ၸၢႆးၸိူင်းၶႄႇ Wang Xing (ဢၼ်တင်းၼမ်ႁွင်ႉဝႃႈ Xingxing) ၼၼ်ႉ ႁၢႆၵႂႃႇတီႈလႅၼ်လိၼ်မၢၼ်ႈ – ထႆး ႁိုင် 3-4 ဝၼ်း၊ ၽိူဝ်ႇပလိၵ်ႈထႆးၵႂႃႇၸွႆႈတူဝ် မၼ်းၸၢႆးလႆႈမႃးၶိုၼ်းၼၼ်ႉ လႆႈႁူႉဝႃႈ မၼ်းၸၢႆးထုၵ်ႇၸုမ်း ၵျႃးၽႅၼ်ႉ လွၵ်ႇႁွင်ႉၵႂႃႇၾိုၵ်း တႃႇလွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ ဝႃႈၼႆ။

ၸၢႆးၸိူင်းၶႄႇ ၸိုဝ်ႈလိုဝ်းလင်ၼႆႉ လုၵ်ႉသျၢၼ်ႊႁၢႆႊ မႃးထိုင်ဝဵင်းလူင်ၵုင်းထဵပ်ႈ လုၵ်ႉၵုင်းထဵပ်ႈႁွတ်ႈထိုင် မႄႈသွတ်ႇ ၶၢမ်ႈၶူဝ်လႅၼ်လိၼ် ၶဝ်ႈထိုင်မျႃႉဝတီႇသေ ႁၢႆၵႂႃႇၼႂ်းလိၼ်မၢၼ်ႈ မိူဝ်ႈဝၼ်းတီႈ 3/1/2025။

ပလိၵ်ႈထႆးလႄႈ တပ်ႉပႂ်ႉလႅၼ်လိၼ်မိူင်းမၢၼ်ႈ ၸွႆႈၵၼ်ႁႃတူဝ်ထူပ်းႁၼ်ၶိုၼ်း မိူဝ်ႈဝႃး 7/1/2025 ယၢမ်းၵၢင်ၶမ်ႈ။

ပလိၵ်ႈထႆးၵူတ်ႇထတ်းထူပ်းႁၼ်ဝႃႈ – မီးၵူၼ်းၸုမ်းၼိုင်ႈ ဝႃႈပဵၼ်ၶွမ်ႊပၼီႊၵရႅမ်ႊမီႊ GMM မိူင်းထႆး ၼႆသေ ၵပ်းသိုပ်ႇတိတ်းတေႃႇမၼ်းၸၢႆး မႃးတၢင်းၶျွင်ႉတၢင်းဝီႊၶျႅတ်ႉ၊ ဝႃႈတႃႇထၢႆႇၸိူင်းၼႂ်းမိူင်းထႆးလႄႈ လႅၼ်လိၼ်ၼႆသေ ႁွင်ႉမၼ်းၸၢႆးမႃးမိူင်းထႆး။

Wang Xing လၢတ်ႈဝႃႈ ၽိူဝ်ႇထိုင်လႅၼ်လိၼ် မႄႈသွတ်ႇ – မျႃႉဝတီႇယဝ်ႉ ၸုမ်းႁွင်ႉမႃးၼၼ်ႉ ပႃးဢဝ်မၼ်းၸၢႆးၵႂႃႇ ၾိုၵ်း ၵၢၼ်လွၵ်ႇလႅၼ်ၵိၼ်ငိုၼ်းတၢင်းဢွၼ်ႊလၢႆႊ ၵျႃးၽႅၼ်ႉ တႃႇၶၢဝ်းတၢင်း 3 ဝၼ်း၊ တေႃႇထိုင်ပလိၵ်ႈထႆးႁႃမၼ်း ၸၢႆးႁၼ်ၶိုၼ်း။ တီႈႁဵၼ်းၵၢၼ် ၵျႃးၽႅၼ်ႉၼၼ်ႉ လၢတ်ႈမၼ်းၸၢႆးဝႃႈ တေလႆႈဝႆႉၸၢဝ်းၶႄႇ ပဵၼ်ပိူင်လူင်သေ ႁႂ်ႈလွၵ်ႇလႅၼ်ၵိၼ်ငိုၼ်း – Khaosod ထႆးတႅမ်ႈတၢင်ႇပိုၼ်ၽၢဝ်ႇဝႆႉၼင်ႇၼႆ။

ပလိၵ်ႈထႆးလႄႈ ၸုမ်းယိပ်းၵွင်ႈၵၢင်ႇၼႂ်းမိူင်းယၢင်း ႁူမ်ႈၵၼ်ႁႃတူဝ်မၼ်းၸၢႆး၊ မိူဝ်ႈႁႃႁၼ်တူဝ် Xingxing ၼၼ်ႉ ႁၼ်ပႃး ၵူၼ်းၼုမ်ႇၸၢဝ်းၶႄႇထႅင်ႈမွၵ်ႈ 50 ၵေႃႉ။ ၼၼ်ႉၵေႃႈ ပလိၵ်ႈထႆး လႆႈၸွႆႈဢဝ်တူဝ်ၶဝ် ဢွၵ်ႇပူၼ်ႉလွတ်ႈမႃးယဝ်ႉ။ တိုၵ်ႉတေၶပ်းၶိုင် တႃႇသူင်ႇၸူးမိူင်းၶႄႇၶိုၼ်း ဝႃႈၼႆ။

ၵဵဝ်ႇလွင်ႈၼႆႉသေ ၶွမ်ႊပၼီႊၵရႅမ်ႊမီႊ ပၢႆးမွၼ်းထႆး ဢွၵ်ႇလိၵ်ႈပိုၼ်ၽၢဝ်ႇဝႃႈ ဢၼ်လွၵ်ႇလႅၼ် ၸၢႆးၸိူင်းၶႄႇမႃးမိူင်းထႆးၼၼ်ႉ ဢမ်ႇၸႂ်ႈၼမ်ႉမိုဝ်းၶဝ်။ ဢၼ်ပဵၼ်ၵႂႃႇၸိူဝ်းၼႆႉၵေႃႈ ဢမ်ႇၵဵဝ်ႇတင်းၸုမ်းၶဝ်လႃးလႃး ဝႃႈၼႆဝႆႉ။