သိုၵ်းမၢၼ်ႈ ယိုဝ်းၵွင်ႈလူင်တူၵ်းသႂ်ႇ တီႈဢိူင်ႇဝၢၼ်ႈၸၢင်ႉ ၾၢႆႇတူၵ်းဝဵင်းလွႆလႅမ်ဢွၼ်ႇ ၼႂ်းၸႄႈဝဵင်းလွႆၶေႃ ၸႄႈမိူင်းယၢင်းလႅင် တိူဝ်ႉသႂ်ႇလုၵ်ႈဢွၼ်ႇ တၢႆ 2 ၵေႃႉ မၢတ်ႇၸဵပ်းႁၢဝ်ႈႁႅင်း 2 ၵေႃႉ။
ဝၼ်းတီႈ 9/1/2025 ယၢမ်းၵၢင်ဝၼ်း သိုၵ်းမၢၼ်ႈ လုၵ်ႉတီႈတပ်ႉၶမယ – 530 သေ ယိုဝ်းၵွင်ႈလူင်သႂ်ႇတူၵ်းတိူဝ်ႉလုၵ်ႈ ဢွၼ်ႇ ဢႃယု 12 ၶူပ်ႇတၢႆ 2 ၵေႃႉ မၢတ်ႇၸဵပ်းႁၢဝ်ႈႁႅင်း 2 ၵေႃႉ။ လုၵ်ႈဢွၼ်ႇလႅင် ၵေႃႉၼိုင်ႈ ၶႅၼ်ပုတ်း။
ၵူၼ်းပိုၼ်ႉတီႈ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ -“ၶဝ်ယိုဝ်းၵၼ် တိူဝ်ႉလုၵ်ႈဢွၼ်ႇမၢတ်ႇၸဵပ်း လူႉတၢႆ။ ၼၢင်းယိင်း ၵေႃႉၼိုင်ႈ မိုဝ်းပုတ်း။ ၸုမ်းလုၵ်ႉၽိုၼ်ႉ ဢဝ်ၵူၼ်းမၢတ်ႇၸဵပ်းၵႂႃႇသူင်ႇပၼ်ႁူင်းယႃ”- ဝႃႈၼႆ။
သိုၵ်းမၢၼ်ႈလႄႈ သိုၵ်းပဢူဝ်း PNLA ၼႆႉ ပိုတ်းယိုဝ်းတိုၵ်းတေႃးၵၼ် တၢင်းဝဵင်းသီႇသႅင်ႇ။ သိုၵ်းမၢၼ်ႈ ယိုဝ်းၵွင်ႈလူင် သမ်ႉတူၵ်းသႂ်ႇၼႂ်းဝၢၼ်ႈ။
ၵူၼ်းၸၢႆးပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ -“ဝၢၼ်ႈလွႆလႅမ်ဢွၼ်ႇတင်း ဝဵင်းသီႇသႅင်ႇၼႆႉ ယၢၼ်ၵၼ် 10 လၵ်း။ တႄႇပီၵၢႆမႃး သိုၵ်းမၢၼ်ႈ ၵႆႉပိုတ်းယိုဝ်းမၢၵ်ႇၵွင်ႈလူင်ၼႃႇ တူၵ်းသႂ်ႇဝၢၼ်ႈသူၼ်ႁိူၼ်းယေး ၵူၼ်းမိူင်းတိၵ်းတိၵ်း”- ဝႃႈၼႆ။
သိုၵ်းမၢၼ်ႈၼႆႉ ဢမ်ႇဝႄႈတီႈယူႇၵူၼ်းမိူင်းၵူၼ်းသိုၵ်းသေ ပိုတ်းယိုဝ်းၵွင်ႈလူင် ၵႂႃႇၵူႈႁူးၵူႈတၢင်းလႄႈ ႁဵတ်းႁႂ်ႈၵူၼ်းပၢႆႈ ၽေးသိုၵ်း ယူႇဝႆႉတၢင်းဝၢၼ်ႈလႄႈ တၢင်းထိူၼ်ႇတၢင်းလွႆၼၼ်ႉ မႆႈၸႂ်ၵူဝ်လႆႈပၢႆႈထႅင်ႈ။
တပ်ႉသိုၵ်းယၢင်းလႅင် (KNDF) ပိုၼ်ၽၢဝ်ႇလၢတ်ႈဝႃႈ – ႁႂ်ႈၵူၼ်းမိူင်းၾၢင်ႉယူႇၾၢင်ႉၵိၼ်၊ ႁႂ်ႈၵႆႉထွမ်ႇသဵင်ၵွင်ႈသဵင်မၢၵ်ႇ၊ ႁႂ်ႈၾၢင်ႉထွမ်ႇၶၢဝ်ႇထွမ်ႇငၢဝ်းၽွင်ႈ ဝႃႈၼႆ။
သိုၵ်းမၢၼ်ႈၼႆႉ တႃႇၵုမ်းလႆႈၶိုၼ်းဝဵင်းလွႆၶေႃ – မိူင်းပၢႆးၼၼ်ႉ ထႅမ်ႁႅင်းသိုၵ်းယူႇၵူႈဝၼ်းၶိုၼ်း – ၵူၼ်းပိုၼ်ႉတီႈ လၢတ်ႈၼင်ႇၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ