅင်ႇပၼ် သႅၼ်း ႁုၼ်ႈမႂ်ႇႁဝ်းၵႂႃႇထႅင်ႈယူႇ။

ထၢမ် – မိူဝ်ႈသၢၼ်ႁဵတ်းၶူဝ်းၶွင်ၸိူဝ်းၼႆႉ လွင်ႈယၢပ်ႇၽိုတ်ႇသမ်ႉမီးသင်လၢႆလၢႆၶႃႈ?  

တွပ်ႇ – လွင်ႈယၢပ်ႇတႄႉၵေႃႈ မိူဝ်ႈႁဵတ်းယဝ်ႉသေ တေၶၢႆဢွၵ်ႇၼၼ်ႉ မီးလွင်ႈယၢပ်ႇတႄႉဢေႃႈ။ ၵွပ်ႈသင်လႃႇၼႆ တေမီးၵူၼ်းလၢတ်ႈဝႃႈ ၵႃႈမၼ်းယႂ်ႇၼႃႇ ၵႃႈမၼ်းပဵၼ်ၼၼ်ပဵၼ်ၼႆ ၸိူဝ်းၼႆႉဢေႃႈ။ တီႈတႄႉမၼ်း တႃႇႁဵတ်းယဝ်ႉမႃး ၶူဝ်းၸိူဝ်းၼႆႉ မၼ်းၵေႃႈ လႆႈသိုဝ်ႉၸႂ်ႉၶိူင်ႈမႆႉၶိူင်ႈမိုဝ်းမၼ်းလၢႆဢၼ် ဢေႃႈ။

မိူၼ်ၼင်ႇ ယႃတႃးမႆႉ ဢၼ်မၼ်းပေႃးတေဢမ်ႇမွတ်ႈ ၸိူဝ်းၼႆႉၵေႃႈ လႆႈသိုဝ်ႉၵႃႈ။ ယဝ်ႉၵေႃႈ ဢဝ်မိုဝ်းႁဵတ်းလႄႈ လႆႈ ၸႂ်ႉၶၢဝ်းယၢမ်းၼႃႇ တႃႇတေယဝ်ႉၶူဝ်းၶွင် ၸိူဝ်းၼႆႉ။ ၼိုင်ႈဢၼ်ၵေႃႈ ဢမ်ႇငၢႆႈငၢႆႈ။ ယဝ်ႉၵေႃႈ ၶဝ်ၵႆႉလၢတ်ႈဝႃႈ မႆႉသၢင်းၼႆႉ လႆႈလၢႆဢမ်ႇၸႂ်ႈႁႃႉ ႁဵတ်းသင်မႃးၶၢႆၵႃႈ ၸိူင်ႉၼႆ။ တႄႇၵႂႃႇ ၸိူဝ်းၼႆႉ လႆႈတွပ်ႇပၼ်ၶဝ်ႁႂ်ႈပွင်ႇၸႂ်။

ယၢမ်းလဵဝ်ၼႆႉ ၶႃႈယင်းပႆႇၸၢင်ႈလၢတ်ႈ ၵႃႈၶၼ်မၼ်းၼႄၽႂ်ၶႃႈ ၶၢဝ်းမိူင်းသုၵ်ႉၼႆႉ ႁဵတ်းၵေႃႈ ၶႃႈဢမ်ႇထၢမ်ၶၢႆပၼ်ၽႂ် ယွၼ်ႉဝႃႈ လႆႈလူင်းတိုၼ်းဢၼ်လႂ်ၵေႃႈၵႃႈလႄႈ သင်ဝႃႈၶၢႆၶိုၼ်းၵေႃႈ ၵူဝ်ၶၢတ်ႇ တိုၼ်းလၢင်း။ မႆႉသၢင်းမႆႉဝွင် တႃႇသၢၼ်မၼ်း ၸိူဝ်းၼႆႉၵေႃႈ လႆႈသိုဝ်ႉဢၼ်ပိူၼ်ႈမႃးၶၢႆပၼ်။ ယွၼ်ႉဝႃႈ သဵၼ်ႈတၢင်းတႃႇၵႂႃႇၸူးတၢင်ႇဝဵင်းၵေႃႈ လႆႈၵူဝ်ဢေႃႈ တႃႇတေၵႂႃႇၶၢႆတၢင်ႇတီႈၵေႃႈ ဢမ်ႇၸၢင်ႈ။

ထၢမ် – သိုပ်ႇၵႂႃႇၼႆႉၶႃႈလူး ၵဵဝ်ႇလူၺ်ႈလွင်ႈသၢၼ်မႆႉႁဵတ်းၶူဝ်းၶွင်ၸႂ်ႉတိုဝ်းၾိင်ႈထုင်းၸိူဝ်းၼႆႉ တေႁဵတ်းႁိုဝ်။ တေၶႂ်ႈသင်ႇ သႅၼ်းႁုၼ်ႈမႂ်ႇလႄႈ ၽူႈၵဵဝ်ႇၶွင်ႈၶဝ်ၸိူင်ႉႁိုဝ်ၽွင်ႈ?

တွပ်ႇ – ၸူးၸႂ်တႄႉ ၶႂ်ႈႁႂ်ႈသႅၼ်းႁုၼ်ႈမႂ်ႇႁူႉၸၵ်း ၾိင်ႈတႆးၶိုၼ်း။ ၶူဝ်းၶွင်ၸိူဝ်းၼႆႉ ဢမ်ႇၸႂ်ႈဝႃႈ ႁၼ်ထိုင်တႃႇၶၢႆၵူၺ်း။ ပေႃးႁဝ်းမေႃဢဝ်ၸႂ်ႉတိုဝ်းၵေႃႈ တၢင်ႇၶိူဝ်း တေႁၼ်ထိုင်ဝႃႈ မၼ်းတိုၵ်ႉပဵၼ်ၶူဝ်း ၾိင်ႈထုင်းႁဝ်းယူႇ။

ယဝ်ႉၵေႃႈ ၶႂ်ႈသင်ႇထိုင် ၽူႈလူလွမ်ၾိင်ႈထုင်းလိၵ်ႈလၢႆးႁဝ်းၶႃႈလႄႈသင် ၵေႃလိၵ်ႈလၢႆးလႄႈ ၾိင်ႈငႄႈ တႆး တင်းသဵင်ႈလႄႈသင် ၶႂ်ႈသင်ႇဝႃႈ ယႃႇပေႁႂ်ႈယဝ်ႉတီႈလိၵ်ႈလၢႆးၵူၺ်း ၶူဝ်းၶွင်ၸႂ်ႉတိုဝ်းႁဝ်းၶႃႈၵေႃႈ လူဝ်ႇမေႃႁၵ်ႉသႃဝႆႉ။ ပေႃးဢမ်ႇၼၼ် ၸၢင်ႈဝၢႆးႁၢႆၵႂႃႇသေ ၶူဝ်းၵိုၵ်းၶိူဝ်းႁဝ်းၵေႃႈ တေဢမ်ႇၵိုတ်းသင်ယဝ်ႉ။

ထၢမ် – မိူဝ်ႈၵႆႈလႆႈလၢတ်ႈလွင်ႈ တႆးပွတ်းတၢင်းၸႄႈၵႅင်းၼႆႉ ဢမ်ႇပေႃးမေႃလၢတ်ႈၵႂၢမ်းတႆးယဝ်ႉ ဢမ်ႇသူၼ်ၸႂ်တႆးယဝ်ႉၼႆလႄႈ တေႁဵတ်းႁိုဝ်သူၼ်းတုမ်ၶဝ် ႁႂ်ႈမႃးႁူႉၸၵ်း မၵ်းမၼ်ႈဝႃႈ ပဵၼ်တႆးၶိုၼ်းၶႃႈၼေႃ?

တွပ်ႇ – တေယၢပ်ႇယူႇ တေၵိုင်ႉၵၢင်ႉၵႂႃႇႁူၺ်းၶဝ်မႃးႁူႉၸၵ်းၸဝ်ႈၵဝ်ႇၶိုၼ်းတေယၢပ်ႇယူႇ။ ယွၼ်ႉဝႃႈ ထုၵ်ႇၶိူဝ်းပိူၼ်ႈ ဢိုၼ်မႃးႁိုင်ယဝ်ႉလူး။ ၶႃႈတႄႉ ၾၢႆႇၼိုင်ႈၵေႃႈ ပဵၼ်မေႃသွၼ်ဢၼ်ဢဝ်ပုၼ်ႈၽွၼ်းသေ သွၼ်ဝႆႉတီႈႁူင်းႁဵၼ်းလူင်ပွင်ၸိုင်ႈလႄႈ ၶႃႈၵႆႉလၢတ်ႈၼႄလုၵ်ႈဢွၼ်ႇသႅၼ်းႁုၼ်ႈမႂ်ႇႁဝ်းယူႇ ၵဵဝ်ႇလူၺ်ႈပိုၼ်းတႆး ၾိင်ႈတႆးၸိူဝ်းၼႆႉ။

ၼင်ႇႁိုဝ် ၶဝ်တေမေႃႁၵ်ႉၶိူဝ်းၸဝ်ႈၵဝ်ႇမႃး။ ၶႃႈယၢမ်ႈလၢတ်ႈၼႄဝႃႈ ပွတ်းတၢင်းႁဝ်းယူႇၼႆႉ ယၢမ်ႈပဵၼ်မိူင်းတႆးမႃး ၸိုဝ်ႈဝၢၼ်ႈၸိုဝ်ႈဝဵင်းၵေႃႈ ၵမ်ႈၼမ် ပဵၼ်ၸိုဝ်ႈတႆး ၼႆၸိူဝ်းၼႆႉ။ ပေႃးမေႃလၢတ်ႈ ပၼ်ၶဝ်မေႃသပ်းလႅင်းပၼ်ၶဝ်ၼႆ ဢၼ်ၼႆႉ ၶႃႈယုမ်ႇဝႃႈ ၶဝ်တေမေႃႁၵ်ႉတႆးမႃးၶိုၼ်း ၼႆဢေႃႈ။

ထၢမ် – လႆႈငိၼ်းဝႃႈ ပီႈပဵၼ်မေႃသွၼ်ၼႆႁႃႉ ပဵၼ်ၵၢၼ်ဢၼ်ႁႃၵိၼ်လဵင်ႉတွင်ႉယူႇမိူဝ်ႈလဵဝ်ၶႃႈႁႃႉ?

တွပ်ႇ – မိူဝ်ႈသိုၵ်းမၢၼ်ႈ ပႆႇယိုတ်းမိူင်းတႄႉ ၶႃႈႁဵတ်းၵၢၼ်မေႃသွၼ် ၼႂ်းႁူင်းႁဵၼ်းလူင်ပွင်ၸိုင်ႈဢေႃႈ။ ယၢမ်းလဵဝ်တႄႉ ဢမ်ႇႁဵတ်းၼႂ်းႁူင်းႁဵၼ်းယဝ်ႉ။ ႁူင်းႁဵၼ်းတင်းႁဝ်းၵေႃႈ ယွၼ်ႉငဝ်းလၢႆးဝၢၼ်ႈမိူင်း သေ ဢမ်ႇပိုတ်ႇသွၼ်။ ပေႃးသွၼ် ၵေႃႈ ဢၼ်တေၸမ်ဝဵင်း ၸိူဝ်းၼၼ်ႉၵူၺ်း။ ၶႃႈၵေႃႈ ၶၢဝ်းယၢမ်း တၼ်းတၼ်း ၶဝ်ႈသွၼ်လိၵ်ႈပၼ်လုၵ်ႈဢွၼ်ႇၼႂ်း ဢွၼ်ႊလၢႆႊၸိူဝ်းၼႆႉသေ ယဝ်ႉၵေႃႈ ၾိုၵ်းလၢႆးမေႃတိၼ်မေႃမိုဝ်းၶႃႈ ၸိူဝ်းၼႆႉဝႆႉဢေႃႈ။

ထၢမ် – ႁဝ်းလၢတ်ႈလွင်ႈတႆးဝႆႉယူႇလႄႈ တႆးဢၼ်ယူႇပွတ်းတၢင်းၸႄႈၵဵင်းၼႆႉလႄႈ တႆးဢၼ်မီးၼႂ်း မိူင်းသၼ်လွႆတႆး ၸိူဝ်းၼႆႉ မိူဝ်းၼႃႈမႃး တေၶႂ်ႈႁႂ်ႈမၼ်းပဵၼ်ႁိုဝ်မႃး။ ၼင်ႇႁိုဝ် တေၵွင်ႉသၢၼ်ၵၼ်လႆႈ လီၼၼ်ႉ ဝူၼ်ႉဝႆႉၸိူင်ႉႁိုဝ်?

တွပ်ႇ – ႁဝ်းၶႃႈတႄႉ တႆးတၢင်းလႂ်ၵေႃႈယဝ်ႉ ႁဝ်းတိုၵ်ႉမၵ်းမၼ်ႈဝႃႈ ပဵၼ်ၼိူဝ်ႉလိူတ်ႈၶိူဝ်းလဵဝ်ၵၼ်ယူႇ။ ယဝ်ႉၵေႃႈ ပေႃးႁဝ်းၶႃႈ ဢွၵ်ႇတၢင်းမိူဝ်းထိုင်မိူင်းတႆး ထုင်ႉဢၼ်တႆးယူႇၼမ် ၸိူဝ်းၼၼ်ႉၼႆ ႁႂ်ႈပွင်ႇၸႂ်ပၼ်ႁဝ်းၶႃႈၽွင်ႈ။

မၢင်ၸိူဝ်းၵႆႉလႄႇဝႃႈ လၢတ်ႈၵႂၢမ်းဢမ်ႇပီႇလႄႈ ဢမ်ႇၸႂ်ႈတႆးၸႅတ်ႈယူဝ်ႉသင်သိင်သေ ၵိူဝ်ႉၵၼ်လဵၼ်ႈ ၵေႃႈမီးလႄႈ ဢမ်ႇၶႂ်ႈႁႂ်ႈပဵၼ်။ တီႈတႄႉမၼ်း ၶိူဝ်းတႆးႁဝ်းၼႆႉ ယၢမ်ႈၺႃးပိူၼ်ႈၶီႇၼဵၵ်းတဵၵ်းတဵင်မႃး ၶၢဝ်းႁိုင်။ ဢမ်ႇႁႂ်ႈလၢတ်ႈၵႂၢမ်းတႆး။ ပေႃးလၢတ်ႈၼႆ ၺႃးတီႉၺႃးၶႃႈၵေႃႈမီး။

ယွၼ်ႉၼၼ်လႄႈ ထိုင်မႃးၵၢပ်ႈယၢမ်းလဵဝ် ဢမ်ႇသူႈမေႃၵႂၢမ်းတႆးၵၼ်ယဝ်ႉ။ ယွၼ်ႉၼၼ် တႆးၼင်ႇၵၼ်သေတႃႉ ၶၢဝ်းတၢင်းၽဝၸူဝ်ႈပၢၼ်ၵူၼ်း ဢမ်ႇမိူၼ်ၵၼ် တူဝ်ထူပ်းဢမ်ႇမိူၼ်ၵၼ်လႄႈ ႁႂ်ႈၵူႈၵေႃႉပွင်ႇၸႂ်။ ယွၼ်ႉၼၼ် ထုၵ်ႇလီပၼ်ႁႅင်းၸႂ်ၵၼ် ၸိူဝ်းဢမ်ႇမေႃၵႂၢမ်းတႆးၵေႃႈ ႁႂ်ႈမေႃတိုတ်ႉတၢႆး ၵၼ် သွၼ်ပၼ်ၵၼ်ၶိုၼ်း။ ႁႂ်ႈမေႃႁပ်ႉတွၼ်ႈ ပီႈၼွင်ႉတႆး ၸိူဝ်းပႆႇမေႃလၢတ်ႈၵႂၢမ်းတႆး ၸိူဝ်းၼၼ်ႉ သေ ပၼ်တၢင်းဢုၼ်ႇၸႂ်ၶဝ်သေၵမ်း။ ပေႃးႁဵတ်းၼၼ် တႆးပွတ်းတၢင်း ႁဝ်းၼႆႉလႄႈ တႆးလၢႆတီႈလၢႆ တၢင်းၸင်ႇၶဝ်ႈႁႃၵၼ်လႆႈ။

ထၢမ် – ဢၼ်ၶႃႈဢမ်ႇထၢမ်မႅၼ်ႈသေ ဢၼ်ပီႈႁဝ်းၶႂ်ႈလၢတ်ႈၼၼ်ႉ မီးသင်ထႅင်ႈၶႃႈ?

တွပ်ႇ – ဢၼ်ၶႂ်ႈၸိမ်လၢတ်ႈထႅင်ႈတႄႉ ၶႂ်ႈႁႂ်ႈတႆးႁဝ်းမေႃႁၵ်ႉသႃ ၶူဝ်းၶွင်ၾိင်ႈတႆး ႁႂ်ႈမေႃဝႆႉၵႃႈၶၼ်။ ယဝ်ႉၵေႃႈ ၶႂ်ႈလၢတ်ႈထႅင်ႈဝႃႈ ၵူၼ်းႁၵ်ႉၽိုင်ႈထုင်းၵမ်ႈၼမ်ၼႆႉ တေဢဝ်မေႃတိၼ်မေႃမိုဝ်းသေ ႁဵတ်းပဵၼ်ၵၢၼ်ႁႃၵိၼ်လဵင်ႉတွင်ႉဢမ်ႇငၢႆႈ။

ယွၼ်ႉၼၼ် တႃႇၵူၼ်းၸိူဝ်းႁၵ်ႉၾိင်ႈထုင်း တေႁဵတ်းဢွၵ်ႇၶူဝ်းၶွင်ၵိုၵ်းၶိူဝ်း ၸိူဝ်းၼႆႉၵေႃႈ ႁဵတ်းၵႂႃႇ ၶၢဝ်းႁိုင်တႄႉ တေယၢပ်ႇယူႇ။ ပေႃးဝႃႈ ဢမ်ႇမီးၽႂ်ႁဵတ်းဢွၵ်ႇၵေႃႈ ၶူဝ်းၾိင်ႈထုင်း တေၸူမ်ႁၢႆၵႂႃႇလွႆးလွႆး။

ယွၼ်ႉပိူဝ်ႈၼၼ်ႉ ပေႃးဝႃႈပဵၼ်ၶူဝ်းဢၼ်ဢဝ် ပၢႆးပၺ်ႇၺႃႇမေႃတိၼ်မေႃမိုဝ်းတႆးသေ ႁဵတ်းဝႆႉၼၼ်ႉ ၶႅၼ်းတေႃႈ ယႃႇပေသဵတ်ႈၵႃႈမၼ်းသေၵမ်း။ ႁႂ်ႈမေႃဢဝ်ၵုင်ႇမုၼ်သေ သိုဝ်ႉၸႂ်ႉ။ ပေႃးႁဵတ်းၼၼ်မႃး တင်းၼမ်ၵေႃႈ ၸင်ႇတေႁၼ်ဝႃႈ ပဵၼ်ၶူဝ်းၵိုၵ်းၸၢဝ်းတႆးတႄႉတႄႉ။ ပေႃးႁဝ်းမႃးတူၺ်း ၵၢပ်ႈယၢမ်းလဵဝ် တႆးႁဝ်းတႄႉဢမ်ႇႁူႉ။ ဢမ်ႇႁူႉဝႃႈ ၶူဝ်းၾိင်ႈထုင်းဢၼ်လႂ်လမ်ႇလွင်ႈ တၢင်းၸၢဝ်းၶိူဝ်း ဢၼ်ယူႇၵိၼ်ၸမ်တႆးတႄႉ ဢဝ်ၵႂႃႇၶူင်သေ ႁဵတ်းပဵၼ်ၶွင်ၶဝ် ပိုၼ်ၽၢဝ်ႇၶၢႆဝႃႈ ပဵၼ်ၶွင်ၶဝ်လုမ်း လုမ်းၵေႃႈမီးယဝ်ႉ။ ဢမ်ႇထုၵ်ႇလီပဵၼ်သေဢိတ်း။ ၶူဝ်းၶွင်တႆး တႆးဢမ်ႇႁူႉၸၵ်း တႆးဢမ်ႇဝႆႉၵႃႈၶၼ် တႆးဢမ်ႇဢဝ်ၵုင်ႇမုၼ်ၵေႃႈ ဝၼ်းၼိုင်ႈတေ ဢမ်ႇၸႂ်ႈၶွင်တႆးယဝ်ႉ။

ဢၼ်ပၼ်တိုဝ်ႉတၢင်းလႆႈပိုတ်ႇလၢတ်ႈၼႄ လွင်ႈတႆးဢၼ်ယူႇတၢင်းၸႄႈၵႅင်းၼႆႉ ပွတ်းဢွၼ်ႇတွၼ်ႈ ၼိုင်ႈလႄႈ ႁူမ်ၸူမ်းယိၼ်းၸူမ်းၽူႈတွႆႇႁွၵ်ႈ ယႂ်ႇၼမ်ယူႇၶႃႈဢေႃႈ။