ၼႂ်းပီ 2024 ၼႆႉ သိုၵ်းမၢၼ်ႈ ၸႂ်ႉၶိူင်ႈမိၼ် ၶိူင်ႈၵွင်ႈၵၢင်ႇလူင် တိုၵ်းတေႃးပိုတ်းယိုဝ်းလႄႈ ၵူၼ်းမိူင်းၶၢင် ၺႃးၸၢၵ်ႇမၢၵ်ႇလူႉတၢႆ 140 ပၢႆ ဝႃႈၼႆ။
တီႈၼႂ်းၶေႃႈပိုၼ်ၽၢဝ်ႇ ၸုမ်းပၵ်းတႃပႂ်ႉတူၺ်း သုၼ်ႇလႆႈသုၼ်ႇပဵၼ်ၵူၼ်းမိူင်းၶၢင် (KHRW) ၼႂ်းဝၼ်းတီႈ 1/1/2025 ၼၼ်ႉ ပႃးဝႆႉဝႃႈ – ၵူၼ်းမိူင်းၶၢင် လူႉတၢႆ 142 ၵေႃႉ၊ မၢတ်ႇၸဵပ်း 167 ၵေႃႉလႄႈ ၺႃးတီႉၺွပ်းဝႆႉ 219 ၵေႃႉ ဝႃႈၼႆ။
ၵူၼ်းပိုၼ်ႉတီႈ ၼႂ်းဝဵင်းမိူင်းမွၵ်ႇ ၸႄႈမိူင်းၶၢင် ၵေႃႉၼိုင်ႈလၢတ်ႈဝႃႈ – ၼႂ်းပီ 2024 ၼႆႉ ယွၼ်ႉသိုၵ်းမၢၼ်ႈ ၸႂ်ႉၶိူင်ႈမိၼ်ပိုတ်းယိုဝ်းလႄႈ ၵူၼ်းမိူင်းၶၢင် လႆႈလူႉတၢႆပဵၼ်မူႇပဵၼ်ၸုမ်း။ ဢၼ်လူႉတၢႆၼမ်လိူဝ်ပိူၼ်ႈ ပဵၼ်ၼႂ်းၸႄႈဝဵင်းမၢၼ်ႈမေႃႇ – ဝႃႈၼႆ။
မိူဝ်ႈဝၼ်းတီႈ 15/11/2024 ပူၼ်ႉမႃးၼၼ်ႉ သိုၵ်းမၢၼ်ႈ ၸႂ်ႉၶိူင်ႈမိၼ် ပွႆႇမၢၵ်ႇပိုတ်းယိုဝ်း တီႈပၢင်သဝ်းၵူၼ်းပၢႆႈၽေး ဢၼ်မီးၼႂ်းဝၢင်းၵျွင်းၽြႃးၶရိတ်ႉယၼ်ႇ ဝၢၼ်ႈၵုင်းလေႃး (ကုန်းလောရွာ) ၸႄႈဝဵင်းမိူင်းမွၵ်ႇ ၸႄႈမိူင်းၶၢင် မီးၵူၼ်းလူႉတၢႆ 9 ၵေႃႉ ပႃးလုၵ်ႈဢွၼ်ႇ၊ မၢတ်ႇၸဵပ်းထႅင်ႈ 11 ၵေႃႉ ၼႆယဝ်ႉ။
မိူဝ်ႈၼႂ်းလိူၼ်သႅပ်ႊထႅမ်ႊပိူဝ်ႊ ပီ 2024 ပူၼ်ႉမႃးၼၼ်ႉၵေႃႈ သိုၵ်းမၢၼ်ႈဢဝ်ၶိူင်ႈမိၼ်ပွႆႇမၢၵ်ႇ ၼႂ်းပၢင်တိုၵ်း တီႈဝၢၼ်ႈသၢႆးတွင်ႇ (သိူၵ်ႈမူ) ၸႄႈဝဵင်းၽႃၵၢၼ်ႉ မီးၵူၼ်းလူႉတၢႆ 30 ပၢႆ။
တီႈၼႂ်းပၢင်တိုၵ်း ဢၼ်ပဵၼ်ယူႇၼႂ်းမိူင်းၶၢင် ယၢမ်းလဵဝ်ၼႆႉၵေႃႈ မီးၵူၼ်းလူႉတၢႆၼမ် သဵၼ်ႈမၢႆတႅတ်ႈတေႃးတႄႉ ပႆႇလႆႈႁူႉၼႆ ၸုမ်းၸွႆႈထႅမ်ၼႂ်းပိုၼ်ႉတီႈ လၢတ်ႈၼင်ႇၼႆ။
ၸွမ်းၼင်ႇၶၢဝ်ႇ RFA ၵဵပ်းသဵၼ်ႈမၢႆဝႆႉတႄႉ – လိူဝ်သေ တိူင်းတႃႈၵုင်ႈတင်း တိူင်းဢေႇရႃႇဝတီႇယဝ်ႉ တိူင်းလႄႈ ၸႄႈမိူင်း ဢၼ်ၵိုတ်းလိူဝ် 12 ဢၼ် ၺႃးသိုၵ်းမၢၼ်ႈ ၸႂ်ႉၶိူင်ႈမိၼ် ၶိူင်ႈၵွင်ႈၵၢင်ႇလူင်ပိုတ်းယိုဝ်းလႄႈ ၵူၼ်းမိူင်းလူႉတၢႆ 1,769 ၵေႃႉ၊ မၢတ်ႇၸဵပ်း 3,720 ၵေႃႉ – သိုဝ်ႇၶၢဝ်ႇ RFA ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ