လူမ်းလႅင်ႉမူၺ်ၶၢပ်ႇ၊ ၼမ်ႉၶႅင် ဢိၵ်ႇတင်း လူမ်းလႅင်ႉၶၢဝ်းၵတ်း တႄႇၽတ်ႉထွင်းၶဝ်ႈ ၼႂ်းမိူင်းဢမေႊရိၵၼ်ႊ ပွတ်းၵၢင်၊ ပွတ်းၸၢၼ်းတင်း ပွတ်းဢွၵ်ႇဝႆႉလႄႈ ၵူၼ်းမိူင်း ဢွၼ်ၵၼ်ႁူပ်ႉလွင်ႈယၢပ်ႇၽိုတ်ႇတႃႇၵႂႃႇမႃး – ဝႃႈၼႆ။

ၼႂ်းပိုၼ်ႉတီႈ ဢၼ်မူၺ်ၶၢပ်ႇတူၵ်းဝႆႉ ၼႂ်းဝၼ်းတီႈ 6/1/2025 ၼႆႉ လၢမ်းၶၢတ်ႈဝႆႉထႅင်ႈဝႃႈ မၢင်ပိုၼ်ႉတီႈ မူၺ်ၶၢပ်ႇၸၢင်ႈတူၵ်းၼႃႁႅင်းသုတ်း တီႈၼႂ်းၶၢဝ်းတၢင်း 10 ပီ ဝႃႈၼႆ။

လူမ်းလႅင်ႉမူၺ်ၶၢပ်ႇ တႄႇၽတ်ႉထွင်းၶဝ်ႈ ၼႂ်းၸႄႈတွၼ်ႈပွတ်းၵၢင် မိူင်းဢမေႊရိၵၼ်ႊ မိူဝ်ႈဝၼ်းတီႈ 5 ပူၼ်ႉမႃးၼႆႉ ႁဵတ်းႁႂ်ႈသဵၼ်ႈတၢင်းၵပ်းသိုပ်ႇၵႂႃႇမႃးယၢပ်ႇၽိုတ်ႇ။ လိူဝ်ၼၼ်ႉ တီႈၼႂ်းၸႄႈတွၼ်ႈပွတ်းဢွၵ်ႇ မိူင်းဢမေႊရိၵၼ်ႊၵေႃႈ ပၼ်ၾၢင်ႉဝႆႉဝႃႈ ၼႂ်းၶၢဝ်းတၢင်းလၢႆဝၼ်းၼႆႉ ၾိင်ႈၾႃႉရႃႇသီႇ ၸၢင်ႈႁၢဝ်ႈႁႅင်းထႅင်ႈ ၼႆယဝ်ႉ။

ၵူၼ်းမိူင်း ၼႂ်းပိုၼ်ႉတီႈ ၸႄႈတွၼ်ႈ Kansas တင်း Missouri လႆႈၶၢမ်ႇတၢမ်ႇလူမ်းလႅင်ႉ မူၺ်ၶၢပ်ႇဝႆႉႁၢဝ်ႈႁႅင်း။ တီႈ ၼႂ်းၸႄႈတွၼ်ႈ Indiana ၵေႃႈ လႆႈယွၼ်းတၢင်းၸွႆႈထႅမ် ၸုမ်းၾၢႆႇၵႅတ်ႇၶႄၼႂ်းမိူင်း မႃးဢဝ်ရူတ်ႉၵႃးၸိူဝ်းၶမ်ဝႆႉ ၼႂ်း ၵႄႈမူၺ်ၶၢပ်ႇဢွၵ်ႇ ဝႃႈၼႆ။

တီႈၼႂ်းၸႄႈတွၼ်ႈ ပႃႊၵျီႊၼီႊယိူဝ်ႊတင်း မေႊရီႊလၢၼ်ႊၵေႃႈ လႆႈပိုၼ်ၽၢဝ်ႇပဵၼ်ငဝ်းလၢႆးၶိုၵ်ႉၶၵ်ႉဝႆႉသေ ၼႂ်းဝၼ်းတီႈ 6 ၼႆႉ ထိုင်တီႈလႆႈပိၵ်ႉဢိုတ်းႁူင်းႁဵၼ်းဝႆႉ။

ၽူႈမီးပုၼ်ႈၽွၼ်းပလိၵ်ႈၸႄႈတွၼ်ႈ ပႃႊၵျီႊၼီႊယိူဝ်ႊလၢတ်ႈဝႃႈ တႄႇဢဝ်လူမ်းလႅင်ႉမူၺ်ၶၢပ်ႇ ၽတ်ႉထွင်းၶဝ်ႈ မိူင်းဢမေႊရိၵၼ်ႊ ၼႂ်းဝၼ်းတီႈ 5 ၼႆႉသေ ရူတ်ႉၵႃးပဵၼ်ၽေးၵိုင်ႉၵၢင်ႉဢမ်ႇယွမ်း 135 ၵမ်း။ လိူဝ်ၼၼ်ႉ ၶၢဝ်းတၢင်းသၢႆၵၢၼ်မိၼ် ရူတ်ႉၾႆး ၸိူဝ်းၼႆႉၵေႃႈ လႆႈၵိုတ်းယင်ႉဝႆႉတင်းၼမ် – သိုဝ်ႇၶၢဝ်ႇ VOA ဢွၵ်ႇဝႆႉၼင်ႇၼႆ။