ဝၼ်းတီႈ 10/1/2025 ယၢမ်းဝၢႆးဝၼ်းမွၵ်ႈ 3 မူင်း ၵႃးတင်း ရူတ်ႉၶိူင်ႈၽႃႇၵၼ် တီႈပွၵ်ႉတူဝ်ႇယွတ်ႈ ၼႂ်းဝဵင်းမူႇၸေႊ ၸိုင်ႈတႆးပွတ်းႁွင်ႇ လႅၼ်လိၼ်တႆး – ၶႄႇ ထိုင်တီႈဢွၼ်ႇယိင်းၼုမ်ႇ 2 ၵေႃႉ လႆႈလူႉတၢႆ ဝႃႈၼႆ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈၽူႈတွႆႇႁွၵ်ႈဝႃႈ – “ၵႃးတင်း ရူတ်ႉၶိူင်ႈၽႃႇၵၼ် တီႈၼိူဝ်သဵၼ်ႈတၢင်း မင်ႇၵလႃႇမူႇၸေႊ ဢွၼ်ႇယိင်း 2 ၵေႃႉ ဢၼ်သွၼ်ႉရူတ်ႉၶိူင်ႈမႃးၸွမ်းၵၼ်ၼၼ်ႉ လႆႈလူႉတၢႆတင်း 2 ဢေႃႈ။ ၵေႃႉၼိုင်ႈတႄႉ လူႉတၢႆထင်တီႈ၊ ထႅင်ႈၵေႃႉၼိုင်ႈတႄႉ ၵႂႃႇလူႉတၢႆ တီႈႁူင်းယႃ”- ဝႃႈၼႆ။
ဢွၼ်ႇယိင်းၼုမ်ႇ 2 ၵေႃႉ ဢၼ်လႆႈလူႉတၢႆၵႂႃႇၼၼ်ႉ ၸိုဝ်ႈႁွင်ႉ ၼၢင်းဢွမ်ငိုၼ်း ယူႇဝၢၼ်ႈၼွင်ယၢင်း ပဵၼ်လုၵ်ႈယိင်း ၸၢႆးဢၢႆႈထုၼ်းလႄႈ ၼၢင်းၶမ်းသႃႇ။ ထႅင်ႈၵေႃႉၼိုင်ႈသမ်ႉ ၼၢင်းလၢဝ်ၽွင်ၶမ်း ယူႇဝၢၼ်ႈပၢင်ႇၶမ်း လုၵ်ႈယိင်း ၸၢႆး ဢၢႆႈၶမ်းလႄႈ ၼၢင်းမူၺ်ၶမ်း။
“ၵႃးၼႆႉ တေလႅပ်ႈႁေႃႈဝႆးဢေႃႈ ၽႃႇသႂ်ႇတီႈရူတ်ႉၶိူင်ႈၼၼ်ႉ ထိုင်ပေႃးပဵၼ်ၵႂႃႇ 2 ပွတ်းၶႃႈလူး။ လႆႈႁူႉဝႆႉတႄႉ ၸဝ်ႈ ၵႃးၼၼ်ႉ ပဵၼ်ၵူၼ်းၼႂ်းၸုမ်းပျီႇတူႉၸိတ်ႉ။ ၵူၺ်းၵႃႈ ပဵၼ်လုၵ်ႈၸုမ်းလႂ်တႄႉ ပႆႇႁူႉ။ လွင်ႈမႃႇသႃႇပၢင်သွမ်း ဢွၼ်ႇယိင်း 2 ၵေႃႉၼၼ်ႉတႄႉ တၢင်းၾၢႆႇၸဝ်ႈၵႃးၶဝ်ဝႃႈ ၸွမ်းၼင်ႇပွင်ပဵၼ်လႆႈ တေၸွႆႈၵႂႃႇၼႆၶႃႈဝႃႇ”- ၵူၼ်းပိုၼ်ႉတီႈ ဝဵင်းမူႇ ၸေႊ သိုပ်ႇလၢတ်ႈၼႄၼင်ႇၼႆ။
ဢိင်ၼိူဝ်လွင်ႈ ၵႃးတင်း ရူတ်ႉၶိူင်ႈၽႃႇၵၼ်ၼႆႉသေ ယၢမ်းလဵဝ် ယူႇတီႈ တင်းသွင်ၾၢႆႇ တိုၵ်ႉဢုပ်ႇဢူဝ်းငူပ်ႉငီႉၵၼ်ဝႆႉယူႇ ယဝ်ႉၵေႃႈ ၸဝ်ႈၵႃးၼၼ်ႉတႄႉ ထုၵ်ႇပလိၵ်ႈၶဝ် ၵုမ်းတူဝ်ဝႆႉယဝ်ႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ