သိုၵ်းၵဝ်ႈၵၢင်ႉ MNDAA တႄႇၵူတ်ႇထတ်းဝႂ်ရူတ်ႉၵႃး (ဝႂ်ၶွၼ်ႇၵႃး) ႁၢဝ်ႈႁႅင်း သင်ဢမ်ႇမီးၸိုင်ဢမ်ႇပၼ် လတ်းၽၢၼ်ႇ ၶဝ်ႈဢွၵ်ႇၵႂႃႇမႃး ၼႂ်းဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။

တႄႇႁူဝ်လိူၼ်ၵျႅၼ်ႊၼိဝ်ႊရီႊ 2025 ၼႆႉမႃး သိုၵ်းၵဝ်ႈၵၢင်ႉ တင်ႈၵဵတ်ႉ/ လၢၼ်ႇ ပႂ်ႉၵူတ်ႇထတ်းဝႂ်ရူတ်ႉၵႃး ၵူၼ်းမိူင်း မိူၼ်ၼင်ႇ တၢင်းၶဝ်ႈဢွၵ်ႇဝဵင်းလႃႈသဵဝ်ႈ – သီႇပေႃႉ၊ လႃႈသဵဝ်ႈ – သႅၼ်ဝီလႄႈ လႃႈသဵဝ်ႈ – ၼမ်ႉတူႈ ၸိူဝ်းၼႆႉ ႁၢဝ်ႈႁႅင်း။

ၵူၼ်းလႃႈသဵဝ်ႈ ၽူႈယိင်း ဢႃယု 40 ပၢႆ လၢတ်ႈၽူႈတွႆႇႁွၵ်ႈဝႃႈ – “ဢၼ်သိုၵ်းၶႄႇၶဝ် ပႂ်ႉၵူတ်ႇထတ်းဝႂ်ရူတ်ႉၵႃးၼႆႉ တႄႇလိူၼ်ၼႆႉမႃးယဝ်ႉ မၢင်ဝၼ်းၵေႃႈပႂ်ႉ၊ မၢင်ဝၼ်းၵေႃႈ ဢမ်ႇပႂ်ႉ။ ၵမ်ႈၼမ် ၶဝ်တေပႂ်ႉၵူတ်ႇထတ်း ၸွမ်းတၢင်းၶဝ်ႈ ဢွၵ်ႇဝဵင်းလႃႈသဵဝ်ႈ ယၢမ်းၵၢင်ဝၼ်း ၸိူဝ်းၼႆႉ။ ၵူၼ်းမိူင်းတႄႉ ယၢပ်ႇဢေႃႈ ၸိူဝ်းပႆႇမီးဝႂ်ရူတ်ႉၵႃးတႄႉ ၶဝ်ဢမ်ႇပၼ်လတ်းၽၢၼ်ႇၶဝ်ႈဢွၵ်ႇဝဵင်း ၶဝ်ၸႂ်ႉပွၵ်ႈၶိုၼ်းႁဵတ်းၼၼ်ဢေႃႈ။ တၢမ်ႇငိုၼ်းတႄႉ ၶဝ်ပႆႇဢဝ်။ မိူၼ်ၼင်ႇ ၵႃးမုၼ်ၸဝ်ႈ ၸိူဝ်းၼႆႉၵေႃႈ မိူၼ်ၵၼ် ၶဝ်ဢမ်ႇပၼ်လတ်းၽၢၼ်ႇ သင်ဢမ်ႇမီးဝႂ်ၵႃး ဢၼ်ၶဝ်ႁဵတ်းပၼ်ၼၼ်ႉ”- ဝႃႈၼႆ။

တႄႇႁူဝ်လိူၼ်ၵျႅၼ်ႊၼိဝ်ႊရီႊၼႆႉမႃး သိုၵ်းၵဝ်ႈၵၢင်ႉ တႄႇႁဵတ်းပၼ်ဝႂ်ရူတ်ႉၵႃး (ဝႂ်ၶွၼ်ႇၵႃး) လၢႆႊသဵၼ်ႊ (License) ၸိူဝ်းၼႆႉမႃး။ ရူတ်ႉၵႃး ၼိုင်ႈလမ်းလႂ် လႆႈပၼ်ၵႃႈႁဵတ်းဝႂ် 15,000 ပျႃး။

ယၢမ်းလဵဝ် သိုၵ်းၵဝ်ႈၵၢင်ႇၶဝ် ႁဵတ်းဝႂ်ရူတ်ႉၵႃး ပၼ်ၵူၼ်းမိူင်း တီႈဝဵင်းလႃႈသဵဝ်ႈၼႆႉ တႄႇဢဝ်ပွၵ်ႉ 1 ထိုင် ပွၵ်ႉ 12 ႁဵတ်းပၼ်ၸွမ်းလုမ်းၽူႈၵွၼ်းပွၵ်ႉ ၽႂ်မၼ်းၵႂႃႇ ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 4 ၼႆႉ သိုၵ်းၵဝ်ႈၵၢင်ႉၶဝ် ပိုၼ်ၽၢဝ်ႇ ႁဵတ်းဝႂ်ရူတ်ႉၵႃးပၼ် တီႈပွၵ်ႉ 3 ပွၵ်ႉ 8 ပွၵ်ႈ 12 လႄႈ ဝၢၼ်ႈႁူဝ်ပိုၵ်ႉ ၸိူဝ်းၼႆႉမႃး။

တႄႇႁူဝ်လိူၼ်ၵျႅၼ်ႊၼိဝ်ႊရီႊၼႆႉမႃး သိုၵ်းၵဝ်ႈၵၢင်ႉ တင်ႈၵဵတ်ႉ/ လၢၼ်ႇ ပႂ်ႉၵူတ်ႇထတ်းရူတ်ႉၵႃး ဢမ်ႇမီး ဝႂ် ႁၢဝ်ႈႁႅင်း ၸွမ်းၼႂ်းပိုၼ်ႉတီႈၶဝ်ၵုမ်းၵမ် မိူၼ်ၼင်ႇ – သႅၼ်ဝီ၊ ၵုၼ်လူင်၊ လၢဝ်ႇၵၢႆး ၸိူဝ်းၼႆႉ သင်ဢမ်ႇမီး ဝႂ်ရူတ်ႉၵႃးၸိုင် ၶဝ်ဢမ်ႇပၼ်လတ်းၽၢၼ်ႇၵႂႃႇမႃး။