ဝၼ်းတီႈ 12 /01/2025 ၼႆႉ ပဵၼ်ဝၼ်းၵေႃႇတင်ႈတပ်ႉသိုၵ်းတဢၢင်း PSLF/ TNLA လႄႈ ၵူႈလင်ႁိူၼ်း တၵ်းတေလႆႈ ပူၵ်းတင်ႈတုင်းၸိူဝ်ႉၸၢတ်ႈတဢၢင်း ဢမ်ႇတင်ႈဢမ်ႇလႆႈ၊ ႁိူၼ်းလႂ်ဢမ်ႇပူၵ်းတုင်းၸိူဝ်ႉၸၢတ်ႈ တေၵဵပ်းငိုၼ်း ဝႃႈၼႆ။

ဝၼ်းတီႈ 6/1/2025 ၼႆႉ သိုၵ်းတဢၢင်း TNLA ဝဵင်းၼမ်ႉတူႈ ႁွင်ႉဢဝ်ၽူႈၵွၼ်းပွၵ်ႉ – ဝၢၼ်ႈ – ဢိူင်ႇသေ ၸီႉသင်ႇဝႃႈ ဝၼ်းၵေႃႇတင်ႈတပ်ႉသိုၵ်းတဢၢင်းၼၼ်ႉ သင်ဝႃႈႁိူၼ်းလႂ် ဢမ်ႇပူၵ်းတုင်းၸိူဝ်ႉၸၢတ်ႈတဢၢင်းၸိုင် တေၵဵပ်းငိုၼ်းတူတ်ႈတၢမ်ႇ 250,000 ပျႃး ဝႃႈၼႆ။

ၵူၼ်းမိူင်းဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ -“ဝၼ်းတီႈ 12/1/2025 ၼႆႉ ဝၼ်းၵေႃႇတင်ႈတပ်ႉသိုၵ်း PSLF ၶွပ်ႈတဵမ် 62 ပီ။ ၵွပ်ႈၼႆ တင်ႈတႄႇယၢမ်းၵၢင်ၼႂ်ၸဝ်ႉ 5 မူင်း တေႃႇထိုင်ဝၢႆးဝၼ်း 5 မူင်းၼႆႉ ၵူႈႁိူၼ်းတၵ်းလႆႈပူၵ်းတုင်းၸိူဝ်ႉၸၢတ်ႈတဢၢင်း။ လႆႈၸႂ်ၵေႃႈလီ ဢမ်ႇလႆႈၸႂ်ၵေႃႈယဝ်ႉ တၵ်းတေလႆႈပူၵ်းတုင်း ဝႃႈၼႆၵမ်းလဵဝ်ယဝ်ႉၶႃႈ။ မိူၼ်တၢင်းပၼ်ဢမိင်ႉ ၶေႃႈပူင်ၵမ်းလဵဝ်ယဝ်ႉၶႃႈ။ ၵူၼ်းဝၢၼ်ႈတိုၼ်းဢမ်ႇ မီးတၢင်းလိူၵ်ႈယဝ်ႉၶႃႈ”- ဝႃႈၼႆ။

ဝဵင်းၼမ်ႉတူႈၼႆႉ ၸဵမ်မိူဝ်ႈပီ 2018 – 2019 သိုၵ်း TNLA လႄႈ RCSS ပိုတ်းယိုဝ်းတိုၵ်းတေႃးၵၼ် ႁၢဝ်ႈႁႅင်းသေ သိုၵ်း TNLA တူင်ႉၼိုင်ယူႇသဝ်းဝႆႉ။ ထိုင်မႃးၽႅၼ်ယၼ်ႇသိုၵ်း 1027 ၵေႃႈ TNLA ပိုၼ်ၽၢဝ်ႇႁွင်ႉ ဢဝ်မေႃသွၼ် CDM မႃးၶဝ်ႈၵၢၼ်ႁၢပ်ႇၵၢၼ် ၼႂ်းႁူင်းႁဵၼ်း ဢၼ်ပၼ်ႇၵၢၼ်ပၢႆးပၺ်ႇၺႃႇ သိုၵ်းတဢၢင်း တမ်းဝၢင်း။ သိုၵ်းမၢၼ်ႈၵေႃႈ ဢမ်ႇတူင်ႉ ၼိုင်ယူႇသဝ်းယဝ်ႉ ဝႃႈၼႆ။

ၵူၼ်းၼမ်ႉတူႈ လၢတ်ႈထႅင်ႈဝႃႈ -“သိုၵ်းတဢၢင်း ၶိၼ်ၶႂ်ႈၼႄဝႃႈ ၵူၼ်းမိူင်းဝဵင်းၼမ်ႉတူႈ ၵမ်ႉထႅမ်ႁၼ်လီ သိုၵ်းတဢၢင်းၽွင်းငမ်းၼႆၵူၺ်း။ ၸင်ႇဝႃႈၶဝ်သင်ႇႁႂ်ႈပူၵ်းတုင်းၶဝ်ၵူႈႁိူၼ်းၼႆႉ။ ပေႃးၶဝ်လၢတ်ႈဝႃႈ ၽႂ်ၵမ်ႉထႅမ်သိုၵ်း TNLA ၵေႃႈ ပူၵ်းတုင်းလႄႈ ၼႆတႄႉ တေပဵၼ်ႁိူၼ်းၸၢဝ်းလွႆၵူၺ်း တေပူၵ်းတုင်း”- ဝႃႈၼႆ။ 

တႄႇဢဝ်ႁူဝ်လိူၼ်ၵျႅၼ်ႊၼိဝ်ႊရီႊၼႆႉမႃး ၼႂ်းၵၢတ်ႇလူင်ဝဵင်းၼမ်ႉတူႈၵေႃႈ ၸဝ်ႈႁၢၼ်ႉၶၢႆၶူဝ်းလွႆ/ တဢၢင်း ဢွၼ် ၵၼ်ၶၢႆပႃးတုင်းၸိူဝ်ႉၸၢတ်ႈတဢၢင်း။ ၼိုင်ႈၽိုၼ် 9,500 ပျႃး သမ်ႉပေႃးၶဵဝ်ၵႂႃႇမူတ်း ဝႃႈၼႆ။

 လႅင်ႇၶၢဝ်ႇ – ၶုၼ်ၸၢႆး