ပီ 2024 ၼၼ်ႉ တူဝ်ႈမိူင်းမၢၼ်ႈပတ်းပိုၼ်ႉ ၺႃးတတ်းၶၢတ်ႇ ဢိၼ်ႊထိူဝ်ႊၼႅတ်ႊ 130 ၵမ်းပၢႆ တႃႇ 82 ၸႄႈဝဵင်း ဝႃႈၼႆ။

ၸုမ်းတူင်ႉၼိုင် တႃႇသုၼ်ႇလႆႈလွတ်ႈလႅဝ်း တီႊၵျိတ်ႊတႄႊ (Myanmar Internet Project) ႁၢႆးငၢၼ်း ၼႂ်းဝၼ်းတီႈ 7/1/2025 ၼႆႉဝႃႈ ၸႄႈဝဵင်းၸိူဝ်းၺႃးတတ်း ဢိၼ်ႊထိူဝ်ႊၼႅတ်ႊၼၼ်ႉ ပဵၼ်ၼႂ်းတိူင်းပႃႇၵိူဝ် ၊ တိူင်းဝဵင်းလိူဝ်ႇ ၊ တိူင်းမၵူၺ်း ၊ တိူင်းၸႄႈၵႅင်း ၊ တိူင်းတၼၢဝ်းသီ ၊ ၸႄႈမိူင်းမွၼ်း ၊ ၸႄႈမိူင်းတႆး ၊ ၸႄႈမိူင်းရၶႅင်ႇ ၊ ၸႄႈမိူင်းၶျၢင်း ၊ ၸႄႈမိူင်းၶၢင်လႄႈ ၸႄႈမိူင်းယၢင်းၽိူၵ်ႇ ၸိူဝ်းၼႆႉ။

ၸႄႈဝဵင်း ဢၼ်သိုၵ်းမၢၼ်ႈလႆႈပွႆႇၽႃႈၵႂႃႇ ၵမ်ႈၼမ်ၼၼ်ႉ ၺႃးတတ်းၶၢတ်ႇ ဢိၼ်ႊထိူဝ်ႊၼႅတ်ႊဝႆႉ။

ၼႂ်းပီ 2024 ၼၼ်ႉ သိုၵ်းမၢၼ်ႈ ပိၵ်ႉဢိုတ်းပႅတ်ႈ VPN သေဢမ်ႇၵႃး သင်ၵူတ်ႇထတ်းႁၼ်ၺႃး ၸႂ်ႉတိုဝ်း VPN ၼႆၸိုင် ၺႃးသိုၵ်းမၢၼ်ႈ တီႉၺွပ်းထႅင်ႈ။ ယဝ်ႉၵေႃႈ ၵူၼ်းၸိူဝ်းတႅမ်ႈတၢင်ႇ သၢၼ်ၶတ်းသိုၵ်းမၢၼ်ႈ တီႈၼိူဝ်သိုဝ်ႇတူင်ႇဝူင်း ၵူၼ်း ၸိူဝ်းၼၼ်ႉၵေႃႈ ၺႃးတီႉၺွပ်း 374 ၵေႃႉ ဝႃႈၼႆ။

ၵူၼ်းမိူင်းၸိူဝ်းယူႇသဝ်းၼႂ်းပိုၼ်ႉတီႈ ဢၼ်သိုၵ်းမၢၼ်ႈ ၵုမ်းၵမ်ဝႆႉၼၼ်ႉ ၺႃးသိုၵ်းမၢၼ်ႈပၵ်းတႃပႂ်ႉတူၺ်းၸွမ်း ၼႂ်း ၵၢၼ်ၸႂ်ႉတိုဝ်းဢိၼ်ႊထိူဝ်ႊၼႅတ်ႊ။ ၵူၼ်းမိူင်း ၸိူဝ်းယူႇသဝ်းၼႂ်းပိုၼ်ႉတီႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၶဝ်သမ်ႉ ၺႃးတတ်းၶၢတ်ႇပႅတ်ႈ ဢိၼ်ႊထိူဝ်ႊၼႅတ်ႊ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။