သိုၵ်းမၢၼ်ႈပိုၼ်ၽၢဝ်ႇဝႃႈ ႁဵတ်းဢွၵ်ႇၼမ်ႉမၼ်းၸိူဝ်ႉၾႆး (ထၢတ်ႈသီႇ) သႅၼ်း RON – 68 ႁင်းၵူၺ်းသေ တႄႇၶၢႆပၼ် ၵူၼ်းမိူင်းၸႂ်ႉယူႇယဝ်ႉ ဝႃႈၼႆ။

ၼမ်ႉမၼ်းထၢတ်ႈ RON – 68 ဢၼ်သိုၵ်းမၢၼ်ႈ ႁဵတ်းဢွၵ်ႇႁင်းၵူၺ်းၼႆႉ တႄႇၶၢႆတီႈၼေႇပျီႇတေႃႇ တီႈၼိုင်ႈလႄႈ တီႈဝဵင်းလိူဝ်ႇ 2 တီႈ။ ၶၢႆၼိုင်ႈလိတ်ႉ(လီႊတိူဝ်ႊ) 2,200 ပျႃး။ ၼွၵ်ႈလိူဝ် 2 တီႈၼႆႉ တေသိုပ်ႇၶၢႆထႅင်ႈ တီႈဝဵင်းတွင်ႇငူႇလႄႈ ဝဵင်းလွႆလႅမ် ၸိုင်ႈတႆးပွတ်းၸၢၼ်း ထႅင်ႈလူးၵွၼ်ႇၼႆ သိုၵ်းမၢၼ်ႈ ပိုၼ်ၽၢဝ်ႇၼင်ႇၼႆ။  

သိုၵ်းမၢၼ်ႈတႄႉ လၢတ်ႈဝႃႈ – ပဵၼ်ၼမ်ႉမၼ်းၸၢၵ်ႈ ဢၼ်ႁဵတ်းဢွၵ်ႇၵူၺ်းလႄႈ ၵႃႈၶၼ်တေထုၵ်ႇ။ ၸႂ်ႉလႆႈတီႈၶိူင်ႈ ၸၢၵ်ႈရူတ်ႉၶိူင်ႈ၊ သၢမ်လေႃႉ၊ ၸၢၵ်ႈၾႆး၊ ၸၢၵ်ႈႁိူဝ်း ၸိူဝ်းၼႆႉ – ဝႃႈၼႆ။

ဢိၼ်ႊၵျိၼ်ႊၼီႊယႃႊ ၾၢႆႇပၢႆးၸၢၵ်ႈလၢႆလၢႆၸဝ်ႈ ထတ်းသၢင်ဝႃႈ – ၼမ်ႉမၼ်းၸၢၵ်ႈ RON – 68 ဢၼ်သိုၵ်းမၢၼ်ႈ ႁဵတ်းဢွၵ်ႇၼႆႉ မၼ်းဢမ်ႇၶိုတ်းတၼ်းလၵ်းၸဵင်လုမ်ႈၾႃႉလႄႈ သင်သိုဝ်ႉၸႂ်ႉၸိုင် ၶိူင်ႈၸၢၵ်ႈတေၵွႆငၢႆႈ – ဝႃႈၼႆဝႆႉ။   

ယၢမ်းလဵဝ် ယွၼ်ႉပိူဝ်ႈသိုၵ်းမၢၼ်ႈ ၸႂ်ႉၶိူင်ႈမိၼ်ၼႂ်းပၢင်တိုၵ်းၼႂ်းမိူင်း၊ ပိုတ်းယိုဝ်းႁိူၼ်းယေးၵူၼ်းမိူင်း ဢမ်ႇၵိုတ်းဢမ်ႇလိုဝ်ႈ မီးယူႇၵူႈဝၼ်းလႄႈ ၸၢတ်ႈၸိုင်ႈလုမ်ႈၾႃႉ ပိုၼ်ၽၢဝ်ႇ ႁႂ်ႈဢွၼ်ၵၼ်သၢၼ်ၶတ်းသိုၵ်းမၢၼ်ႈ၊ ႁႂ်ႈဢွၼ်ၵၼ် ၵိုတ်းလွင်ႈၵမ်ႉၸွႆႈသိုၵ်းမၢၼ်ႈ၊ ယႃႇႁႂ်ႈသိုၵ်းမၢၼ်ႈ လႆႈၼမ်ႉမၼ်းၶိူင်ႈၸၢၵ်ႈ ၸႂ်ႉတိုဝ်းၼႂ်းၵၢၼ်ပိုတ်းယိုဝ်းၵူၼ်းမိူင်း။

ယၢမ်းလဵဝ် ၸိူဝ်းပဵၼ်ၼမ်ႉမၼ်းၸိူဝ်ႉၾႆး (ၼမ်ႉမၼ်းၸၢၵ်ႈ) ဢၼ်ဢဝ်ၼွၵ်ႈမိူင်းမႃးၼႆႉ သိုၵ်းမၢၼ်ႈ ၵဵပ်းဝႆႉမူတ်းသေ တွၼ်ႈတႃႇၵူၼ်းမိူင်းတႄႉ ဢမ်ႇမီးၼမ်ႉမၼ်းၸၢၵ်ႈ တႃႇၸႂ်ႉတိုဝ်း ၼႂ်းၵၢၼ်ႁႃၵိၼ်လဵင်ႉတွင်ႉ – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။