ပၢင်တိုၵ်း သိုၵ်းမၢၼ်ႈတင်း သိုၵ်းတဢၢင်း တီႈၸႄႈဝဵင်းၼွင်ၶဵဝ် တုမ်ႉတိူဝ်ႉၵၢၼ်ႁႃၵိၼ်လဵင်ႉတွင်ႉ သူၼ်ႁႆႈၼႃးၵူၼ်းမိူင်း လူႉသုမ်းႁၢမ်းၵႂႃႇ ၼပ်ႉႁူဝ်ႁဵင်ဢေႊၶိူဝ်ႊယဝ်ႉ ဝႃႈၼႆ။

ယၢမ်းလဵဝ် ၼႂ်းၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇၼႆႉ သိုၵ်းတဢၢင်း TNLA ႁူမ်ႈ ၵၼ်တင်း ၸုမ်းၵႅတ်ႇၶႄၵူၼ်းမိူင်း PDF သေ လေႃႇတိုၵ်းတပ်ႉသိုၵ်းမၢၼ်ႈ ယိုတ်းမိူင်းမႃးႁၢဝ်ႈႁႅင်း ႁဵတ်းႁႂ်ႈၵူၼ်းမိူင်း ၼပ်ႉႁူဝ်ႁဵင် လႆႈပၢႆႈၽေးသိုၵ်းသေဢမ်ႇၵႃး တုမ်ႉတိူဝ်ႉ သူၼ်ၶဝ်ႈၵၢပ်ႇ၊ ၼႃး၊ ဢွႆႈ ၸိူဝ်းၼႆႉ လူႉသုမ်းမွၵ်ႈ 3-4 ႁဵင်ဢေႊၶိူဝ်ႊ ၼႆယဝ်ႉ။

ၵူၼ်းပိုၼ်ႉတီႈ ဝဵင်းၼွင်ၶဵဝ် လၢတ်ႈၽူႈတွႆႇႁွၵ်ႈဝႃႈ – “ယွၼ်ႉပၢင်တိုၵ်းၼႆႉသေ ၶဝ်ႈၼႃးၵေႃႈ ဢမ်ႇလႆႈပၢတ်ႇ၊ ၶဝ်ႈၵၢပ်ႇၵေႃႈ ဢမ်ႇလႆႈၵၢၼ်ႉ။ မိူဝ်ႈလဵဝ် ၶၢဝ်းတႅပ်းဢွႆႈၵေႃႈ ဢမ်ႇၸၢင်ႈၵႂႃႇတႅပ်း။ ယၢမ်းလဵဝ် သူၼ်ႁႆႈၼႃးတႄႉ လူႉသုမ်းႁၢမ်းမူတ်းယဝ်ႉ ပေႃးၼပ်ႉဢေႊၶိူဝ်ႊမၼ်းဝႃႈၸိုင် တေမီးမွၵ်ႈ 4 ဢေႊၶိူဝ်ႊယဝ်ႉ”- ဝႃႈၼႆ။

သူၼ်ႁႆႈၼႃး ဢၼ်လႆႈလူႉသုမ်းၵႂႃႇ ၼပ်ႉႁူဝ်ႁဵင်ဢေႊၶိူဝ်ႊၼႆႉ ၵမ်ႈၼမ် ပဵၼ်မူႇဝၢၼ်ႈယႂ်ႇ လင်ႁိူၼ်း ဢၼ်မီးၼပ်ႉ 200 – 300 လင် ၸိူဝ်းၼၼ်ႉ။ ယၢမ်းလဵဝ် ၶႂ်ႈဝႃႈပဵၼ်ဝၢၼ်ႈႁၢမ်းယဝ်ႉ။ ပေႃးၼပ်ႉသွၼ်ႇ တူၺ်းၸိုင် ဢမ်ႇယွမ်း 10 ဝၢၼ်ႈ ၸိူဝ်းၼႆႉယဝ်ႉ ဝႃႈၼႆ။

တႄႇဢဝ် ႁၢင်ႈပီ 2024 ၼၼ်ႉမႃး ႁၢၼ်ႉတေႃႇထိုင် ပီ 2025 ၼႆႉ ၸဝ်ႈသူၼ်ႁႆႈၼႃး ၵမ်ႈၼမ် ဢမ်ႇၸၢင်ႈ ၵႂႃႇၵဵပ်းမၢၵ်ႇၶဝ်ႈတဝ်ႈၼမ်ႉၵၼ် တႃႇတေသိုပ်ႇႁဵတ်းထႅင်ႈပီၼႃႈၼႆႉ ယိင်ႈၶႅၼ်းယၢပ်ႇၽိုတ်ႇ ဝႃႈၼႆ။

“တႃႇပီတေမႃးတႄႉ သင်ပၢင်တိုၵ်းယဵၼ်ၵႂႃႇၼႆ တေလႆႈႁဵတ်းၵၢၼ်ၶိုၼ်းလီလီ သင်တိုၵ်ႉသိုပ်ႇပဵၼ်ၵႂႃႇတႄႉ ႁဝ်းၶႃႈ ဢမ်ႇမီးတၢင်းမုင်ႈမွင်းတႃႇတေႁဵတ်းၵၢၼ်ယဝ်ႉ။ ပီၼႆႉ ပေႃးလႆႈၶိုၼ်း 40-50 သႅၼ်ပျႃးတႄႉ မႄးထူမ်တိုၼ်းလၢင်း ၶိုၼ်းၵူၺ်း။ ပီၼႆႉ ၶၢၼ်ၸႂ်ႁႅင်းၼႃႇ ပီတေမႃးတႄႉ တေၶၢၼ်ၸႂ် လိူဝ်ၼႆႉထႅင်ႈယဝ်ႉ ႁဝ်းၶႃႈ လၢမ်းတူၺ်းတႄႉ”- ၵူၼ်းပိုၼ်ႉတီႈ ဝဵင်းၼွင်ၶဵဝ် သိုပ်ႇလၢတ်ႈၼႄၼင်ႇၼႆ။

တင်ႈတႄႇၽႅၼ်ယၼ်ႇသိုၵ်း 1027 ၼၼ်ႉမႃး သိုၵ်းမၢၼ်ႈတင်း ၸုမ်းဢူၺ်းလီ 3 ၸုမ်း ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း တေႃႇထိုင်ဝၼ်းမိူဝ်ႈၼႆႉ။ ယွၼ်ႉပၢင်တိုၵ်းၼႆႉသေ ၵူၼ်းမိူင်းၼွင်ၶဵဝ် လႆႈပွႆႇပႅတ်ႈသူၼ်ႁႆႈၼႃး ႁိူၼ်းယေးဝတ်ႉဝႃး ၽႃသိူဝ်ႇ တင်းၼမ်။