ၵူၼ်းမိူင်း ဝဵင်းလွႆၶေႃ ၸႄႈမိူင်းယၢင်းလႅင် လႆႈယွၼ်းဝႂ်ႁပ်ႉႁွင်း တီႈသိုၵ်းမၢၼ်ႈ တႃႇၶဝ်ႈဢွၵ်ႇဝဵင်း ဝႃႈၼႆ။
ယၢမ်းလဵဝ် တီႈဝဵင်းလွႆၶေႃ ပၢင်တိုၵ်းယဵၼ်ဝႆႉလႄႈ ၵူၼ်းပၢႆႈၽေးသိုၵ်း ဢွၼ်ၵၼ်ပွၵ်ႈမိူဝ်းႁိူၼ်းၶိုၼ်း။ သိုၵ်းမၢၼ်ႈသမ်ႉ ၵူတ်ႇထတ်းတင်းၶဝ်ႈဢွၵ်ႇဝဵင်း ႁၢဝ်ႈႁႅင်း။ ၸႂ်ႉၵူၼ်းမိူင်း ယွၼ်းဝႂ်ႁပ်ႉႁွင်းၶဝ်ႈဢွၵ်ႇဝဵင်း ပႃးထႅင်ႈ။ သိုၵ်းမၢၼ်ႈ လွၵ်ႇငိုတ်ႈဝႃႈ ပေႃးဢမ်ႇမီးဝႂ်ႁပ်ႉႁွင်း တေတီႉၺွပ်း ဝႃႈၼႆ။
ၼၢင်းယိင်း ၵူၼ်းပိုၼ်ႉတီႈဝဵင်းလွႆၶေႃ လၢတ်ႈၽူႈတွႆႇႁွၵ်ႈဝႃႈ -“လွင်ႈဝႂ်ႁပ်ႉႁွင်းၼႆႉ ၶဝ်လၢတ်ႈဝႆႉႁႂ်ႈဢဝ် ဝႆႉၸပ်းတူဝ်ယူႇတႃႇသေႇ။ ယၢမ်းလဵဝ်သမ်ႉ ၵူၼ်းပၢႆႈၽေးသိုၵ်း ဢွၼ်ၵၼ်ပွၵ်ႈၶိုၼ်းႁိူၼ်း တေႃႈလဵဝ် ၸင်ႇၵူတ်ႇထတ်းႁၢဝ်ႈႁႅင်း၊ ထၢမ်ပႃး မီးၵူၼ်းႁိူၼ်းလၢႆၵေႃႉ ၸိူဝ်းၼႆႉ၊ ပေႃးဢမ်ႇပႃး ဝႂ်ႁပ်ႉႁွင်း ၶဝ်တေၺွပ်း”- ဝႃႈၼႆ။
မိူၼ်ၼင်ႇတၢင်းၵႂႃႇ ဝဵင်းသီႇသႅင်ႇ မိူဝ်းဝဵင်းလွႆၶေႃၼၼ်ႉ မီးၵဵတ်ႉ/ လၢၼ်ႇ ဢမ်ႇယွမ်း 20 တီႈ၊ 1 ၵဵတ်ႉၼႆႉ တီႈဢေႇသုတ်းလႆႈပၼ်ငိုၼ်း 2 ႁဵင်ပျႃး။ ၵူၼ်းပၢႆႈၽေးသိုၵ်း ဢၼ်ပွၵ်ႈမိူဝ်းႁိူၼ်းၶိုၼ်းၵေႃႈ လႆႈမႆႈၸႂ် မၢၵ်ႇဢၼ်ၾင်ဝႆႉၼႂ်းလိၼ် ဝႃႈၼႆ။
ၼၢင်းယိင်း ပၢႆႈၽေးသိုၵ်း ပွၵ်ႈမိူဝ်းႁိူၼ်းၶိုၼ်း လၢတ်ႈၽူႈတွႆႇႁွၵ်ႈဝႃႈ -“မိူဝ်ႈဢွၼ်တၢင်းၵေႃႈ မီးပေႃႈထဝ်ႈ ၵေႃႉၼိုင်ႈ ယဵပ်ႇၺႃးမၢၵ်ႇတၢႆထင်တီႈ၊ ယၢမ်းလဵဝ်ႁဝ်းၶႃႈၵေႃႈ ၶႂ်ႈမႃးၸႂ်းႁိူၼ်းၼႃႇလႄႈ မႃးၵူၺ်းလႆႈမႆႈၸႂ် လွင်ႈမၢၵ်ႇယူႇ။ မၢၵ်ႇၾင်လိၼ် ၸိူဝ်းၼႆႉၵေႃႈ ၵူၼ်းမိူင်းလႆႈၽဵဝ်ႈၵူၺ်း။ ဢမ်ႇမီးၸုမ်းလႂ် မႃးၽဵဝ်ႈပၼ်၊ ၾၢႆႇသိုၵ်းမၢၼ်ႈလၢတ်ႈဝႃႈ တေမႃးၽႅဝ်ႈပၼ်သေတႃႉ ဢမ်ႇပႆႇၽႅဝ်ႈပၼ်”- ဝႃႈၼႆ။
ဢိင်ၼိူဝ် ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇၼႃႇသေလႄႈ ၵူၼ်းပၢႆႈၽေးသိုၵ်း ပွၵ်ႈၶိုၼ်းၵူၺ်း ဢၼ်ပွၵ်ႈမိူဝ်းတိုၵ်ႉမီး 3 ပုၼ်ႈ 1 ပုၼ်ႈၵူၺ်း ဝႃႈၼႆ။
ယၢမ်းလဵဝ် တႃႇႁႂ်ႈဝဵင်းလွႆၶေႃ ၵိုၼ်းၶွၼ်ႈၼၼ်ႉ ၾၢႆႇသိုၵ်းမၢၼ်ႈ တေမႄးၶိုၼ်းၵၢတ်ႇလူင်မဵဝ်ႉမ။ ၶႂ်ႈႁႂ်ႈ ၵူၼ်းပိုၼ်ႉတီႈ ၶဝ်ႈႁူမ်ႈၸွမ်းၼႆ သိုၵ်းမၢၼ်ႈ ၸီႉသင်ႇၵူၼ်းပိုၼ်ႉတီႈၼင်ႇၼႆ။
မိူဝ်ႈဝၼ်းတီႈ 12/12/2024 ထဝ်ႈၸၢႆး ၵေႃႉၼိုင်ႈ ဢၼ်ယူႇပွၵ်ႉတေႃးဢူႉၶူႇ (ဒေါဥခူ) ဝဵင်းလွႆၶေႃ ၊ လုၵ်ႉတီႈၼႂ်းထိူၼ်ႇ ဢၼ်ပၢႆႈသွၼ်ႈၽေးသိုၵ်းဝႆႉၼၼ်ႉသေ ပွၵ်ႈၶိုၼ်းႁိူၼ်း၊ မိူဝ်းယဵပ်ႇၺႃးမၢၵ်ႇၶႃပုတ်း လိူတ်ႈဢွၵ်ႇၼမ်ပူၼ်ႉတီႈ ထိုင်တီႈလူႉတၢႆ။
ဝၼ်းတီႈ10/12/2024 ၵၢင်ႉၵႄႇ တႂ်ႈသိုၵ်းမၢၼ်ႈ မႃးလၢတ်ႈတီႈၵျွင်းမုၼ်ၸဝ်ႈ ပွၵ်ႉပၢင်ၵၢင်းဝႃႈ ၵူၼ်းၸၢႆးၼႂ်းပွၵ်ႉ တေလႆႈၵႂႃႇႁၢပ်ႇၵၢၼ်သိုၵ်း၊ ၽႂ်ဢမ်ႇၸွမ်းၵႂၢမ်းသင်ႇ တေယိုတ်းဢဝ်ၶူဝ်းၶွင်ႁိူၼ်းယေးတီႈယူႇ တင်းမူတ်း ဝႃႈၼႆ။
ယွၼ်ႉပိူဝ်ႈၽႅၼ်ယၼ်ႇသိုၵ်း 1111 ပၢင်တိုၵ်း ၼႂ်းၵႄႈသိုၵ်းမၢၼ်ႈလႄႈ သိုၵ်းယၢင်းလႅင် KNDF- PDF သေ ဝဵင်းလွႆၶေႃ ဝဵင်းလူင်ၸႄႈမိူင်းယၢင်းလႅင် လႆႈလူႉၵွႆလႅဝ်ၽႅဝ်ႉ။ ၵူၼ်းမိူင်းၼႂ်းဝဵင်း ပႃးၸဵမ်တၢင်းဝၢၼ်ႈ လႆႈဢွၼ်ၵၼ်ပၢႆႈၽေးသိုၵ်း ၸဵမ်မိူဝ်ႈပီ 2021 ဝႃႈၼႆ။
တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ