ဝၼ်းတီႈ 6/1/2025 ယၢမ်းၵၢင်ၼႂ် 9 မူင်း သိုၵ်းမၢၼ်ႈ ပွႆႇမၢၵ်ႇသႂ်ႇႁိူၼ်းၵူၼ်းဝၢၼ်ႈထီႇသူင်ႇ ၸႄႈဝဵင်းသီႇသႅင်ႇ ႁိူၼ်း ၵူၼ်းမိူင်း လူႉၵွႆသွင်လင် ဝၢၼ်ႈထီႇသူင်ႇၼႆႉ ပဵၼ်ၸၢဝ်းပဢူဝ်းယူႇသဝ်းၼမ်။

ၶုၼ်ႇရဵင်းယၢၼ်ႇ ၽူႈၶၢၼ်ပၢၵ်ႇ PNLA လၢတ်ႈၽူႈတွႆႇႁွၵ်ႈဝႃႈ – “သိုၵ်းမၢၼ်ႈတင်း ပျီႇတူႉၸိတ်ႉ PNO ၼႆႉ ၵႆႉမႃးပွႆႇမၢၵ်ႇၼႃႇ၊ လုၵ်ႉတၢင်းဝၢၼ်ႈလွႆထွႆးသေ ဢဝ် Drone ပွႆႇမၢၵ်ႇသႂ်ႇ တင်းဝၢၼ်ႈထီႇသူင်ႇ။ ဝၼ်းတီႈ 6 ၼႆႉ ႁိူၼ်းလူႉၵွႆ 2 လင်၊ ၵူၼ်းမၢတ်ႇၸဵပ်းလူႉတၢႆတႄႉ ဢမ်ႇမီး”- ဝႃႈၼႆ။

တီႈဝၢၼ်ႈထီႇသူင်ႇၼႆႉ သိုၵ်းမၢၼ်ႈၵႆႉမႃးပွႆႇမၢၵ်ႇ တႄႇလိူၼ်ၵျႅၼ်ႊၼိဝ်ႊရီႊ ပီ 2024 တေႃႇထိုင် ၵျႅၼ်ႊၼိဝ်ႊရီႊပီ 2025 ၼႆႉ ယွၼ်ႉသိုၵ်းမၢၼ်ႈ မႃးပွႆႇမၢၵ်ႇသေ ႁိူၼ်းယေးၵူၼ်းမိူင်းလူႉၵွႆ မီးၵႂႃႇ 24 လင်ယဝ်ႉ ၶုၼ်ႇရဵင်းယၢၼ်ႇ လၢတ်ႈၼင်ႇၼႆ။

မိူၼ်ၼႆၼင်ႇၵဝ်ႇ မိူဝ်ႈဝၼ်းတီႈ 2/1/2025 ယၢမ်းၵၢင်ၼႂ် 10 မူင်း ၾၢႆႇတၢင်းသိုၵ်းမၢၼ်ႈ ဢဝ်ၻရူၼ်ႊပွႆႇမၢၵ်ႇ၊ တိူဝ်ႉသႂ်ႇ 3 ၵေႃႉ ပေႃႈမႄႈလုၵ်ႈ တိုၵ်ႉႁဵတ်းၵၢၼ် တီႈၼႂ်းသူၼ်ၶဝ်ႈၵၢပ်ႇ ဝၢၼ်ႈၼွင်ယဵၼ်း (ဢၼ်မီးၾၢႆႇၸၢၼ်း ဝဵင်းသီႇသႅင်ႇ)။ ၵေႃႉပဵၼ်ပေႃႈ မၢတ်ႇၸဵပ်း၊ သွင်ၵေႃႉမႄႈလုၵ်ႈ တၢႆထင်တီႈ။

တီႈဝဵင်းသီႇသႅင်ႇၼႆႉ ယၢမ်းလဵဝ် မီးၸုမ်းသိုၵ်းမၢၼ်ႈတင်း ပျီႇတူႉၸိတ်ႉ PNO လႄႈ တပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLA တူင်ႉၼိုင်ဝႆႉ။

သိုၵ်းပဢူဝ်း သွင်ၸုမ်းၼႆႉ တႄႇပိုတ်းယိုဝ်းၵၼ်မႃး မိူဝ်ႈပီၵၢႆ 2024 လိူၼ်ၵျႅၼ်ႊၼိဝ်ႊရီႊ ဝၼ်းတီႈ 21 ။ ၽွင်းၼၼ်ႉ သိုၵ်းမၢၼ်ႈလႄႈ ပျီႇတူႉၸိတ်ႉ PNO ႁႄႉႁၢမ်ႈ ရူတ်ႉၵႃး တၢင်ႇမၢၵ်ႇမိုဝ်ႈၸိုၼ်းယၢမ်း သိုၵ်းပဢူဝ်း PNLA တီႈဝၢၼ်ႈ ၸၢမ်ၵႃး ထုင်ႉလွႆမႆႇ/ လွႆၼမ်ႉသွမ်ႇ (မဲနယ်တောင်) ၾၢႆႇ PNLA သမ်ႉ ဢမ်ႇၵိုတ်းပၼ်လႄႈ တႄႇယိုဝ်းၵၼ်မႃး။ ပၢင်တိုၵ်း လၢမ်းထိုင်ၼႂ်းဝဵင်း သိုၵ်းမၢၼ်ႈ ဢဝ်ၶိူင်ႈမိၼ်သိုၵ်း မႃးယိုဝ်းထိုင်ၼႂ်းဝဵင်း၊ ၵူၼ်းမိူင်းဝဵင်းသီႇသႅင်ႇ ၶိုင်ႈပၢႆ လႆႈပၢႆႈ ၽေးသိုၵ်း။

ယၢမ်းလဵဝ် သိုၵ်းမၢၼ်ႈလႄႈ ပျီႇၸိတ်ႉပဢူဝ်း PNO ၶဝ် ထႅမ်ႁႅင်းသိုၵ်းၵႂႃႇတင်း ၾၢႆၶုၼ်၊ လွႆၶေႃ၊ မိူင်းပၢႆး ၶဵင်ႈၶႅင်ၵၢၼ်သိုၵ်းၵၼ်တင်း သိုၵ်းယၢင်းလႅင်ဝႆႉယူႇ ၵူၼ်းပိုၼ်ႉတီႈလၢတ်ႈၼင်ႇၼႆ။  

တႅမ်ႈ – ယိင်းသဵဝ်ႈၶၢဝ် (ၽူႈသိုဝ်ႇၶၢဝ်ႇၾိုၵ်းၵၢၼ်)