တပ်ႉၸုမ်းပူတ်းပွႆႇၵူၼ်းမိူင်းထၼု DPLF/DPLA လၢတ်ႈဝႃႈ တေႁူမ်ႈၸွမ်းၸုမ်းလုၵ်ႉၽိုၼ်ႉသေ ၶဝ်ႈပၢင်တိုၵ်းၵႂႃႇ တႄႇမိူင်းတႆးပွတ်းၸၢၼ်း တေႃႇထိုင်ပတ်းပိုၼ်ႉမိူင်းမၢၼ်ႈ ဝႃႈၼႆ။

တႄႇဢဝ် ဝၼ်းတီႈ 4-7/1/2025 ၼႆႉ သိုၵ်းမၢၼ်ႈ ယိုတ်းမိူင်းတင်း သိုၵ်းထၼု PDLA ၶဵင်ႈၶႅင်ၵၢၼ်သိုၵ်းတေႃႇၵၼ် တၢင်းထုင်ႉၵျွၵ်ႉၵူႇ၊ ဢၢင်ႇတေႃး ၼႂ်းၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်းဝႆႉ ၵူဝ်ႇထုၼ်းထုၼ်းၼၢႆႇ ႁူဝ်ပဝ်ႈ သိုၵ်းထၼု လၢတ်ႈဝႆႉတီႈၽူႈတွႆႇႁွၵ်ႈၼင်ႇၼႆ။

“ႁဝ်းၶႃႈ တႄႇပိုတ်ႇၼႃႈသိုၵ်း တေႃႇသိုၵ်းမၢၼ်ႈမႃး တၢင်းထုင်ႉၵျွၵ်ႉၵူႇၼၼ်ႉသေ တေႃႇထိုင်ယၢမ်းလဵဝ် ႁဝ်းၶႃႈ တိုၵ်ႉ ၶဵင်ႈၶႅင် ၵၢၼ်သိုၵ်းၵၼ်ဝႆႉယူႇ။ ယၢမ်းလဵဝ် ႁဝ်းၶႃႈ တႄႇပိုတ်ႇပၢင်တိုၵ်းမႃးမီး 2 တီႈယဝ်ႉ။ တၢင်းဝၢၼ်ႈတွင်းၶမ်း ဝဵင်း ၼွင်ၶဵဝ်ၼၼ်ႉလႄႈ တၢင်းၵျွၵ်ႉၵူႇ ဢၢင်ႇတေႃး ဝဵင်းလွၵ်ႉၸွၵ်ႉၼႆႉ”- ဝႃႈၼႆ။

ယူႇတီႈ ၸုမ်းသိုၵ်းထၼုသေ တေႁူမ်ႈၸွမ်းၸုမ်းလုၵ်ႉၽိုၼ်ႉ ၶဝ်ႈပၢင်တိုၵ်းၵႂႃႇ တေႃႇထိုင်မိူင်းမၢၼ်ႈ ပွတ်းၵၢင် – ၵူဝ်ႇထုၼ်းထုၼ်းၼၢႆႇ သိုပ်ႇလၢတ်ႈၼႄၼင်ႇၼႆ။

“ယူႇတီႈ ႁဝ်းၶႃႈ တေႁူမ်ႈၵၼ်တင်းၸုမ်းလုၵ်ႉၽိုၼ်ႉသေ ၶဝ်ႈပၢင်တိုၵ်းၵႂႃႇ။ ပၢင်တိုၵ်းၼႆႉ ဢမ်ႇၸႂ်ႈပဵၼ် ၼႂ်းပိုၼ်ႉတီႈထၼု၊ မိူင်းတႆး ၸိူဝ်းၼႆႉၵူၺ်း တေတိုၵ်းတေႃး တေႃႇထိုင်မိူင်းမၢၼ်ႈပွတ်းၵၢင် ၸိူဝ်းၼၼ်ႉထႅင်ႈ” – ဝႃႈၼႆ။

ယၢမ်းလဵဝ် တီႈထုင်ႉဢၢင်ႇတေႃး ၵျွၵ်ႉၵူႇၼႆႉ သိုၵ်းထၼု DPLA ၸုမ်းလဵဝ် ယိုတ်းတိုၵ်းသိုၵ်းမၢၼ်ႈဝႆႉ။ မိူဝ်ႈၽႅၼ်ယၼ်ႇသိုၵ်း 1027 ပၢင်တိုၵ်း ယိုတ်းဝဵင်းၼွင်ၶဵဝ်၊ သီႇပေႃႉၼၼ်ႉ တပ်ႉသိုၵ်းထၼု လႆႈႁူမ်ႈၸွမ်း သိုၵ်းတဢၢင်း TNLA သေ ယိုဝ်းတိုၵ်းသိုၵ်းမၢၼ်ႈမႃး ဝႃႈၼႆ။

ပၢင်တိုၵ်း ၼႂ်းၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်းၼႆႉ တိုၵ်ႉတႄႇယိုဝ်းၵၼ် ပူၼ်ႉမႃးမိူဝ်ႈဝၼ်းတီႈ 4 ၼၼ်ႉသေ တေႃႇထိုင်ယၢမ်းလဵဝ် တိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉတင်း သိုၵ်းမၢၼ်ႈယူႇ ၼႆယဝ်ႉ။

မိူဝ်ႈၽွင်း ပဵၼ်ပၢင်တိုၵ်းၼၼ်ႉ သိုၵ်းထၼု DPLA သိမ်းလႆႈတရူၼ်ႊၶွင်သိုၵ်းမၢၼ်ႈ လမ်းၼိုင်ႈ။ တီႈဝဵင်းလွၵ်ႉၸွၵ်ႇ ၼႆႉ မီးတပ်ႉပႃႉထူး (သိုၵ်းမၢၼ်ႈ) ဝႆႉ ယဝ်ႉၵေႃႈ ပဵၼ်ႁူင်းႁဵၼ်းၾိုၵ်းၵၢၼ်သိုၵ်းလႄႈ ဢွင်ႈတီႈ ၾိုၵ်းၵၢၼ်ၶႃႈႁၢပ်ႇ ၵၢၼ်ၶုၼ် ပႃးထႅင်ႈ။