သိုၵ်းမၢၼ်ႈ ဢဝ်ၶိူင်ႈမိၼ်မႃးယိုဝ်း တီႈဝဵင်းယၢၼ်းပျႄႊ တိူဝ်ႉၺႃးၵူၼ်းမိူင်းတၢႆ 40 ပၢႆ မၢတ်ႇၸဵပ်း 50 ပၢႆ ဝႃႈၼႆ။

ဝၼ်းတီႈ 8 /1/2025 ယၢမ်းၵၢင်ဝၼ်းမွၵ်ႈ 1မူင်း သိုၵ်းမၢၼ်ႈ ယိုတ်းမိူင်း ဢဝ်ၶိူင်ႈမိၼ် မႃးယိုဝ်းတီႈဝၢၼ်ႈ ၵျွၵ်ႉၼီႇမေႃႇ ၸႄႈဝဵင်းယၢၼ်းပျႄး ၸႄႈမိူင်းရၶႅင်ႇ တီႈဢၼ်တပ်ႉသိုၵ်းရၶႅင်ႇ AA ယိုတ်းလႆႈဝႆႉၼၼ်ႉ ဝႃႈၼႆ။

မၢၵ်ႇတူၵ်းသႂ်ႇ တီႈဝၢၼ်ႈၵျွၵ်ႉၼီႇမေႃႇ၊ ပွၵ်ႉၸၢၼ်း၊ ပွၵ်ႉႁွင်ႇ၊ ပွၵ်ႉၵၢင်၊ တိူဝ်ႉႁိူၼ်းယေး ၵူၼ်းမိူင်းၾႆးမႆႈ လူႉၵွႆၵႂႃႇ 500 ပၢႆ။ ၵူၼ်းမိူင်းလူႉတၢႆ 40 ပၢႆ မၢတ်ႇၸဵပ်း 50 ပၢႆ၊ ၼႂ်းၵူၼ်းမၢတ်ႇၸဵပ်းၼၼ်ႉ ပႃးလုၵ်ႈဢွၼ်ႇ၊ ၼၢင်းယိင်းလႄႈ ၵူၼ်းထဝ်ႈ ၸိူဝ်းၼႆႉတင်းၼမ်။  

တီႈမိူင်းရၶႅင်ႇၼႆႉ မီး 17 ၸႄႈဝဵင်း။ ၼႂ်းၼၼ်ႉ သိုၵ်းရၶႅင်ႇ AA ယိုတ်းလႆႈ 12 ဝဵင်းယဝ်ႉ။ ပၢင်တိုၵ်း တိုၵ်ႉ သိုပ်ႇပဵၼ်ႁၢဝ်ႈႁႅင်းထႅင်ႈ 2 ဝဵင်း။ လိူဝ်ၼၼ်ႉ သိုၵ်းရၶႅင်ႇယိုတ်းလႆႈဝႆႉပႃး ဝဵင်းပလႅတ်ႉဝ ဢၼ်မီးၼႂ်းၸႄႈမိူင်းၶျၢင်း ဢၼ်တိတ်း ၸပ်းလႅၼ်လိၼ်မိူင်းရၶႅင်ႇ ၼၼ်ႉထႅင်ႈ – သိုဝ်ႇၶၢဝ်ႇ narinjara ဢွၵ်ႇဝႆႉၼင်ႇၼႆ။